بیر باغبان وار ایدی، بونون بیر قیزی وار ایدی. بو باغبان اؤز باغیندا گئدردی، باغبان‌لیق ائلردی. بیر گون سحرچاغی گئتدی باغینا، گؤردو بیردانا قورو کلّه دیغیرلانیر، دئییر:

-قیرخ قان ائله‌میشم، قیرخ بیرینی ده ائلیه‌جاغام!
بونو هئی تیکرار ائله‌ییر. باغبان قاییدیب، قورو کلّه‌نی گؤتوروب قویدو کیفینه، دئدی:

-بو قیرخ قان ائله‌ییب، دای قیرخ بیرینی ائله‌مه‌سین.

قورو کلّه‌نی اؤزوینن آپاردی باغا، باغ‌دا ایشله‌دی. آخشام گلنده او کیفی‌ده گؤتوردو، همان کی قورو کلّه اونون ایچینده‌یدی، گؤردو دئییر:

- قیرخ قان ائله‌میشم، قیرخ بیرینی ده ائلیه‌جاغام.

باغبان بونو آپاریر ائوینه، دئییر بو قیرخ قان ائله‌ییب، قیرخ بیرینی ده ائلیه‌جاق! من گتیریم بونو دؤیوم دولدوروم شوشه‌یه، قویوم رفه (طاقچایا) بو قیرخ قان ائله‌ییب، قیرخ بیرینی داها ائله‌مه‌سین. گتیریر اونو دؤیوب اون ائلر، دولدورار شوشه‌یه، قویار رفه.
بیر گون باغبان بیر نئچه گون‌لوک گئدر موسافرته. ائوده باغبانین بیر قیزی وارایدی، بو قیز سانجیلانار، ائله بتر سانجیلانار کی، آز قالار اؤلسون. قیز اؤز- اؤزونه دئیه‌ر، دوروم او کلّه‌نین اونوندان گتیریم آتیم، او قیرخ قان ائله‌ییب، قیرخ بیرینی ده ائلیه‌جاق. اؤلوم یاخام قورتارسین.

دورار گتیرر اون‌دان بیر قاشیق آتار، آتماق همان بونون آغریسی دوزَلر، گلر اوتورار.

گون او گون اولار کی، قیزین باباسی سَفردن گلر. بیر-ایکی آی کئچندن سونرا قیز گؤرر، بونون قارینی شیشیر!

باباسینا دئیه‌ر، بابا منیم قارنیم شیشیر! باباس گؤتوروب قیزی آپار دؤهتوره، قابیله‌یه. قابیله دئیه‌ر:
-بونون اوشاغی واردی!

بابا سوروشا‌ر:

-قیز حال قضیه نمنه‌دی؟

قیز دئیر:

-بابا سن گئدندن سونرا من سانجیلاندیم، او کلّه‌نین اونوندان گتیردیم آتدیم کی، اؤلوم یاخام قوتارسین. توخدادیم، ایندی ده قارنیم بوجور اولوب!

بابا دئیر:

-بو هر نمنه‌دی آللاهین ایشی دیر، بونا ال وورماق اولماز.

بوجور قالار، دوققوز آیدان سونرا بو قیزین بیر اوغلو اولار. بابا دا بو اوغلانا بتر محبت گتیرر، بو اوغلانی بؤیودرلر اولار یئددی یاشیندا. بابانین بو اوغلانا او قدر علاقه‌سی وار ایدی کی، یئددی یاشیندا اوشاغی اؤز یانیجان باغا آپاراردی.

بیر گون گینه دده- بالا ایکی یاندان باغا گئدیردیلر، بو اوشاق گؤردو بندرلره نیگهبان قویوبلار! سوروشدو:
- بابا نیگهبان‌لاری نییه دوزوبلر بندرلره؟

باباسی دئدی:

-اوغول شاهین قصری‌نین قاباغیندا، بیر گؤل واردی، اورا بیر دانا بؤیوک بالیق گتیریبلر سالیب‌لار، بوغلو بالیق! شاهین خانیمی‌سی دئییب اونون بوغو وار، نامحرم دی منه! اونو سالمایین اورا، بالیق باشینی قوزاییب سو دان چیخاردیب ائشییه، شاققا چکیب گولوب! شاه دا گؤروب کی، بو گولوب تعججوب ائله‌ییب‌دی، دئیب بو نییه گولدو! ایندی ده بندرلره آدام قویوب کی، گؤره بوغلو بالیغین گولمه‌یینه نه دئییرلر! نییه گولوب‌دور!

اوامی وار...

قایناق: ائلبیلیمی‌نین ایچ بولتنی