آلتینجی بؤلوم

- سن بونو اونلارا دئمیسن؟

آتام منیم باشیمی گینه ده باغیرینا باسدی. سویوق، بوزلامیش ال‌لری ایله منیم کوره‌ییمی اوووشدوردو. بیر آز بئله قالدی. کیمسه دینمه‌دی! نه زامان کئچدی بیلمیرم، آما چوخ تئز اولدو. گودوکچو دئدی:

- واخت قوتاردی٬ آیریلین.

- سکگیز ایل دوستاق کسیب‌لر، آما چوخ تئز کئچر، گئدر!

نیگران اولما، آتام بونلاری آیریلا ـ آیریلا دئدی.

- قاپی باغلانیردی، سوروشدوم آتا، آنام نئجه‌دیر؟

جاواب گلمه‌دی، من بئله بیلدیم آتام سسیمی ائشیتمه‌دی. آما قالین شوشه‌لرین دالیسیندان گؤردوم اونون ایکی گؤزوندن شیدیرغان یاش گلدی. فیکیره گئتدیم؛ آتام هئچ واخت آغلامازی، نه اولوب ایندی بئله آغلادی؟

بیر ایلدن بیر آز کئچمیشدی کی، اوغرو یولداشیمیز بوراخیلدی. ایندی من اونون یاتاق یئرینده یاتاردیم. گئجه‌لرچوخ آیدین یوخ، آما بیر آز آدام اؤلدورن یولداشیمی گؤره بیلردیم. او یوخودا قوزو کیمین نارین ـ نارین نفس چکردی. ائله بیلردیم آغیمتیل چپیشیمیزین یانیندایام. هامی گئجه‌لر من چوخ گئج یوخلاردیم، بیلمیرم نه‌دن؟ گؤزلریمین یوخوسو قاچمیشدی. اویاق اولان زامانلار همیشه گؤزومو او یولداشیمین اوزونه تیکردیم. چوخ واخت‌لار گؤرموشدوم اونون یوخلامامیش ایکی یاناغی ایسلاناردی. ایندی بیلمیشدیم ایلک گئجه اونون اوزوندن ایلدیریم کیمین آخان ایشیلتی گؤز یاشی‌ ایمیش! سونرالار بیلمیرم هاردان بیلدی من اونون گؤز یاشلارینی گؤرورم، داها یاتاندا اوست اؤرتوکونو اوزونه چکیب یاتاردی. دوساقدا گونلر چوخ آغیر گلیب- گئدیرلر. آما کئشگه، هئچ دوستاقدا اولانین گئجه‌سی اولماسین. گئجه بیر قایاداش کیمین دوشور آدامین اوره‌یینه، نفس چکیرسن بوغازیندادیر، آغلایرسان گؤزوندادیر، یوخولویورسان یوخوندادیر.

دوز بیر آی اوغرو یولداشمیزدان سونرا او بیری ایکی یولداشلاریمیزدا بوراخیلدیلار. من قالدیم، آدام اؤلدورن یولداشیم. بیز ایکی یولداش‌ایدیق آما گینه ده اوردا بیریسی بیزه یاخین گله‌بیلمزدی! من ایندی بیلمیشدیم کی بیزیم حؤجره‌ده یارانان آرخایین‌لیغین سببی آدام اؤلدورن یولداشیمیز دیر.

- منده چوخ تئز گئده‌جه‌یم، یولداشیم دئدی.

دیسگیندیم آما سئویندیم، هاپبیلدیم گؤیه! واخت‌سیز اؤلوم کیمین تئز او بییغ‌لی، یوغون کیشی‌لر یادیما گلدی بیر آز کدرلندیم. یولداشیم بیلدی. الین قویدو الیمین اوستونه باخدی گؤزلریمه، من ائله بیلدیم دونیانین گوجونو منه وئردیلر. قورخو بیر یئل قووان کیمین منیم اوره‌ییمدن چیخیب قاچدی.

- سندن بوراخیلاجاق؟

- هن.

- هاردان بیلدون؟

- پاخیل‌لیغین گلیر. اوشاقلیق کیمین ایکیمیزده گؤزلریمیزدن یاش آخینجاق گولدوک!

- ایگیرمی بئش گون قالیر منیمیاشیم اون سکگیز اولسون.

من دوداق‌لاریمی بوزدوم، بیلمه‌دیم یانی نمنه؟ اون سکگیز یاش اولماغین دوستاقدان بوراخیلیشماغا نه سببی واردیر؟

ایگیرمی بئش گونده گلدی- گئتدی، آما چوخ تئز! بیر گون سحر آذان واختی سسلنجه‌دن اونون آدینی چاغیرمادیلار، ایکی گودوکچو گلدیلر. یولداشیمی آپارسینلار. دوستاق سوسقون اولموشدو، بیر کیمسه‌دن جینقیرتیدا چیخمیردی. من چوخ گیجلمیشدیم، آخی بو نه‌جور بوراخیلیشدی کی، هئچ کیم سئوینمیر؟ هئچ کیم هورا چکمیر؟ اؤپوشدوک، قول‌لاریمیزی سالدیق بیر- بیریمیزین بوینوموزا. یولداشیم گیزلین بیر شئی قویدو منیم اوجوما. او یولا دوشدو. آغیر، یانقیر یول گئدیردی. هئچ دؤنوب دالیسینادا باخمیردی. آز مندن اوزاقلانمیشدی، منیم قیچلاریم باشلامیشدیلار اسسینلر. گؤزلریم دولموشدو آما هئچ بیر داملا یاش دا اونلاردان آخمیردی. اوره‌ییم آز قالیردی آغزیما گلسین. یولداشیم دوستاقدا کی، سون دؤنومو دؤننده، باشینی چئویردی منه ساری، دوداقلاریندا گؤزلری کیمین بیر نارین گولوش وار ایدی.

