کولت. آذ یحیی‌شیدا​نین "ساریکؤینک" آدلی شعیرینی تقدیم ائدیر:

آی خسته قوش آواره گزیرسن بو دیاری
زنداندی، قفسدی چمنی باغی- باهاری

گؤزله اؤزونو آووچودو هریانی بویوردون
قوزغون کیمی دورد گؤزلو گَزیر کؤرپه شکاری

فرصت دالیسیجا گزیر ال یئری تاپسا
ویران قویاجاق یوردونو آی کؤینه یی ساری

تیک اؤز یووانی قویما سنه ال تاپا اووچو
سن بو یووانین صاحبیسَن قان یئنه باری

جهد ایله کی، جان قورتاراسان اوْوچو الیندن
دوشسَن تورا فریاد ائله‌مه چک بو فشاری

گولشَنده کی، یوخ ذوق و صفا، آی ساری کؤینک
قاچ‌-قاچ بو یئرین زهریلیدیر داری- نداری

دیلله‌نسن اگر اوْوچو ائدر قانینا قلتان
اوچسان آ یازیق تیر جفا قلبینی یاری

مین فیرتینا قالخیب دویه‌جک باشینا طوفان
هر کیمده اولا داغ کیمی دونیادا وقاری

گلسه باشیوا درد - بلا داغ کیمی دور باخ
آیدیندی بو سوز توستو گئدر گویچه یه ساری

ایستَر سَنی صیاد اؤزونه رام ائده اما
ایغودور، گؤرر آج تویوغ البته کی، داری

بو یاخشی مثلدیر کی، بیزم ائلده دئمیشلر
بیر باخ آشاغی باخما اؤزوندن ده یوخاری

غم غصه کیچیک قلبینی گَر دویسه سیخیلما
بو گونده کئچر آخیری غملر ده قوتاری

اوندا کی، چیخار گون یاییلار عالمه بیردن
اوندا کی، قارا دان یئری صبح اولجاق آغاری

داغی داشی آسوده خیالیله گزرسن
گولشَنده نه شاختا گوره‌سن داغدا نه قاری

ظولمون ائوی ویران اولو ظالیم دوشر الدن
قان دورماز اگر کسسه پیچاق قیرسا داماری

بختین قاپیسی ایندی قیفیللانسا داریخما
هر بیر قیفیلین واردی طبیعتده آچاری

اؤز جانینیلا اویناما بو عرصه‌ده شیدا
لیلاج دغلبازیله قیزدیرما قوماری