کولت. آذ رامیز رؤوشنین ۵۰ ایل اول یازیلان، اما بو گونه قدر هئچ یئرده درج اولونمایان شعیرینی تقدیم ائدیر.

صینیف‌ده یان-یانا اوتوردوغون قیز
هردن درس‌دن ائوه اؤتوردویون قیز
بؤیویور یاواش-یاواش.
الین توخونان‌دا، الینی چکیر،
دیزین توخونان‌دا، دیزینی چکیر.
هردن ائله دارتیب دورور اؤزونو
سانکی ترزی‌ده اؤزونو چکیر.

گؤره‌ن بو قیز آخی نه یئییب، ایچیر.
بویدا سنی اؤتوب بیر آز دئیه‌سه‌ن.
یوخدا، واخت اونون اوچون داها تئز کئچیر.
سن‌دن تئز بؤیویور بو قیز دئیه‌سه‌ن.

سن اونون تاخدیغی سیرغالارا باخ،
ائله بیل کی، گول آچیب قولاقلاری
ساچلاری ایل به‌ایل قیسالیر
آنجاق اوزانیر آیاقلاری.

اونو درس‌دن ائوه اؤتوره‌ن‌ده سن،
بیر آزجا آرالی گئدیرسن نیه
هردن اوغلانلارین اونا زیل‌لنه‌ن
اوغرون باخیشینی گودورسه‌ن نیه؟

نیه قیسقانیرسان اونو سن آخی؟
اونا باخانلارین ندیر گوناهی
نیه بوش-بوشونا گؤینییر ایچین
او، قیزین هئچ بون‌دان خبری وارمی؟

اونا سؤز دئمه‌یه چاتمیرسا، گوجون
اونو قوروماغا گوجون چاتارمی؟
داها بس‌دیر سوسدون، واخت دا دارالیر.
آز قالیب مکتبی بیتیرمه‌یه ده
اوندان آیریلاماغا داها آز قالیب.
اونو همیشه‌لیک ایتیرمه‌یه ده.

یوخونا گیره‌جک بو قیز سونرالار.
یوخودان دلی تک اویاناجاق‌سان.
بیر گون بیر اوغلانلا اونو قول-قولا
گؤره‌ن‌ده دیکسینیب دایاناجاق‌سان.

یوخ، هله واختین وار، کوچه اوزون‌دور
یاخینلاش بو قیزین یاپیش قولون‌دان
داها سونراسینی من یازمیرام، یوخ.
سونراسی سن‌لیک‌دیر، آی قورخاق اوغلان.