تورکجه‌یه چئویرن: ویدا حشمتی

نئچه هفته یدی قیزین گؤزونه یوخو گیرمه می‌شدی. هامی بئله بیلیردی دلی اولوب. قیوریلیب،آچیلیردی، دووارلاری جیرماقلاییردی. کیمسه نین گؤروشونه ایزین وئرمه ییردی. آتاسی نی بئله گؤرمک ایسته‌مه‌ییردی. حکیملره اونو معاینه ائتمه‌لرینه ایزین وئرمه‌ییردی. پادشاه نئینه‌ییم، نئجه ائله‌ییمه قالمیشدی.

بیر گون قوجا بیر حکیم تاپیلیب، دئدی:

من شه‌زاده‌نی درمان ائده بیله‌رم. ایزین وئرین اوزاقدان اونو گؤروم‌.

پادشاه امر ائله‌دی قوجا حکیمی قیزین اوتاغینا آپاردیلار‌‌. حکیم اوزاقدا اوتوروب، اوزون-اوزون قیزا باخدی. سونرا دئدی بونون علاجی محبت افسانه سی‌دیر. گرک توختاماغی اوچون بیر نفر باشی‌نین اوستونده محبت افسانه سی‌نی اوخویا.

پادشاه امر ائله‌دی جارچی‌لار شهرین دؤرد بوجاغیندا، جار چکسینلر. هرکس محبت افسانه سینی بیلیرسه پادشاه اونون باشیندان مال-دؤولت یاغدیراجاق.

تاماهکارلارین چوخو یالاندان محبت افسانه‌سینی بیلیریک دئدیلر. آما اللریندن بیر ایش گلمه‌یینجه اونلاری جللادین الینه وئردیلر.
داها کیمسه نین الیندن بیر ایش گلمه‌ییردی.
گئنه او قوجا حکیم گلیب شاها دئدی:

ائی پادیشاه سیزین بو شهر نئجه شهردیر؟

کیمسه محبت افسانه سی‌نی بیلمیر! اوزاقلاردا بیر داغ وار .اوداغدا بیر گنج چوبان وار. او محبت افسانه‌سی‌نی بیلیر.

گئدیب اونو گتیرمه‌لی‌سیز. آما بونو بیلین، اؤزونوز دالیسیجا گئتمه‌سز، او آصلا داغدان آشاغا ائنمز.

حکیم چیخیب، گئتدی. پادیشاه قوشونوندان نئچه آتلی‌نی گؤتوروب، داغا ساری یولا دوشدولر. داغین اته‌یینه یئتیشدیلر. شاه چوبانی سسله‌دی.

چوبان داغین باشیندا ایدی. سوروشدو سیز کیمسیز؟ نه ایستیرسیز مندن.
شاه دئدی:

من بو اؤلکه نین پادشاهی‌یام. سن منیم قیزیمین خسته‌لی‌یینی، ائشیتمه‌ییبسن یوخسا؟ سندن ایسته‌ییرم گلیب قیزیما..‌.

پادیشاهین حکیمین سؤزلری یادیندان چیخمیشدی‌‌. چوبان دئدی:

هه، محبت افسانه‌سی‌نی ایسته‌ییرسن؟ من اونو بیلیرم .

پادیشاه دئدی :منیم قیزیمی توختات، من ده نه‌قدر ایسترسن، سنه قیزیل، گوموش و مال وئریم.

چوبان داغدان ائنرکن دئدی:

دونیا مالیندان دانیشسان من گلمه‌رم. محبت افسانه‌سی، محبت اوچون دئییلر.

شاه هئچ نه دئمه‌دی. اؤز اوره یینده دئدی کاش بو فضول چوبانی جللادین الینه وئرم، آما سسینی چیخارتمادی.

چوبانی آتا میندیریب، یولا دوشدولر . چوخ گئتدیلر گلیب سارایا چاتدیلار.

قوللوقچولار چوبانی پرده آرخاسیندا اوتوردوب، دئدیلر:

پادیشاه امر بویوروب، بوردان افسانه‌نی شه‌زاده اوچون اوخویاسان.
چوبان دئدی:

محبت افساناسی‌نی شه‌زاده دن باشقا کیمسه ائشیده بیلمز. یوخسا اثری اولماز. هامینیز بوردان گئدین.

هامی چیخیب گئتدی. سارای‌دا بیر قیز قالدی بیرده چوبان.

او پرده‌نی چکیب، ایچه‌ری گیردی‌‌. قیز سس‌سیز، سمیرسیز اوزانمیشدی.

چوبان قاپی‌نین آغزیندا اوتوروب، اوجا سسله دئدی:

آی گؤزل قیز، آی قیز خانیم، سنه محبت افسانه سی‌نی اوخویاجاغام.
منی دینله‌ییرسن‌می؟

قیز سانکی تانیش سس ائشیتدیب. باشینی چئویردی، چوبانین گؤزلرینه باخیب، دئدی: هه قولاق آسیرام دئ.

چوبان محبت افسانه‌سینی باشلادی :

بیر گون واریدی، بیر گون یوخودو. بیر شاه واریدی اونون یئددی یاشیندا بیر قیزی واریدی. چوخ قوللوقچو اونون خیدمتینده‌یدی‌لر. آما بو قولوقچولارین ایچینده، قوچعلی آدیندا بیر اوغلان واریدی. شه‌زاده یئمک یئینده، دسمالی یئره دوشسه‌یدی، قوچعلی اونا وئرردی.

توپ اوینایاندا، گئدیب توپونو گتیرردی، دونبالان-پیسدان اوینایاندا قوچعلی اونون یانیندا اولاردی. یاتاندا، کیمسه اونو راحاتسیز ائله‌مه‌سین دئیه قوچعلی قاپی‌نین آرخاسیندا گؤزه‌تلردی. شه‌زاده نه ایسته‌سه‌یدی قوچعلی اونو یئرینه گتیرردی. او قدر قوچعلی‌دن راضی‌یدی کی اونو بیر دفه ده وورمامیشدی .
قوچعلی قیزا دوم-دورو سئوگی بسله‌میشدی. اؤزو بو ایشی عاییب بیلمیردی. آخی سئومه‌یین عاییبی اولماز.

باغدا کپه‌نک توتان زامانلار، قوچعلی اؤزونو چوخ خوشبخت بیلردی. قیزین الینی توتماق ایستردی. آما قیز کیمسه‌نی بیه‌نمزدی. هامینی ایت کیمی گؤرردی.

قوچعلی بو سیرری گیزله‌ده بیلمه‌دی . او قیزا سئوگی‌سینی اعتراف ائله‌دی. قیزین چوخ آجیغی گلدی. او قوچعلی‌نی شاپالاقلاییب، سارایدان ائشییه اوتوردو.

چوبان سوسدو. قیز اونا دئدی:

سونرا نه اولدو؟

چوبان سوروشدو:

آی گؤزل قیز! سن نه دوشونورسن؟

قوچعلی‌نین باشینا نه گلدی؟

قیز دئدی: من هئچ زمان قوچعلی‌نی دوشونمه‌میشم .سن بیلیرسن اونا نه اولدو‍؟
چوبان آیاغا قالخدی. گئدیب قیزین یاخینیندا اوتوروب، الینی توتدو. محبت افسانه سینین آردینی بئله سؤیله‌دی:

آردی وار...