کولت. آذ آشیق حسین جوانین "کیم‌دن اؤیرندین" آدلی آشیق شعرینی تقدیم ائدیر:

سئوگیلیم، سن مارال کیمی
گزمیی کیم‌دن اؤیرندین؟
آی قاباغا جیغا تئلی
دوزمیی کیمدن اؤیرندین؟

تئز یوخودان اویانماغی،
آل قوماشا بویانماغی،
گردن چکیب دایانماغی،
سوزمیی کیم‌دن اؤیرندین؟

من سئویرم زرنیشانی،
اوندا وار گولون نیشانی.
ساغ علینله بنؤوشه‌نی
اوزمیی کیم‌دن اؤیرندین؟

کک‌لیک کیمی قایالاردا،
جئیران کیمی سهرالاردا،
سونا کیمی دریالاردا
اوزمیی کیمدن اؤیرندین؟

بولود آلماسین آی اوزون،
حسین سازلا دئییر سؤزون.
خومار-خومار آلا گؤزون
سوزمیی کیم‌دن اؤیرندین؟