کولت. آذ «سؤزون گونئیی» لاییحهسیندن خویلو یازیچی روقییه کبیرینین «ماواییل» حکایهسینی تقدیم ائدیر.
روقییه کبیری ۱۹۶۳-جو ایلده گونئی آذربایجانین خوی شهرینده دونیایا گلیب. اورتا مکتبی دوغولدوغو شهرده بیتیرمیشدیر. تبریز اونیوئرسیتئتینین تیبب فاکولتهسینده تحصیل آلیب. تحصیلینی بیتیردیکدن سونرا بیر مدت سالماس و تبریز خستخانالاریندا ایشلهییب. مؤلفین بدیعی یازیلاری شئیر، نسر، سسئناری و ترجومهلردن عبارتدیر. «تبریزین آل تبیم» (۲۰۱۰) شئیر توپلوسو، «ایچیمدهکی قیز» (۲۰۱۳)، «بو قاپی هئچ چالینمایاجاق» (۲۰۱۱) حکایهلر توپلوسو، «ائویم» (۲۰۱۳)، «یئردن اوجا تورپاق» (۲۰۱۴) رومانلاری نشر اولونوب. اثرلرینی تورکجه و فارسجا یازیر.
شنبه
هفتهنین ایلک گونودور. یئددی گوندور قاپینی اؤزومه قاپاتمیشام. بلکه ده بئلهسی هامیمیزا یاخشیدیر. اونلارین دؤورهسینه دولانمیرام. قوی منی گؤرمهدن، مندن اوزاق، باری بیر آز تمیز نفس چکسینلر.
پنجرهدن باخیرام. ایکینجی قاتداکی دؤشسوز قونشوموز علینده ایکی بربری، آپارتمانا ساری گلیر. اوغلوم کیتاب قولتوغوندا باخیشیمین دایرهسیندن اوزاقلاشیر. اوچونجو قاتین پنجرهسیندن باخاندا اونون بویو اولدوغوندان دا بیر آز قیسا گؤرونور. اریم ماشینی ایشلهدیر. موتورون عکس سداسی پنجرهنین لکهلی، توزلو شوشهسینه توخونوب، گئری قاییدیر. ماشین یوللاندیقجا قولاقلاریم دینجلیر.
شوشهنین لکهلری ائله بیل اللریمه باخیر. ایل بایرامینا آز قالیر. منسه کئفسیز، داماقسیزام، سانکی آت باسیب، داشقاسی اوستومدن اؤتوب. ایش گؤرمک هوهسی منده اؤلوب؛ یاشاماق کیمی، گولمک کیمی...
اریم، اوغلوم، قیزیم، اوچو ده بیرگه گولهنده، ائله بیلدیم تنبینین دیوارلاری اوستومه گلدی؛ قاچیب اوتاغا گیرمسیدیم، دیوارلارین آراسیندا ازیلردیم.
ایگیرمی گوندن سونرا ائوه دؤنموشدوم. اوغلوم گوله-گوله دئدی: «هر نیین همراهین گؤرموشدوک، ماوالدان سونرا». اریم اؤسکوردو. او ایسه اؤزونه آلمادان پیققیلداییب بیر ده دئدی «دوغرودان گؤر نه یاخینلیقلاری وار! موبیلئ؛ ماوال!..»
من ده اوزونه گولدوم. گولوشومده بیلمدیم نه ایدی پارتلادی. آغزیم زوققوتو دادی وئردی. گؤزلریمدن ائله بیل بولاق شیرلادی.
اریم گؤزونو آغارتدی. قیزیم، اوغلومون قولونو چیمدیکلهییب «جهنم اول» دئدی. اوغلوم دورتمه ایله قیزیمین بؤیروندن ووروب «نه دئییرم کی؟ زارافات ائلییرم داااا... هله شکیل چکیب، فاجئبووکا دا قویاجام...»
بؤیرومدهکی کیسهدن سس چیخدی. اوچو ده بیردن گولوشدولر. اؤزومون خبریم اولمادان یئل بوراخمیشدیم. قاچیب یاتاق اوتاغینا گیردیم. قاپینی قیفیللادیم.
