آنا صحیفه ادبیات |
کولت.آذ اوشاق ادبیاتی سئرییاسین دان مثنوی معنوی نین «اوولانمیش مارال» آدلی شعیرینی تقدیم ادیر:
تورکجه آزاد چئویری:سحرخیاوی
بیر اووچو تورونا سالدی بیر مارال
ائششک طوولهسینه آتدی حئیوانی
ائششک آرپا یئییب سونجوقلاییردی
مارالین طووله ده قارالدی قانی
یادینا دوشوردو یام-یاشیل مئشه
یئدیگی تر چمن،عطیرلی گوللر
یادینا دوشوردو رئیحان-بنووشه
اوخشاییردی جانین اسینتی-یئللر
یئدیگی غم ایدی،ایچدیگی آغی
گؤرموردو آرانی،گؤرموردو داغی
یادینا دوشوردو اؤزگور قاچدیغی
قوشلارلا یاریشی،یئرده اوچدوغو
ائششک امما ائله سامان یئییردی
اوز توتوب مارالا بئله دئییردی:
بیلیریک شازداسان شاه بالاسی سان
بینمز شازدالار آرپا-سامانی
ایندی ایش بئلهدیر قوناغیم اولدون
ائششگین سامانا گلیر گومانی
گَل یئه بو روزی دن شوکرونو یئتیر
ادبین ارکانین یئرینه گتیر
حزینجه اوزونه باخیب ائششگین
سؤیلهدی: آی یولداش باغیشلا منی
سن اوچون او سامان شّکّر کیمی دیر
من اوچون آمما بیل زَهَر کیمی دیر
حالیمی سوروشسان بالیق کیمی یم
دوشموشم دوپ-دورو سولاردان اوزاق
جان وئریب آغزیمی آچیب یومورام
بو طووله من اوچون اولوبدو دوزلاق
بو آرپا بو سامان قوی سنین اولسون
نه آرپا نه بئله ظولوم ایستیرم
منیم روحوم اوچور یاشیل مئشه ده
اؤزگورلوک اولماسا اؤلوم ایستیرم.
تاریخ
2020.06.04 / 12:49
|
مولف
Axar.az
|