اوچونجو بؤلوم

من آوارا آدام ایدیم قیچلاریم منی آپاریردیلار هارا اولموش اولسون. یئتیشدیم بیر اوزون دالانا، اورانین هر طرفی ماغازا ایدی. دیبی باغلی بیر دالان ایدی. دئدیم بورا یاخشی یئردی، قوی گئجه‌نی بوردا قالیم، بورا هر یاندان آرخاییلیق یئر اولا بیلر. چامادانیمی آتدیم باشیمین آلتینا قورو یئرده اوزاندیم. گؤزلریمین یومولماغینی گؤردوم هاچان یوخلامیشدیم بیلمیرم.

- میوووووووو

بالاجا پیشیگین سسی منی یوخودان اویاتدی. گؤز آچماغیمی گؤردوم بیر آغیر تپیک منیم دیشلریمی آغزیما توکدو. گؤزلریم سولاندی، بورنومون قانی آغزیمین قانینا قاتیلدی. منی ایکی ـ اوچ یاناندا توتدولار. دؤرد یا بئش آدام اولاردیلار. اونلارین هامیسی‌نین الینده «ام پی فایو» وارایدی. زورلا اونلاری گؤروردوم، بیریسی اوست خیاواندا دوران تفتیشچی‌لردن ایدی.

- موغاییت اولون، بیردن چامادانی پارتداماسین!

چوخ اللشدیم دئییم یوخ، واللاه چامادانیمدا پارتدایان بیر شئی یوخدور، اونون ایچینده بیر کؤینک، ایکی جانلیق، بیر شالوار واردیر. قان بوغازیمین یولونو کسمیشدی. سسیم چیخمیردی.ال‌لریمی باغلامیشدیلار. گؤزلریمی‌ده باغلادیلار. منی بیر آرابانین ایچینه باسیب تئز اوردان اوزاقلاشدیلار. داها او بالاجا پیشیگین سسینی ائشیتمیردیم. ایسته‌دیم دؤنوم آرخاما باخیم گؤروم اودا گلیر یا یوخ؟ اولمادی، آخی منیم گؤزلریم باغلی‌ایدی. اوره‌ییمدن بیر آغیر سرین آه کئچدی.

- تئز اولون، بیر آز یئیین بوردان اوزاقلاشین ممکوندور یولداش‌لاری بو آرالاردا اولموش اولسونلار.

- واللاه، منیم یولداشیم یوخدور، آخی یولداشیم اولسایدی، بو قورو یئرده یاتاردیم؟ بونو من دئدیم.

آما قانلی بوغازدان، باغلی آغیزدان نه‌جور سس چیخار؟ سسیم چیخمادی، هئچ کیم سسیمی ائشیتمه‌دی.

منی گتیردیلر، بیر اوزون دالانا سالدیلار. گؤزلریمی آچدیلار. آغیزیمی یوخ. ایکی چوخ یئکه آدام گیردی من اولان دالانانین ایچینه. دالاندا ایکی آدام بیرـ بیری ایله قارین ـ قارینا دورانمازدی. بیریسی ساغیما کئچدی، بیریسی سولوما. ساغدا دوران کیشی دئدی:

-هاچا یولونو پارتدادان سنی ایدون؟

سؤز سونا چاتمیشدی یا یوخ بیلمیرم. بیر چوخ آغیر وورغو منی ساغدا دورانین قوجاغینا ساری تولازلادی.

او بیردنه ووردو سولا گئتدیم. هوشوم باشیمدان چیخمیشدی. گؤزلریم هئچ یانی گؤرموردولر. یانی هر شئی چوخ قارانلیق گؤروردوم. داها وورغولارین آغریسنی بیلمیردیم. ساغا ـ سولا اوچوردوم.

- حاجی ال ساخلا.. قاپیدان گیرن بیرکیشی دئدی.

- نه اوچون؟

- بو اوغلانین چامادانیدا بیر کؤینک، ایکی جانلیق، بیر شالوار واردیر. داها سانکی شئی یوخدور.

- ائله بو اؤزو اونلاردان دیر.

- آخی پارتداجیلی بیر شئی‌ین ایزینی بونون جامادانیندا تاپامیشیق.

- بو اونلارین یاراقچیسی‌دی. بو کؤینک- مؤینک گتیریب اونلار پالتارلارین ده‌ییشسینلر، تانینماسینلار. بونلار چوخ حارامزاده آدام‌دیرلار.

- اولابیلر. آما...

- سن گئت اؤز ایشووا، بونلاری منه بوراخ.

قاپی باغلاندی. بیر نئچه آغیر وورغو گینه ده منی ساغا ـ سولا آتدی. داها نفسیم چیخمیردی. بئله بیلیردیم قوش اولموشام. گؤیلرده اوچوردوم. آما بیر قانادیم یارالانمیشدی. گؤیرچین اولموشدوم. سون وورغودا اوچدوم، گؤیلرده گئتدیم. یورغون، قوندوم بیر حیط دووارینین اوستونه. باخدیم. اوردا بیر قادین اوزون شالین باشینا باغلامیشدی. حیط ده اوتورموشدو. سئرچه‌لره دن تؤکموشدو. اونلار یئدیکجه اودا قوشمالار دئییردی، آغلاییردی. منی گؤردو. اوتانجاق کیمین اولدو. شالین آچدی گؤزلرینی سیلدی.

- گل، گل سنه‌ ده دن وئریم، سو وئریم. آجسان؟ سوسوزسان؟ هاردان گلمیسن. یول‌لاردان گلنده الینده چامادان بیر اوغلان گؤرمه‌میسن؟

چوخ سوسوزلامیشدیم. یئندیم، حیط ده سئرچه‌لر منی گؤدولر، قانادیما باخدیلار آز مندن گری گئتدیلر. کاسادا کی، سویو باشیما چکدیم. هامسینی ایچدیم بوغازیمین یولو آچیلدی. نفسیم بیر آز راحات چیخدی. او قادین شالی‌نین اوچونو گتیردی منیم قانادیمدا اولان قان‌لاری سیلدی.

داوامی وار...