پنجرهنی آچیرام. بایرام آیینین آغ یئلی پنجرهنین تول اؤرتویونو هاوادا اوینادیر. یاتاغیمین آغ ملفهلرینده گزیشیر. بیلیرم! یئل، نه قدر چاغلاییب، چیرپینسا دا، ائوده بوران جمدک قوخوسونو اوتاقدان آپاراسی دئییل.
اؤز ایچیمده، اؤزلویومده داریخیرام. داریخدیقدا بارماقلاریم یازماغا جان آتیر. بیر آیدان آرتیقدیر بیر کلمه اولسون بئله یازمامیشام. سانکی دوشونجهمین قاپیسی هؤرولوب. توزلو شوشهنین اوزرینده یازی یازماغا هوسلنیرم. بارماغیم شوشهنین اوستونده اویناییر. شوشهنین توزوندا یازینین ایزی قالیر: «ماواییل»
بازار
خستخانایا گئتدییم هفتهنین ایکینجی گونویدو. گئدنده سئوینیردیم کی، قانسیزلیقدان، خوشکیتدن، عذابدان قورتاراجاغام. دئییردیم بس سود گؤلونه دوشهجهیهم. دوشدوم ده... اؤزو ده... اوسته.... اوسته دایانا بیلمدیم، ساغ بؤیروم اوسته دوشدوم.
جرراه هکیم دئدی: «سیمیتدن دووار اولسایدی، بورغو (باجا دلمک اوچون آلت – رئد) ایله بیر ایش گؤرمک اولاردی، اما سنین باغیرساغینین یولو ائله دولوب، تیخانمیشدی کی، دولایی یول آچدیق!»
ایندی ایسه دولایی یول بؤیرومدن باش آچیب. جمدک قوخوسو هر یعنیمی بورویوب. پالتارلاریمی، اوست-باشیمی، جانیمی، ساچلاریمدان بئله جمدک قوخوسو گلیر. گونده نئچه دفعه پنجرهنی آچیرام. اتیر-اودکولون دا قانیق وئرمیر. گئجهلر یاتا بیلمیرم. ساغ بؤیروم اوسته دوشسهم دئییرم بس بؤیرومدن قوپوب جالاناجاق. قورخومدان یاتاغیما پلاستیک سالمیشام. خستخانادان دؤنهن گون، پلاستیکین خیشیلتیسیندان نه اؤزوم یاتا بیلدیم، نه اریم. بیلمدیم خیشیلتیدان ایدی، یوخسا پیس قوخودان، اریم گئجه یاریسی سسسیز-سمیرسیز یورغان یاستیغین گؤتوروب تنبییه گئتدی. او گئدن قارداشدی کی، گئدیب.
دئدیم «اوتاغیما گلمه!» آنجاق ایکی آیاغین بیر باشماغا دورتدو کی دورتدو. «قول-بویون اولاجاغیق بو گئجه» دئدی. نئجه ده قول-بویون اولدوق!.. همیشکی کیمی دینمز-سؤیلمز سویوقدان بوزا دؤنموش آیاقلاریمی قیزدیردی. قیزیشما آیاقلاریمدان بوتون جانیما یاییلدی. علی اویلوغومدا (آیاغین دیزدن یوخاری حیسهسی. بود. – رئد) دولاشاندا، جانیم گیزیلدهدی. نئجه ده اورییمی ایسیتمیشدی. اوجاق کیمی ایستی اللری!.. باغرینا باسیب، اوزومدن اؤپنده، شر داغارجیغی - بو شیشمیش کیسه ایکیمیزین آرامیزدا قالدی. دیسکینیب بیردن گئری چکیلدی. آغزین آچدی بیر سؤز دئسین؛ دینمهدی. اونا، وحشیجهسینه ساریلماغیم گلدی. اونا دال چئویردیم. هیرسیمدن دوداقلاریمی گمیردیم.
یئنه پلاستیکین خیشیلتیسی بئینیمه دوشدو. بئلیم، کورکلریم قیزیشدی. علی یاواشجا گئجلییمین یاخاسیندان سینهمین آلتینداکی کیسهیه دیهنده، علینی قئیز ایله ائله چکدی کی، یاخاما توخوندو. سانکی ایرنج بیر جاناوارا توخونموشدو.
