آنا صحیفه ادبیات |
کولت. آذ رامیز رؤوشنین "قدریی بیلمهدی بو آدام منیم" شعرینی تقدیم ائدیر:
بیلمیرم هایاندان تاپدی عؤمرومو،
بیر دلی آت کیمی چاپدی عؤمرومو،
داغلارا-داشلارا چیرپدی عؤمرومو،
قدریمی بیلمهدی بو آدام منیم، –
ایلاهی، آل منی بونون علیندن!
کاش منیم اؤمرومو بو یئر اوزونده
بیر اؤزگه آداما توش ائلییدین،
لاپ منی آدام یوخ، قوش ائلییدین،
لاپ بئله بیر قارا داش ائلییدین،
منی بو آداما سن نئجه قییدین، –
ایلاهی، آل منی بونون علیندن!
آل منی، وئر منی، اؤزگهلره وئر،
قیریق آینالارا، گوزگولره وئر،
بؤلونوم، یوز تیکه، مین تیکه اولوم،
بو آدام اوزومه باخا بیلمهسین.
منی آینالارین قیریقلاریندان
توپلایا بیلمهسین، ییغا بیلمهسین.
بؤلونسهم، دردیم ده بؤلوندو بلکه،
هر دردیم یوز تیکه، مین تیکه اولدو.
بیر دردیم قالمادی اؤزومدن یئکه،
بوتون دردلریمدن من یئکه اولدوم.
بو یئرین اوستونده، گؤیون آلتیندا
بؤلونسهم، هر تیکهم بیر یانا دوشسه،
هاچانسا، کئفینین خوش ساعتیندا،
ایلاهی، تزهدن یادینا دوشسهم،
تزهدن توپلاسان قیریقلاریمی،
سینیق اللریمی، آیاقلاریمی،
آغزیمی، بورنومو، قولاقلاریمی،
ایلاهی، تزهدن جالاسان منی،
دونیانین ان گؤزل گوزگوسو اوللام.
تزهدن دونیایا یوللاسان منی،
بو آدام اولمارام، اؤزگهسی اوللام، –
ایلاهی، آل منی بونون علیندن!..
تاریخ
2020.06.02 / 18:26
|
مولف
Axar.az
|