کولت. آز رامیز رؤوشه‌نین " کؤهنه سؤزلر" آدلی شئیرینی تقدیم ائدیر:

داش گرک بئزمه‌سین اؤز برکلیین‌دن،
بایقوش دا بئزمه‌سین
اؤز تکلیین‌دن.
تانری اؤزو یازیب یازیلانلاری،
ها پوزماق ایسته‌سه‌ن -
بیر خئیری یوخ‌دو.
دئمه: "بالیق دئییل سو ایلانلاری..."،
سئوین کی اونلارین زهری یوخ‌دو.
هامی سؤز چیخاریر سؤزون ایچین‌دن،
شاعر اؤز سؤزون‌دن بئزمه‌سین گرک.
دئمه: "گؤز دونیانی گؤرمک اوچون‌دو..."،
کور دا اؤز گؤزون‌دن بئزمه‌سین گرک.
... بو کؤهنه سؤزلره
کیم‌دی او گوله‌ن،
هانی تزه سؤزون، آتام بالاسی؟!
الله بو دونیادان
بئزمیرسه هله،
بن‌ده نیه بئزسین، آتام بالاسی؟!
داها دیل دیه‌مه‌یه‌ن سؤز قالماییب،
نه تزه دردیم وار،
نه تزه سؤزوم.
دئمه: "یاشاماغا هوس قالماییب..."،
منیم اؤلمه‌یه ده
یوخ‌دو هوسیم.
چوخلاری بینمیر، یئمیر سؤزومو
نه چیخیر اون کیمی سؤز ال‌مک‌دن؟
بوردان یاماییرسان، اوردان سوزولور،
ال چک بو دونیانی تزه‌لمک‌دن.
بو کؤهنه دونیادی؛ ائله بئله‌جه
گؤردویو کیمی‌دی، اؤزگه جور دئییل.
هامی اؤز اؤمرونو آلیب-وئره‌جک،
هامی آلوئرده‌دی،
کیم تاجیر دئییل؟!
آنا سئوگی‌سینه، آتا گوجونه
هاوایی آلدیغین اؤمرو باها سات.
آلدانما هئچ کیمه، ساتما هئچ کیمه،
سات‌سان اؤز اؤمرونو، سن اللها سات!..
اما اللها دا ساتما سؤزونو،
دئمه کی ساتدیغین واراق‌دا سؤزدو.
الله نئجه آلسین اؤزو-اؤزونو،
اللهین جانی یوخ،
الله دا سؤزدو!..
نه چوخ‌دو دیک گزیب
اوجوز سؤز ساتان،
نه چوخ‌دو یئن‌دیره‌ن آیاغا
سؤزو
سن اؤزون تاپ‌دانا-تاپ‌دانا، آتام،
نئجه چات‌دیرمی‌سان اللها سؤزو؟!
اللهی دونیایلا باریش‌دیرمی‌سان،
قیراق‌دا گزمه‌سین گؤزون اللهی.
دونیانی اللهلا بؤلوش‌دورموسه‌ن؛
اللهین قولوسان،
سؤزون اللهی.