یئنه گؤزلریمدن بولاق جوشدو. بیر داها پلاستیکین خیشیلتیسی گلدیکده، یاستیق-یورغان علینده، جین کیمی اوتاقدان ائشییه چیخدی. ایکینجی قاتداکی دؤشسوز قونشوموز یادیما دوشدو. اللریمی سینهمده داراقلادیم. گؤزومون یاشی دیوارداکی کوبلئن تابلویا باخا-باخا قورودو. پنجرهدن سیزان ایشیغین آلتیندا، منه ائله گلیر کی، قیزیلتایاقلارین (بیر نؤو بؤیوک سو قوشو. فلامینقو قوشو – رئد) آیاقلاری سویون ایچینده دئییل، لؤهمه باتاقلیقدادی سانکی. بو تابلونو، ایللر اؤنجه ایلمه-ایلمه اؤز علیمله آرغامیشدیم (توخوماق، تیکمک – رئد).
بازار ائرتهسی
سحر یئمیی اوتاغین بیر بوجاغیندا مجمییدهدیر؛ آنجاق من اونا ال ده وورمامیشام. یئمکدن قورخورام. بوغازیمدان هوپدوردومامیش بؤیرومدن چیخیر.
ائوه دؤندویوم گون قیزیم دسترخانی گتیریب، اوتاغیمدا آچدی. «سن گلمهسهن بیز گلریک» دئدی. ایکی قاشیق یئممیش بؤیرومدن کیسهنین ایچینه دوشوب، پاققیلدادی.
اوغلوم، اؤزونو ساخلایا بیلمهییب، پیققیلدادی. آغزینداکینی اودمامیش - «واللاه، لاپ ائله واختیدی، ایندی شکیل چکیب فاجئبووکدا یئرلشدیرسهم بیرینجی چیخار!»
باشینی آشاغی تیکهن اریمین آغزی ترپهنیردی. قاشیغی-خرکهن ماشینلارینا تورپاق یوکلهیهن میکانیکی قازما ایدی سانکی، آغزینا دولو آپاریب، بوش قایتاریردی. قیزیم-دسترخان باشیندان، دوروب علی آغزیندا باییرا قاچدی.
یئریمدن قالخیرام. سوکوت ائوی بورویوب. هر کس اؤز دوهسین گزر دئمیشلر؛ هامی اؤز ایشینه مشغولدور. پنجرهدن باییرا باخیرام. دؤشسوز قونشوموز بیر قوجاق گؤی-گؤیرتی، تروزی گتیریر. قوجاغی، دیکرریکدیر (تروزلرین اکیلدیی یئر – رئد) سانکی.
آپارتمانین قارشیسینداکی پارکدا بایرام یئلی قارلاری اریدیب. پنجرهدن باخاندا سارالمیش چیمهن آغ-یاشیل رنگه چالیر. بو گون-صاباح آغاجلارین جوجردیینی گؤرهجهیهم. بیردن-بیره بؤیرومدن گؤیرهن باغیرساق کیمی. دؤشسوز قونشوموزون تام ترسینه. منیم بؤیرومدن گؤیرهن باغیرساق، اونون کسیک دؤشلرینین یارا ایزلری هئچ ده آغلیمدان چیخمیر.
آسفالت اوزرینده اریمیش قار ایزی، پینتی قادینلارین شورا قویموش مانتوسونو یادیما سالیر.
ائوده کیمسه اولمایاندا سرگردان روح کیمی هر یئری گزیرم. اریمین یورغان-یاستیغی تنبیده دیوار دیبینده بوکولو قالیب. اوغلومون تومانی مئبئلین اوستوندهدیر.
قاپیدان اییلیب اوشاقلارین اوتاغینا باخیرام. اوتاغین اورتاسینا داغیلان کیتابلار، قیریلمیش قوشوندور سانکی اوتاقدا یئرده قالیب.
