آنا صحیفه ادبیات |
گونلرین بیر گونونده بیر پادشاه واریدی. اونون آلتی-یئددی یاشینداکی قیزینین چوخ قوللوقچو خیدمتینده یدیلر. پادشاهین قيزيندان نئچه یاش بؤیوک قوچعلی آدیندا بیر قول واریدی. یئمک یئیه نده قیزین، دستمالی یئره دوشونجه قوچعلی گؤتوروب، قیزا وئرردی.
گاهدان میلیونلار اویونجاغیندان اوره یی سیخیلاردی، کؤنلو دونبالان-پیسدان اویناماق ایستردی.
اونون دونبالان-پیسدانی قیزیلدان ایدی. قیز ایلک دفعه بو اویونو ایستینده، پادشاه شهرین اوستا آلتینچی لارینا امر ائله میشدی:
- بیر ساعاتین ایچینده قیزیل لا گوموشدن دونبالان-پیسدانی حاضیرلایین.
اونون خرجی اوزامان لار یوز مین تومن اولموشدو.
اوستالارین بیری کؤرپه قیزینا سیرغا دوزه لتمک اوچون بو ایشی قبول ائتمه دیبینه گؤره، جانیندان اولموشدو.
قیز بو اویونو اوینار کن قوچعلی قیراقدا دایانیب، بکله یردی.
پادشاهین قیزی الینده قیسا بیر گوموش آغاجی یئره قویار، سونرا اوزون قیزل آغاجی قوچعلی نین باشینا ووروب، گؤیه ساری آتاردی. قوچعلی قاچیب، آغاجی قیزا وئرردی، او دا آلیب، محکم قوچعلی نین باشینا ووروب داها اوزاغا آتاردی.
قیز اویوندان یورولان زامان قوچعلی قوللوقچولارا خبر وئرردی، اونلار دا تسکره نی(تخت روان) گتیریب قیزی سارایا آپاراردیلار.
سونرا قوچعلی خزانه داری خبر ائدردی قیزیل دونبالان-پیستانی، میلیونلار اویونچاغی ساخلادیقلاری یئره آپارسینلار.
اوندان سونرا قوچعلی قيزين یئمک پالتارینی آلیب گتیریب، دونبالان-پیسدان پالتارینی خزانه یه قایتاراردی.
قوچعلی بو ایشلری گؤردوکدن سونرا مطبخه گئدیب، آشچی دان یئمه یین حاضیرلانماغینی ایستردی. چونکو قیزین، هر اویونا گؤره اؤزل یئمه یی وار ایدی.
قوچعلی شهزاده نین هر امرینی، سئوه - سئوه یئرینه یئتیرردی.او یاتدیغی زامان، قوللوقچولار راحاتسیز ائتمه سینلر دئیه، قوچعلی قاپینین آرخاسیندا یاتاردی.
پادیشاهین قیزی هر نه دیله سه یدی قوچعلی اونو اعلاء شکیلده یئرینه یئتیرردی. اونا گؤره شهزاده هئچ زامان قوچعلی یه الینی قالدیرمامیشدی.
قوچ علی پادشاهین قیزینا دوم-دورو سئوگی بسله میشدی. او بو ایشی عاییب بیلمه ییردی، او اوزدن بیر گون سئوگیسینی قیزا اعتراف ائله دی.
او گون قیز باغدا کپهنک توتوردو. قوچعلی آغاج دیبینده دورموش، قیزا باخیردی. گاهدان کپهنک آغاجین بوداغینا قوندوقدا، چیخیب، اونو قوووردو.
بیر دفعه قیز بؤیوک بیر کپه نک گؤردو. قوچعلی یه امر ائله دی:
- گل بو کپهنهیی سن توت! من قورخورام.
قوچعلی قاچیب کپه نه یی توتوب، تور سبدین ایچینه سالدی.
باشینی قالخیزدیقدا، قیزی قارشی سیندا گؤردو. صداقتله قیزا دئدی:
- شهزاده من سیزه عاشیقم.
آما سؤزونو قورتارار-قورتارماز، قیز قولاغینین دیبینه محکم بیر شاپالاق ووروب، دئدی:
-سن منیم قولومسان، نه حاقلا منه عاشیق اولوبسان؟ منیم قاپیمدا، کؤپک اولماغا دا لاییق دئییلسن!...تئز ایتیل گؤزومون اؤنوندن!...
گئت قوللوقچولاریما ده ،گلیب منی آپارسینلار. سنی ده ائشییه آتسینلار. بیر داها منی گؤرمه یه حاققین یوخدور.
قوچعلی گئدیب قوللوقچو لارا خبر وئردی.
قوللوقچو لار تسکره نی گتیردیلر، آما قیزی یئرده هوشدان گئتمیش حالدا گؤردولر. تؤکولوب، قوچعلی یه نه یئمیسن تورشولو آش.
قوچعلی آندا وئردی:
_من هئچ ایش گؤرمه میشم. اؤزو حیرصله نیب، منی دؤیوب، هوشدان گئتدی.
آما کیمسه اونا اینانمادی.
شربتله گولاب گتیریب، قیزی حالا گتیردیلر. تسکره یه قویوب، سارایا داشیدیلار.
قیز دئدی:
-آتاما دئیین امر ائله سین بو نانکور قولو ایت کیمی سارایدان آتسینلار.
پادشاه امر ائله دی قوچعلی نی او دیقه ایت کیمی ائشییه آتدیلار.
پادیشاهین قیزی خسته له ندی. هر گون بیر حکیم باشی اوستونه گلیردی.
آردی وار..
تاریخ
2022.12.05 / 15:17
|
مولف
حاضیرلایان: ویدا حشمتی
|