کولت. آذ رامیز رؤوشنین ان مشهور شعیرلرین‌دن اولان "آیری‌لیق"ی تقدیم ائدیر. شاعرین بیلدیردیینه گؤره، شئیرین ایلک ایکی بندی طلبه‌لیک یللرین‌ده کونکرت اونوانا یازیلیب. او، ۲۰ ایلده‌ن سونرا شعیره یئنی‌دن قاییرداق قالان بندلرینی یازیب و شعیره فلسفی مزمون قاتاراق اونو تماملاییب.

یئنه بو شهرده اوز-اوزه گلدیک
نئیلیک، آیریجا شهریمیز یوخ.
بلکه ده، بیز خوشبخت اولا بیلردیک،
بلکه ده، خوشبختیک، خبریمیز یوخ.

آرادان نه قدر ایل کئچیب گؤره‌ن، -
تانییا بیلمدیم، منی باغیشلا.
من ائله بیلیردیم، سن‌سیز اؤلره‌م،
من سن‌سیز اؤلمدیم، منی باغیشلا!

"اؤلمدیم" دئییرم، نه بیلیم آخی، -
بلکه ده، من سن‌سیز اؤلموشه‌م ائله،
قبیرسیز-کفه‌ن‌سیز اؤلموشه‌م ائله.
بلکه ده، بیز اوندا آیریلماسایدیق،
نه من ایندیکیدیم، نه سن ایندیکی

آیریلدیق، شیطانی گولدوردوک اوندا؛
بو ایلین، بو آیین، بو گونون‌ده‌کی،
ائله بو کوچه‌نین بو تینین‌ده‌کی
منی ده، سنی ده اؤلدوردوک اوندا.

...ساغیمیز-سولوموز آداملا دولو،
قول-قولا کیشیلر، قادینلار کئچیر.
اؤزون‌دن خبرسیز، اؤمرون‌ده مین یول
اؤزونو اؤلدوره‌ن آداملار کئچیر.

کئچیر اؤز قانینا باتان آداملار،
بیر ده کی، قان هانی؟
قان آخی یوخ‌دو.
هامی گوناهکاردی دونیادا، اما
دونیادا هئچ کسین گوناهی یوخ‌دو.

بیزسیز یازیلمیش‌دی بو تالع، بو باخت،
ساپانددان آتیلان بیر جوت داشیق بیز.
بلکه بو دونیادا اون-اون بئش ایل یوخ،
مین ایل بون‌دان قاباق آیریلمیشیق بیز.

هالال یولوموزو دییشیب، نسه
چاشمیشیق، بیر اؤزگه یول‌دان گئتمیشیک.
بلکه مین ایل قاباق سهو دوشوب نسه،
مینیل‌لیک بیر سهوه قوربان گئتمیشیک.

دییشیب یئرینی بلکه قیش-باهار،
قاریشیب دونیانین شهری، کن‌دی.
بلکه اؤز بتنین‌ده اؤگئی آنالار
اؤگئی بالالاری گزدیریر ایندی.

اؤمروم باش‌دان-باشا یالان‌دی بلکه،
تالئییم باشقایمیش دوغرودان ائله.
او یول‌دان اؤتن قیز، آناممی بلکه،
بلکه ده، اوغلومدو بو اوغلان ائله.

بو یالان عمروم‌ده گؤره‌ن سن نسه‌ن؟
بلکه هئچ سئوگیلیم دئییلسه‌ن منیم.
آنام‌سان، باجیم‌سان، ننه‌م‌سه‌ن، نسه‌ن؟!..
بیرجه الله بیلیر، نییم‌سه‌ن منیم.

بیزی کیم آددادار بو آیری‌لیق‌دان،
چاتماز دادیمیزا، نه یول، نه کؤرپو.
اؤلوسه‌ن، دیریسه‌ن، هر نسه‌ن، دایان!
دایان، هئچ اولماسا الین‌دن اؤپوم...

دئییرسن: "اؤلویه‌م، اؤلونو اؤپمه..."
علیمین ایچین‌ده، سویویور علین.
دئییرسن: "سن الله، علی‌می اؤپمه،
الیم‌دن، دئیه‌سه‌ن، قان ایگی گلیر...