اوغلومون تومانین مئبئلین اوستوندن گؤتوروب، اوشاقلارین اوتاغینا ساری گئدیرم. یارییولدان قاییدیرام. گرک اونلارین پال-پالتارلارینا ال وورماییم. یوخسا اونلار چیمچیشرلر.
آشپازخانامدا هر شئیین یئری دییشیک دوشوب. قابلامالار، قاشیق-چنگللرین باشلاری آشاغی، سانکی مندن کوسموشلر. اوجاغین قیراغینداکی یاغقابی تیکان کولودور سانکی، گؤزومه باتیر.
ساموواری یوخلاییرام. هله جانی ایستیدیر. مجمییده چای لکهلری وار. ایستکانلارین دیبینده چای چؤکونتوسو قورویوب قالیب. دؤزه بیلمیرم، بوراسی منیم آشپازخانام. هر شئی یئرلی-یئرینده اولمالی. بونو قیزیما دئمهلییهم. هله اؤلممیشهم کی!.. نیه قاب-قاجاغین یئری دییشیک دوشوب!!!
چرشنبه آخشامی
نه آرخاما باخا بیلیرم، نه اؤنومو آیدین گؤرورهم. آرادا قالمیشام. دئییرلر «یئتیمه وای-وای دئیهن چوخ اولار، چؤرک وئرهن آز». خستخانادان گلدییم گون، تئلئفونوموز سوسموردو، زنگ-زنگ اوسته گلیردی؛ اریمین - تزه سیقارئتی، سؤنهن سیقارئتین کؤتویو ایله آلیشدیردیغی کیمی!
بو گون نه قدر پنجره قاباغیندا دوردوم، دؤشسوز قونشودان خبر اولمادی کی اولمادی. تئلئفونوم دا سوسوب. ایکی گوندور کی، اریم ده ایش یئریندن زنگ آچیب اهوالیمی سوروشمور. آتیلمیش، اونودولموشلار کیمییهم.
گوزگو قاباغیندایام. آرخادا کیتابخانامدا سیرایلا دوزولهن کیتابلار وار. گئدیب کیتابلارین بیرینی آچیرام. «اونلار اؤلمکله مشغولدورلار» کیتابین جیلدینده یازیلیب. «آن سئکستونون» اؤلومله ایلگیلی شئیر کیتابیدی. داریخیرام. کیتابی اوخومامیش یئرینه قایتاریرام. نه ائتدییمی بیلمیرم. ایتییم ایتیب سانکی!..
یئنه گوزگو قاباغیندا دورورام. ساچلاریم کیلکلنیب، پیر-پیرتلاشیقدیر. گؤزلریم چوخورا باتیب. دوداقلاریم بوزاریب. گوزگونون قاباغیندا سیرایلا دوزولموش دوداق بویاسینین قاپاغینی بیرببیر آچیب باخیرام. گؤز سورمه، بزک کیفیمین یاریاچیق زیپی ائشیکده قالیب. علیمی اوزومه چکیرم. جیزلیق کیمیدیر. کرئمی اووجوما سیخیب، اوزومه یاخیرام، بیر آز سیغاللاییرام. علیمی یومشانمیش یاناغیما چکیرم. چهرایی دوداق بویاسی دوداقلاریمدا گزیشیر. داراق، ساچلاریمین کیلکهسینی آچیر. گوزگوده قادینا اوخشاییرام، بیر آز دا سورمهلهنیم دئیه، قارا سورمهنی گؤزومه چکرکهن باغیرساغیم قفیلدن کیسهنین ایچینه بوشالیر. بیر آنلیق اولسا دا بئله بو سووخا کیسهنی اونوتموشدوم. سورمهنی گوزگویه چیرپیرام. سورمه گوزگوده، اینه بویدا قارا ایز بوراخیر. دوداقلاریمداکی بویانی علیمله سیلیرم. دوداق بویاسی سیر-سیفتیمه، چنهمه یاییلیر. ساچلاریمی علیمله پیرتلاشدیریرام. گوزگودن، سیرک تلخیینه بنزهیهن بیر قادین منه باخیر...
