یازین سون آیی گونش قیزیشیر، یئر قاوریلیر ایستی دوشور، آران پؤشله‌نیر، یازین یام- یاشیل، اؤرتویو بوزاریر...

داوارین اَینینده‌کی، یون گئت- گئده آغیرلاشیر، سورو یولو اوسته تیکان کول لاری، قویون لارین یونون یولوشدورور . قویون قیرخیمی گلیب چاتیر، قیرخیق‌لارا بیلوو چکرک ایتیلیر، قویون‌چو¬لار بیر- بیری‌نین یاردیمیناگلیر، قویون قیرخیمی، باشا چاتدیقدا، قویون ییه‌سی، یاردیمجی قیرخیچی‌لارا، چؤرک وئریر.
هر ایل آنام، بولاق‌دا یون یویار، یونو ایسلادیب، یاستی بیر داشین اوستونه قویوب، ایکی الی آغاج‌لی، ایسلاق یونو داش اوسته تاپداللار. سونرا ایپه آسیب، یئرده سریب، قورودور لار. یون داراما گون‌لری قادین‌لار بیر- بیرینه یاردیم ائدر. یون دارانیرجاق، جهره قورولور، یون اییریلر.

آنام جهره اییر‌رکن، اوخشاماسینی حزین سسینده سیزیلداییر او جهرنین سسینده، اور‌کدن قوپان قاتی دویغولارین سونور. ایریلیک ایپ دوکچه‌لری، یوماق- یوماق سارینار. یوماق¬لار نئچه گوندن سونرا آنامین قول‌لارینا دولانیب، بیر ارشینجه آچیلیب، باشدان دویون‌لنیب، بویاخانایا گئدیر. آنامین ایسته‌دیینه گؤره، هر یوماق چئشیدلی رنگ‌لرده بویانیر. چوخلو ائولرده ده اؤزلری یوماق‌لاری بویارلار.

گؤی قورشاغی تک یئددی بویالی یوماق¬لار، قورودولوب، ائوه قاییدار کن، آنام ایش اوزالدار. آنامین ایشی، اون‌بیر رهده ائله گؤزل گؤرسه‌نر‌ کی، ائله بیل گؤی قورشاغی گؤیدن بیزیم حیطه قونوموش. یاشیل، ساری، قیرمیزی، چؤهرایی، سوغانی، ناری، قیزیلی، گوموشو، هئیواگولو، نارینجی، پورتاغالی...
بویا لاردا دویغو‌لار دیله گلیر، یاشاما بزک وئریر. آنام گئجه- گوندوز ائو ایشیندن قورتولار- قورتولماز قونار ایشی‌نین باشینا، اوزالدیلمیش اریشینه، آرغاج آتیب، توخویار، هر آتقی آتلیقدا، آرغاج- آغاجی ایله چالینیب برکیلیر، چئشیدلی، ناخیش‌لار سالینیر، سونرا هه‌وه ایله ایلمک‌لر دؤیولور.

هردن آیلی گئجه‌لری آی باتاناجاق، ایش توخویور، ناخیش‌لار سالیر، بایاتی‌لار اوخویور، یاراماز اوغورسوزلوق گون‌لری یادا سالیب، یورقون گؤزلریندن یاش اله‌ییر. هردن سوروشورام:

-آنا به سن یورولماق هئچ بیلمزسن؟ اوباشداندان قالخیب، تندیر سالیب، چؤرک یاپیب، چاتما قوروب، تولوق آسیب، ائو ایش¬لرینی گؤروب، ائوده بئجریلن داوارا باخیب، بولاقا گئدیب، سو داشیییب، چایدا گئدیب، پالتار یویوب، چؤلدن گئدیب اودون ییغیب، ائوه یئتیشیب- یئتیشمدن، ایش توخویوب، اوشاق امیشدیریب، ایندی ده گئجه یاریسی‌دیر هله یاتمامیسان...

سیغال‌لی باخیشینی گؤزلریمه دیکیر اوزومه گولور، دئییر:

آی بالاسی بو یاشام اوغراشمالاری منه ان قوجامان، بخته‌ورلیک دیر، نه‌دن کی، بیز کئچمیشده یامان گون‌لر سووموشوک. قحط‌لیک ایدی، چؤرک تاپیلمردی، دؤرد قایین‌خاتینی، چووال گؤتوروب، اودون ییغماق اوچون چؤله- باییرا چیخاردیق، هر دن بیریمیز ائوده قاین آنا‌میزدان، بیر آز قورو چؤرک خیرداسی چالیب، بولاق باشیندا ایسلادیب سئوه- سئوه یئییب، هله‌لیک قارنیمیزی بیر آز دویوراردیق. آجلیق ایدی، گونده قونشولاردان اؤلوم خبری گلیردی. آللاهین بو گون‌لرینه چوخ شوکورلر اولسون.

داوامی وار...