کولت. آز آینور صدیقاین هازیرلادیغی "اۆمیدسیز پادشاهین باغیشلانماسی داستانی "نی تقدیم ائدیر:

عادل شاه یوخوسوندا ظالیم بیر سۏلطان گؤردو،

سۏروشدو: - سنه تانری هانسی جزانی وئردی؟
گۆندۆزلر قان تؤکمۆسن، ائو ییخیب، ظۆلم ائتمیسن،
گئجه هانسی عذابی چکدین عوضینده سن؟
ظالیم جواب وئری کی: - عؤمرۆم چاتارکن سۏنا،
گؤز گزدیردیم جاهانا، پناه گتیردیم اۏنا.
گؤرۆم دۆشگۆن چاغیمدا یۏل گؤسترن کیمیم وار؟
تانری مرحمتینه کیم منی اولاشدیرار؟
باخیب گؤردۆم هئچ کسین منه بیر شفقتی یۏخ،
حدّتی، نفرتی چۏخ، لطفۆ، مرحمتی یۏخ.
سؤیۆد کیمی تیتره‌دیم، دؤزمه‌دیم بو رۆزگارا،
اۆرک یارا، اۆز قارا، ایندی گئدیم من هارا؟
آخار سویا توللادیم دؤرد اوجونو کیلیمی،
تکجه تانری لطفۆنه باغلادیم اؤز کؤنلۆمی.
دئدی: «ای اولو تانریم، بیز عاجزیک، سن قادیر،
بو مسکین، عاجز قولون سندن خجالتلی‌دیر.
سوچ‌لاریندان پشیمان زاواللی‌یا رحم ائله،
نیفرین‌لر قازانمیشام یۏلوندان چیخماق ایله.
یا توللا جهنّمه- ان سرت جزا وئر منه،
یا دا پیسلیک‌لریمین عکسینی گؤستر منه.»
گؤردۆ اۆزۆمده تر وار- خجالت نیشانه‌سی،
اۆز دؤندرمه‌دی مندن، کیمسه‌سیزلر کیمسه‌سی.
فیض ایله قبول ائتدی منیم یالواریشیمی،
چیینیمدن داغ گؤتۆردۆ، سیغاللادی باشیمی.
پشمانلیق، تؤبه دۏلو بیر نفس گئتمز هدر،
قییامتده تانرینین غضبینی سؤندۆرر.
ای بۏش بۏغاز، آلدیغین هر بۏش نفسه فیکیر وئر:
بیر عذاب ترازوسو، بیز زیان اؤلچۆسۆدیر.
بۏش گئچمیش هر گۆنۆنۆ بیر زیان معیاری سای،
نئچه ایل اؤلدۆرمۆسن، نئچه فصیل، نئچه آی.
عؤمرۆنۆن ترازوسو اینجیسیزدیر، آی سرخۏش!
حیات قدحین دۏلار، حیات ساندیقچان‌سا بۏش.
ترازویا یئرده‌کی داشلاری دۏلدورما سن،
بو فانی مونجوقلاری قۏلباغینا وورما سن.
نه قدر ییغمیسانسا، بیرجه درهمه ده‌یمز،
عؤمرۆ وئردیگین سؤدا بیر نفسمیش، بۏش نفس.
هر نه آلمیسان‌سا، وئر، جمع ائتمییه جان آتما!
ائلیندن گلن قده‌ر پایلا، بؤلۆش، اوزاتما!
بئلین مظلوم الیندن، بۏینون کؤله حاققیندان،
قورتولسا، قیامتده، بلکه، تاپارسان آمان.
اۏندا سنین اته‌گین یتیم‌لره تۏر اۏلماز،
دول‌لار توتوب یاخاندان، سندن طلبکار اۏلماز.
کؤهنه، چیندیر دؤشکلی بو دۆنیادان سن ال چک،
چیرکین اته‌گین یو، نفسین گؤزۆنه میل چک.
یا سن غریب‌لر کیمی روزو ییغ یۏل گتمه‌یه،
یا چکیل نظامیـتک دۆنیادان بیر گوشه‌یه