چرشنبه
اودلو-اودونلو گونلریم اؤتوب. اوجاقدا قالان کؤزلردن بیر قور بئله چیرتلامیر. قولوم سوستالیب. یاتاغیمدان قالخماغا هوسیم یوخدور. هر آی باشی اولدوغوم کیمی، جانیم قیزدیرمالی، دؤشلریم داش کیمیدیر.
توخوملوقلاریمین آکتیو زامانیدیر. بو قیزدیرما؛ جینسی هورمونلاریمین یوکسلمهسیندندیر یقین، بیلیرم. دؤشسوز قونشوموزون دوشونجهسی منی راحت بوراخمیر. اونون هورمونلارینین یوکسلمه زامانیندا دؤشلرینده قالان یارا ایزلرینی دوشونورهم. گؤرهسهن او، آیباشی اولارکهن نه حالا دوشور؟ دؤشلری گیزیلدییرمی؟! دریسیمی بوزوشور؟! بلکه ده یارالارینین یئری گؤینییر!..
آلتیمداکی پلاستیکین خیشیلتیسی یالقیزلیغیمی اوزومه چکیر سانکی. گؤزوم، تاوانین گج ایشلهمهلرینده قالیب. دیوارین چهرایی بویاسیندا، گلینلرین دوماغ چلنگینه اوخشاییر بو قابارتمالار.
تنبیدن گلن تئلئویزییا سسی، آری ویزیلتیسیدیر سانکی، قولاغیمدا سسلنیر. بلکه ده اریم، ماجرالی و چوخ هیهجانلی بیر فیلم ایزلییر. آرامیزدا بیر قاپیلیق مسافه وار. بؤیرومدهکی کولوستومی کیسه سایهسینده قاپی، سانکی هابیل دیواریدیر، من ده بیر فیلیسطینلی قادینام.
اگر پلاستیکین خیشیلتیسی بیر ده بؤیرومدهکی کیسه اولماسایدی، دیوارین آرخاسیندا تک باشیما قیزدیرما ایچینده یانمازدیم.
قاپینین کیلیدینی بورورام. اوست-اوسته گئیدییم پالتارلاری سویونورام. چیل-چیلپاق گوزگولنیرم. کئشکه دؤشسوز قادین هئچ بیر زامان گوزگو قاباغیندا اؤز چیلپاق گؤودهسینه باخماسین، دئییرم. بؤیرومدهکی کیسه، هلهلیک بومبوشدور. یاواشجا یورغانیمین آلتینا سوزولورهم. یورغانین سرینلیگی جانیمین قیزدیرماسینی آلیر. گؤزلریمی یومورام.
جومعه آخشامی
قولومو یورغانین آلتیندان چیخاریرام. اوشویورهم. یورغانی قاوزایاندا، سویوق جانیما ایشلییر. هله ایندی یادیما دوشور، گئجه چیل-چیلپاق یورغانین آلتینا سویروشموشدوم. بیر شئی بؤیرومده آغیرلیق ائدیر سانکی. کیسهم یادیما دوشور. دوروب دییشمهلییهم. گوزگونون قاباغیندان کئچهنده قارنیمین جیزگیلرینه ساری ساللانان کولوستومی کیسهیه باخیرام. ندنسه ننهم یادیما دوشور. هارداسا بیر پینتی اوشاق گؤرسیدی «پوخ موتالیدیر» (پئندیر و یاغ ساخلاماق اوچون دریدن حاضرلانان تولوق – رئد) دئیردی. دوغرودان دا ائله بؤیرومدهکی کیسه ایله پوخ موتالینا دؤنموشهم. بیر آن گوزگو قاباغیندا، چیرکین گؤودهلی هیکل کیمی قورویوب قالیرام. واااای! کیسهنین ایچیندهکیلر ندی؟.. بونلار هاردان چیخدی؟.. یوخسا قارنیم قوردلانیب؟.. گؤر نه کیسهنین ایچینده قیمیلداییرلار!..
اللریم اسیر. نه ائیلییم؟ کیمه دئییم؟.. اریمه زنگ آچیم؟ اوندا هئچ ائوه دولانماز! یوخسا قیزیما؟.. یووو... ائله اولورسا، تئلئفون دالیسیندا کئچینر. بلکه اوغلوم!.. او - هارادا اولسا اؤزونو یئتیرر فاجئبووک صحیفهسینه سورپریز بیر شکیل اوچون!.. قاچیم جرراه هکیمین یانینا...
