آیاقیالین جانیمی گؤتوروب قاچمیشام. مهمات چادیری یانیب، گولـلهینن ترکش پاراسی هر طرفدن یاغماقدادیر. نفس چکدیییمده، بوغازیم اولور اود کیمی. پیی ایله اَت یانیغی¬نین اییسی توستویله "تی.ان تی."ـیه قاریشیب هر یئری بورویوب. عراقین هواپیمالاری چوخلو رزمنده¬لر یوخودا اولدوغو صوبحه یاخین بورانی بومباران ائله¬دیلر. باشیمیزی خاکریزدن چیخارتساق، حتمن گوللـه ترکشه توش گلمه لیییک.

بو هایبیدیریقدا، تزه سوروجو کیمی ایشینه باشلایان بیغلی کیشی هردن بیر باشینی خاکریزین دالیندان چیخاردیب پؤرتوموش صیفتینی توتور آلوولانمیش اوتوبوس¬لارا طرف. سونرا دا باشینا قاپازلاییب، دئییر:- «ائویم ییخیلدی آللاه!...»

اوشاقلاردان بیر ایکیسی ایله اونون باشیندان باسیب یئرده اَیله¬شدیریریک. ائهمالجا دئییرم: ـ «یئکه کیشی-سن! باشین ساغ اولسون، یاندی کی یاندی! قوربان جانووا...»

بیر آهیل کؤک رزمنده ده منیم سؤزومون دالینی توتور: ـ «کیشی گؤرورسن کی، اؤلوم اولومداییق،...»
سوروجو آغلاییب دئییر: ـ «هله میراثین قیسطلرینی وئریب قورتارمامیشام. بونو آلماغا خیرتده یهجَک بورج آلتیندایام»، دئییب تورپاغی اووجونا دولدوروب تؤکور باشینا.

قالخیر بیر سئری ده ماشینینا گؤز تیکیر. دئییر: ـ «آللاه دادیما چات! زنن اوشاغیمین جوابینی نئجه وئره-جهیَم...»
بئلیندن توتوب چکیرم آشاغی. آجیقلی - آجیقلی دئییرم: ـ «دوزدو مندن بؤیوکسن، آمما بوردا اؤزووه گؤره ده اولمالی اولسا، هر دن سؤزه باخ...»

ائنلی قاشلارینین آلتیندان زور بیللاهلا گؤرسهنن قیییق گؤزلرییله دوز گؤزومون ایچینه باخیر.
داها سسی چیخمیر. بیر آز آرخایین اولوب، الیمی چکیرم قورو دوداغیما. سونرا یئریمدن دوروب خاکریزلرین دالینا گؤز گَزدیریرم. توستودن گؤز گؤزو گؤرمور. یئریمه قاییداندا گؤرورم سوروجو اوردا دئییل. باشیمی تَلکه چیخاردیب باخیرام. قاچیر اتوبوسونا ساری. اونو چاغیریرام. اوجا بویویلا بیردن آغزی اوسته ییخیلیر یئره. وورنوخور، بورولور، قیشقیریر.

آهیل بیر رزمنده دئییر: ـ «بو راننده بیزی ده گودازا وئرمه¬سه، ال چکن دئییل ها!»

بونو دئییب، خاکریزدن چیخماغا قولومدان توتوب سوروتله¬ییر. گؤیلوم گلر – گلمز، قالخیب باشیمی اَیه- اَیه اونونلا قاچیرام سوروجویه ساری. نارین ده نه چینقللار آیاغیمی دَلیک¬دئشیک ائله¬ییر. یان یؤره میزده جوره به جوره خومپارادی کی پارتلاییر. قولتوغونون آلتیندان یاپیشیب اونو قالخیزماق ایستهدیییمیزده، یئنه های کوی سالیر. ـ «منی قیچسیز هارا آپاریرسیز؟!»
گؤرورم ساغ قیچی دیزدن آشاغی یوخدو. آهیل رزمنده دئییر: ـ «گؤتور گئدک.»
قولتوغونون آلتیندان یاپیشیب، چتینلیکله سوروتله ییب باسیریق خاکریزین دالینا. ال آیاغیم بوتون قانا باتیب. تورپاقدان گؤتورب ال آیاغیما سورتورم. سوروجو یاپیشیر الیمدن. چینگیزلی بیغینین آلاتیندا گیزله-نن دوداقلاری اَسه – اَسه دَبریر. ـ «جاوانلیغیندان خئیر گؤرهسن، منیم قیچیمی دا گتیر!»

قاشقاباقلی دئییرم: ـ «رحمتلییین اوغلو! سنه دئدیک دای بیر آز قال یئرینده... گؤرورسن کی یئردن گؤیدن گولـله یاغیر. بو های¬کوی¬ده سنین قیچینی هاردان تاپیم ایندی؟»

هایینا باسسا دا، سسی ضعیفلشیب. ـ «هله اوتوبوسومو تزه له یه بیلسم، قیچسیز نهجور اونو سورهجه یم... »

ایکی نفر امدادچی قولتوغوندان یاپیشیب اونو آرخاسی اوسته ییخیرلار برانکاردا. اونو آمبولانسا ساری آپاراندا، آلت دوداغینی دیشلهیه - دیشله یه بیر سؤز دئمهدن منه باخیر. قالا بیلمیرم. امدادچیلارا دئییرم: ـ «بیر آز دؤزون قیچینی دا تاپیب گتیریم...»

اؤزومو آتیرام خاکریزین او تایینا. قولاغیمین دیبینده خومپارالار پارتلایا – پارتلایا، او دوشدویو یئری آختاریرام. یئرده نم نئچه قول قیچ دا وار. اونونکو آنجاق دیزیندندیر. بیر ده، یئرده کیلرین هامیسی پوتونلودور. بیز کی، اونون آیاغیندا دابانی قاتلانمیش باشماقدان ساوایی هئچ زاد گؤرمه دیک. گؤیدن نوخود کیشمیش کیمی خومپارا یاغیر. آلاهی بیر قیچ گؤتوروب اونا وئرمک فیکری ذهنمیدن کئچیر، آمما تئز ده اوره ییمه گلیر. گَل ایندی قیامتده بو بیغی بورما سوروجویه جاواب وئر. بو فیکیرلرله دابانی قاتلانمیش باشماغینی گؤرورم. خاکریزی اوسته قالخیب، دؤرد ال آیاقلی دیققتله یئری آختاریرام. یانان چادیرلارا طرف دیزدن بؤلونموش بیر قیچ گؤزومه دَییر. ائله اؤزودور. گؤتورورم. یانماییب ساغ سالاماتدی دا.

آیاقلاریمین آلتی داش تورپاق اوسته. ایتی آددیملارلا گیریرم خاکریزین دالینا. آمبولانس دایانیب منی گودور. قیچینی قویورام اوستونه. رنگروفو قاچیب، آنجاق نَمنه منه دئییر. باشیمی اَییب قولاغیمی آغزینا یاخینلادیرام. دئییر: ـ «تزه بیر اوتوبوسنان قاییدیب... هامیزی اؤزوم کربلایه آپاراجاغام...!»