کولت. آذ شاعر آیریلمازین" اینسان آغلاییر" آدلی شعرینی تقدیم ائدیر:

عجیب زامان اولوب بیزیم زامانا
اینسانین حالینا حئیوان آغلاییر
اینسان درد الیندن گلیب فاغانا
تاپیلمیر دردینه درمان آغلاییر

باخیشلار اولوبدو قیش کیمین سویوق
اینسانلار ائله ییر ثروته قوللوق
بعضن بیر ایش گؤرور اشرف مخلوق
گیلایه ائله ییب شیطان آغلاییر

اینسان پولدان اؤترو نه دئسن گؤرور
اوغلان قاش آلدیریب ساچلارین هؤرور
حکیم جللاد اولوب آدام اؤلدورور
قبیرده بیچاره لوقمان آغلاییر

کیشی دول آختاریرآروادی اویناش
قضاوت ائله ییر اوغرویا اوباش
خیانت ائله ییر قارداشا قارداش
قئیرت ماتم دوتوب ویجدان آغلاییر

آلچاق آداملارین اوجالیب باشی
زیارتگاه اولوب جهالت داشی
اؤپوب چیرکلی داشی تؤکور گؤز یاشی
تاپداییب باشینا نادان آغلاییر

حاکیملر اونودوب میللتین غمین
یاغیلار آشکارا ویریبلار کمین
هر کیم اؤز ایشینین تاپیبدیر چمین
چاققال توتک چالیر آسلان آغلاییر

گوهرچی بیلمه ییر گوهر قیمتین
قویوبلار ساتیشا اینسان عیصمتین
آشیقلارساخلامیر سازین حورمتین
میضراب ناله ائدیر کامان آغلاییر

سالیبلار زیندانا حاق سئونلری
شاللاقلار آلتیندا سویولور دری
حقیقت تاپدانیب گئدندن بری
دوران گولومسه ییر زامان آغلاییر

آتااؤز بالاسین چکدیریر دارا
کؤمور قارا دئییر آی اوزو قارا
آنالار دردینه تاپیلمیر چارا
باجیلار باش یولوب یامان آغلاییر

زامانا الیندن گلمیشم زارا
باخیرام اینسانا من یانا یانا
آللاهدا رحم ائتمیر یازیق اینسانا
هارای آی اینسانلار اینسان آغلاییر

آیریلماز دوعایلان آچیلماز دوگون
دوگونلر پیرتلاشارقالسا گون به گون
شاعیر نظمه چکیر باخیب گؤردوگون
قلم سیزیلداییر یازان آغلاییر