کولت. آز میرزه علی معجز شبسترلینین "تازا مولود حقینده!" غزلینی تقدیم ائدیر:

یارب گوره سن تابع قرآن اولاجاق بو؟
باشین یاراجاق قانینا غلطان اولاجاق بو؟

خیرنک بوغاجاق بو اوشاقی یا کی قیزیلجا؟
یا خود بویویوب بیر یئکه اوغلان اولاجاق بو؟

آرخاسینی زنجیریله صد چاک ائده جک بو؟
باباسی کیمی کهنه مسلمان اولاجاق بو؟

زیر و زیر و پش دو زَبَر اورگنه جک یا!!
جیغ بیغ اوخویوب داخل نیران اولاجاق بو؟

ابواب جنانی باساجاخ باغرینا یا یوخ؟
یا رب گوره سن قائل قرآن اولاجاق بو؟

معلوم دگیل ایندی بونون مذهبی دینی
بلکه بویویندن سورا بیر خان اولاجاق بو؟

اؤلدور منی یا رب او گونو گورمویوم ای کاش
امنیه و نظمیه و آژدان اولاجاق بو؟

وئرّم قسم آللها سنی ای ملک الموت
آل جانین اگر عامل دیوان اولاجاق بو !

ساققال قویاجاق قیخدیراجاق باشینی یا رب؟
معجز کیمی بیر صاحب ایمان اولاجاق بو.