کولت. آذ داود پیرعلیلونین " اؤلوب دیریلن گونوم" آدلی حکایه‌سینین بیرینجی بؤلومونو تقدیم ائدیر:

اونبیر یاشیندا بیر اوشاق ایدیم، ائوجیک- ائوجیک اوینامالی، آت یئرینه آغاج مینیب قووالامالی واختیم ایدی. آغزیمدان سوت قوخوسو کسیلمه میشدی. ائوین ایلک اوشاغی من ایدیم.کندده یاشاییردیق، نئچه باش قویون- قوزو واریمیزایدی. قویونلارا آتام چوبان توتموشدو، قوزولاری آما من اوتاراردیم. بیرگون سحر تئزدن گون چیخمامیشدان، آنام باشیمی تومارلایا- تومارلایا "بالام دی، نازیم دی، ائویم- ائشیییم دی" دئیه- دئیه شیرین یوخودان اویالتدی، قوزولاری داغا آپاریب، اوتارام. من ده دونه نین یورقونویدوم، یورقون- یورقون یوخودان دوروب،گؤزلریمی اووا- اووا، دئیینه- دئیینه، آخیرا ساری گئدیب، قوزو لاری چیخاردیب، داغا ساری هایلادیم. آجیغیمدان آنام قویدوغو چای- چؤره‌یی ده آپارمادیم، گیزلی جه جان تایینی دوواردان حیاطا تولازلاییب، یولا دوشدوم. قوزو لاری یاواش- یاواش، اوتارا- اوتارا، گون اورتانین ایستی سینده داغ داغاندا بولاغین باشینا یئتیشب، قوزو لار اوزاق‌دان بولاغین شار ها شار سسینی ائشیدیب، اوینایا- اوینایا سویا تؤکولدولر.

سیرا ایله بولاغین سرین- دورو سویوندان ایچیب، هردن ده اؤز شکیللرینی سودا گؤروب، اورکوردولر. من ده بولاغین لاپ گؤزه سینده دیزه چؤکوب، اییلیب او سرین سودان ایچرکن، گؤزوم اؤزومه دوشوب، بیرآز آغزیمی اَییب اؤز شکلیم ایله اوشاق‌لیق عالمینده ظارافات ائله دیم. قوزو لار سودان دویوب بیر بؤیوک داشین کؤلگه سینه ساری دوزوم- دوزوم گئدیب یاتدیلار. قوزو لار توخ، آما من آجیمدان گؤز لریم پرده لنیر. هله ...

او حال‌دا آیری چوبان «میرموسی» آدلی بیر کیشی کی، کندین سیّدی ایدی، سوروسون سویا تؤکوب، سوواریب مندن بیر آز یوخاریدا سورونو یاتیردیب، اؤزوده بولاغین باشینا گلیب، اوردا قومقوما چایی قویماق اوچون کول- کوس ییغیب، اود یاندیردی. قومقوما لاری اودا قویوب بیر سئیین گؤتوروب سورویه ساری یوللانیب بیر نئچه قویون ساغیب سئیینی سوت له دولدوروب، یاندیردیغی اودون باشینا گلیب سوتو ده کؤزونون اوستونه قویوب قایناسین. قومقوما لاردا کی، پاققا پاق اؤزلرین اؤلدورورلر. قومقوما¬لارین بیرینه بیر سالیم چای آتیب، بیرآز یوخاریلیغا چیخیب، داغین اته‌ییندن ده بیر سالیم کهلیک اوتو دریب، اونو دا قومقومایا سالدی. سوت ده کی، او حالدا داشیب، اوزلنیب، یئره تؤکولنده سئیینی گؤتوردو. چای- چؤره‌یین حاضیرلاییب، سؤوود آغاجی‌نین آلتینا آپاریب، اونون کؤلگه سینده شالین آچیب قاییتدی بولاغین باشینا، اَل- اوزونو یویوب، یئنه ده سؤوودون گؤلگه سینه قاییتدی. او سؤوودو ده بؤیوک بابام یوز نئچه ایل اولاردی کی، اوردا اکمیشدی. چوبان لار سویا گلنده، اونون کؤلگه سینده یورقونلوق لارینی گئدرَردیلر. سیّد بیردن منی سس له‌دی
-آی بالا گَل سن ده بیر چای ایچ! هم ده سوت چوخ ساغیب پیشیرمیشم، بیرلیکده یئییک.

من اوتانیب، ساغول دئییب، آشاغییا ساری چکیلدیم. داغ داغان بیزیم باغین آدی‌دیر. هر دؤرد چئوره سی داغ دیر. آراسی بیر گؤزل باغ دیر، بابامین آتاسیندان یادیگار و ارث قالیب‌دیر. بابامین آتاسی‌نین دا آدینی آتاما قویوبلار، اؤزونوده مین دوققوز یوز اون بئشینجی ایلده ائرمنی لر شهادته یئتیریبلر ....

آردی وار ...