- ماحمود بی، کیمسه جیزیغیندان چیخسا مندن سلام یئتیر. چوخ اوجا سسده دئدی، دؤنومده گؤزدن ایتدی!

سلام یئتیرمک بیزیم آرامیزدا بیر گیزگه ایدی. من قالدیم، بیر یئکه حؤجره، اوجا دووارلار، دمیر قاپی! قاپی‌نین جیریغیندان باخیردیم گودوکچولرده چوخ آغیر آددیم آتیردیلار. اوره‌ییم دولموشدو. ایسته‌ییردیم شیدیرغی آغلایام. الیمی گتیردیم گؤزلریمه ساری، ایسته‌میردیم گؤز یاشلاریمی او اوزون بییغ‌لی شورگؤز کیشی‌لر گؤرسونلر. اووجومدا بیر ایتمیل‌لیک (تیزی) وار ایدی.

گله‌جک گون هامیدان اؤنجه حؤجره‌دن هاوا آلماغا چیخدیم. ایتمیل‌لیک اووجومدا حاضیر ایدیم! هر کیم قاباغا گلسه باش دامارین وورام، بیریسی منه یاخین گلمه‌دی. یانی هئچ کیمده حؤوصله یوخودور.

گونلر کئچیردی. آغیر ـ یونکول، آجی ـ شیرین. من یالنیز قالمیشدیم. بئله یالنیزلیق‌لار دوستاغین گئجه‌لری کیمین‌دیر، باشلایارلار آدامین ایچین سؤکسونلر. آدامی ایچریدن داغیت‌سینلار.

چوخ واخت کئچمه‌میشدی اژدر عمی، بیرده بیر یاد آدام منیم حؤجره‌مه گلدیلر. بونلار یاشلی، قوجا کیشی‌دیرلر. او یاد آدام دوداق آلتیندا همیشه میزیلداردی. اونون میزیلتی‌سی سرین سو کیمین اوره‌ییمه یاتار دی.

"قازامات ایستی‌دیر یاتا بیلمیرم

اؤز آنا یوردومو آتا بیلمیرم

غیرتین قوربانی آی قوچاق نبی

دور قفس قاپیسین بیر آچاق نبی،

آی قاچاق نبی

منیم بو گونومده گله‌سن نبی

قازامات دیبینی دله‌سن نبی

دله‌سن نبی ..."

آنجاق، گونلر یاخشی، پیس کئچیب گئدیردیلر، ایندی منده بئله بیلیردیم قورخولو اولموشام. اوزون بییغ‌لاریم آغزیمی توتموشدولار. دیش‌لریمین ساریسیندان اؤزومده قورخوردوم، بارماق‌لاریم قوخویوردو، اونلار اژدر عمی‌نین پاپیریزلری کیمین قوخویوردولار.

قیش‌ین بوزلاق واختی، گونون اورتاجاغی، آدیمی چاغیردیلار. گلدیم، چامادانیمی، ایچینده بیر کؤینک، ایکی جانلیق، بیر شالوار منه وئردیلر.آما اونلار ایندی منیم اینیمه چوخ بالاجا اولموشدولار. آغیر، دمیر قاپی آچیلدی، بوراخیلدیم.

گلنده «هاچا» یولدان کئچمه‌دیم، یانلیز باشی آشاغا کوسولو آدام کیمین، نارین آددیم آتا ـ آتا اؤز یولومو اوزاتدیم، او اوزاق، ایری ـ بویروق یول‌لاردان ائومیزه چاتدیم، سریه خالا قاپیدا منی گؤردو، گؤزلریمدن تانیدی، قول‌لارینی آچدی آنام کیمین منی باغیرنا باسدی، آغلایا ـ آغلایا دئدی:

- بالا، گلدین؟

کلید گتیردی قاپیمیزی آچدی. حیطمیزده گیلانار آغاج‌لاری قوروموشدو. سئرچه‌لر یوخودولار، آنامین تورکمن گوللو شالی قورو گیلانار آغاجی‌نین بوداغیندا بوزاراق قالمیشدی، آما قوخوسو بیتمه‌میشدی.

خرابا پیلله‌لرده اوتوردوم، یادیما گلدی آتام دئیردی:

- کبرا خانیم، من سنسیز چوخ یاشامارام.

یئل اسیردی، سویوق بییغ‌لاریمدا گؤز یاشلاریمی دوندورموشدو. آما هئچ اوشوموردوم، اووجومدا کی، ایتمیل‌لیک الیمین دریسینی آغریدیردی.