قورخورام کیسهیه باخیم. اورییم بولانیر. آخی بیردن بیره منه نه اولدو؟ بو نارینجیلار ندی؟ شاما سوپ ایچمیشدیم. اولمایا یئر کؤکو!.. یوخسا قوردا بنزهیهنلر ده سوپون اریشتهسی... آاااخ! قورد اولسایدی اؤلردیم هااا. بیرجه ائله قورد قویماغیم قالمیشدی. نه یاخشی ائوده هئچ کیم یوخدور. یوخسا بو حالی گؤرهن اوغلوم-قیزیم عؤمور بویو بیر قاشیق دا بئله سوپ ایچمزدیلر.
اؤزومدن چیمچیشیرم، سویا جومورام. بو گون چیلهیهندن تؤکولهن سو، فرقلیدیر دئیهسهن. هر گون دوش آلدیغیم سودان دییشیکدیر. سو ائله مئهریبان-مئهریبان آخیر، ائله بیل نازلانا-نازلانا بدهنیمده اویناییر. دامجیلاری مونجوق-مونجوق بدهنیمدن اطرافا سیچراییر. سرامیکین اوستونده سو یولونا آخیر.
جانیمی لیفلییرم. سابونلو علیم بدهنیمده سویروشور. بارماغیمی باغیرساغیمین باشینا وورورام. اووووووف... آجیشیر. سابونلی علیمی باغیرساغیمدان یوخاری چکیرم. دؤشسوز قونشوموز آغلیمدان چیخمیر....
قتفهنی جانیما بورویورهم. گونشین ایشیغی اوتاغیمین اورتاسینا، یاتاغیمین اوستونه دوشوب. تول اؤرتویون دالیسیندان باخیرام. دؤشسوز قونشو قوجاغینداکی دیبچکده، آغ-آپپاق تون چیچیی (گئجهلر اتیر ساچان گول – رئد) آپارتمانا ساری گلیر....
جومعه گونو
هفتهنین سون گونودور. هر یئر باغلی، هر شئی تتیل. کئشکه حیاتین دا تتیلی اولاردی. آلتی گون یاشاییب، یئددینجی گون اؤلوب، سونرادان دیریلردیک. آلتی گوندور اؤلو کیمییهم. بو جمدک قوخولو، کیسهلی حیاتیمدا، یالنیز یازیلاریملا یاشامیشام.
یئریمدن قالخیرام. گوزگوده اؤزومه باخیرام. قاپینی یاواشجا آچیرام. اریم تنبیده یئتیم اوشاقلار کیمی بالینجینی قوجاقلاییب، خورولداییر. اوشاقلارین اوتاغیندان ایچری گیرمیرم. قاپیدان باخیرام. یوخودا ائله مسوم گؤرونورلر کی، اونلاری اؤپمییم گلیر. هاماما گیرمک ایستییرم. یئرینده کیسهم لاققالاق لاققیلداییر. اوغلوم دوز دئییر، بلکه ده کیسهمدن چکدیی شکلی فاجئبووکا قویسا، بیرینجی چیخدی...
هامامدان چیخمیشام. پنجرهدن آپارتمانین اؤنوندهکی پارکا باخیرام. گئجه یاغان یاغیشدان آسفالت دا دینج، توختاق گؤرونور. ساچلاریمین سویو چیینلریمه دامجیلاییر. دؤشسوز قادین، علینده ایکی بربری آپارتمانا ساری گلیر. پنجرهنی آچیرام. توزلو شوشهده بارماغیملا یازدیغیم «ماواییل» کلمهسی هله ده دورور. علیمی شوشهیه چکیرم.
دؤشسوز قادین گؤزومدن ایتنه قدر اونو ایزلییرم. بو گئجهدن اوتاغیم تون چیچیینین اتری ایله دولاجاق دئیه دوشونورهم....
ایسفند - ۱۳۹۰
