کولت. آذ حیرتامیز حکایه‌لر سیلسیله‌سین‌دن نؤوبتی حکایه‌سینی تقدیم ائدیر:

محاربه باشلایان‌دا لویجی آدلی بیر آدام پئی‌دا اولموشدو، کؤنوللو یازیلماق ایستییردی. هامی اونو تعریفله‌ییب گؤیلره قالدیریردی.

لویجی سلاح پایلانیلان یئره گئدیب بیرینی گؤتوردو و دئدی: «ایندی گئدیب آلبرتونو اؤلدوره‌جه‌م». اوندان آلبرتونون کیم اولدوغونو سوروشدولار. «دوشمن‌دیر آلبرتو، منیم دوشمنیم»، - دئیه جواب وئردی. اونا ایستدیی هر آدامی اؤلدورمه‌یه اجازه وئریلمدیینی، یالنیز بللی دوشمنلری اؤلدورملی اولدوغونو باشا سالماق ایسته‌یه‌ن‌ده، «ندی؟!» دئییب بوزاردی: «سیز منی آخماق‌می حساب ائلییرسیز؟ آلبئرتو ائله ان بؤیوک دوشمن‌دی. اونلارا قارشی محاربه‌یه باشلادیغینیزی ائشی‌دن‌ده، درهال سیزه قوشولمالی اولدوغومو دوشوندوم، چونکی یالنیز بو حال‌دا آلبرتونو اؤلدوره بیلردیم. ائله بونا گؤره ایندی یانینیزدایام. اونو یاخشی تانیییرام، اجلافین، آلچاغین یئکه‌سی‌دیر. منله خاینجه‌سینه داوران‌دی، قادینین یانین‌دا اوزوقارا اولدوم، آلچالدیم... کهنه صحبت‌دی، ایستییرسیزسه سیزه دانیشیم».

- یوخ، لازیم دئییل، سنی باشا دوشوروک، - یولداشلاری دئدی.

- یاخشی، اوندا منه آلبئرتونون هاردا گیزلندیینی دئیین.

- بیلمیریک.

- عیبی یوخ، اونون یئرینی بیلن بیرینی تاپارام. اونسوز دا اول-آخیر علیمه کئچه‌جک.

لویجینین قاندیرماغا چالیش‌دیلار کی، بونو ائل‌مه‌یه ایختیاری یوخ‌دور، هارا یوللاسالار اورا گئتمه‌لی، یالنیز اورداکیلاری اؤلدورمه‌لی‌دیر. آلبئرتو حاقین‌دا ایسه هئچ کیمین معلوماتی یوخویدو.

«منه باخین»، - لویجی یئنه ایسرار ائل‌دی: «گؤروره‌م سیزه باش وئره‌نلری دانیشمالییام. بو آلبئرتو حقیقته‌ن اوغراش آدامدی، اونا قارشی دؤیوشمکله یاخشی ایش گؤرورسوز».

اما یولداشلاری اونو دینله‌مک ایسته‌مه‌دی. لویجی ده سؤز قانان آدام دئییلدی، دیرش‌دی: «عذر ایستییرم، هان‌سی دوشمنی اؤلدورمییم سیزین وئجینیزه اولمایا بیلر، اما آلبئرتونو یوخ، بیر باشقاسینی اؤلدورسه‌م، چوخ پیس اولارام».

یولداشلارینین صبری توکه‌ن‌دی. اونلاردان بیری لویجییه محاربه‌نین نه اولدوغونو، کئفی ایستدیی آدامی اؤلدورمک ایختیارینین اولمادیغینی اوزون-اوزون باشا سال‌دی.

لویجی اعتراض ائل‌دی: «اگر ائل‌دیرسه، اوندا من یوخام!»

«وارسان و اولاجاق‌سان!» – یولداشلاری اوستونه قیشقیردی. «ایر‌لی مارش! بیر-ایکی، بیر–ایکی...»، - بئله‌لیکله لویجینی محاربه‌یه یوللادیلار.

خوشبخت دئییل‌دی لویجی، آلبئرتویا یا دا عائله‌سین‌دن کیمه‌سه توش گلر دئیه قاباغینا چیخانی گولللییردی. اؤلدوردویو هر آداما گؤره اونا مئدال وئریردیلر، اما لویجی یئنه ده خوشبخت اولا بیلمیردی. «اگر آلبئرتونو اؤلدوره بیلمه‌سه‌م»، - دوشونوردو: «بو قدر آدامی بوش یئره اؤلدورموش اولاجام». اؤزونو پیس هیسس ائدیردی. هله ده اونا نؤوبنؤو مئداللار وئریردیلر – قیزیل، گوموش...

لویجی گؤتور-قوی ائدیردی: «بو گون بیر-ایکی‌سینی اؤلدورره‌م، صاباح بیر نئچه‌سینی، ان آخیردا سایلاری آزالار و بو اجلافین دا نؤوبه‌سی موطلق گلیب چاتار».

اما لویجی آلبئرتونو تاپا بیلممیش دوشمه‌ن تسلیم اولدو.

لویجی هئچ ندن او قدر اینسانی اؤلدوردویونه گؤره اؤزونو چوخ پیس هیسس ائدیردی. ایندی سوله دؤوروی‌دو. آلدیغی بوتون مئداللاری چانتاسینا دولدوروب دوشمه‌ن اؤلکه‌ده اؤل‌نلرین آرواد-اوشاغینا، یاخینلارینا پایلاییردی. بئله گونلرین بیرین‌ده آلبئرتویلا قارشیلاش‌دی. «هه، آخیر کی، علیمه کئچدین، گئج اولسون، گوج اولسون»، - دئییب آلبئرتونو اؤلدوردو. لویجینی درهال حبس ائتدیلر. جینایتی ثبوتا یئتیریل‌دی و اونو اعدام ائل‌دیلر...

محکمه‌ده ویجدانینین سسینی دینلدیینی دفعه‌لرله تکرار ائتمیش‌دی‌سه ده، هئچ کیم اونا اینانمامیش‌دی.