"گلن گئدن"لرین تاقتاق سسی هر دن بیر گئجه نین باغرینی یاریردی. هله بیزه فیشنگ له مهمات وئریلمه-میشدی. آذاندان سونرا، فرمانده دئمیشدی ساهمانلاشاق. بئله دئیه نده، یعنی بیر خبر ـ مَبر وار. آلا قارانلیقدا، چادیریمیزدا اَیله شیب اسلحه لریمیزی تمیزله ییب یاغلاییردیق. هر دن رنگلی بیر منوّر گؤیده پارتلاییب سؤنوردو. هئچ بیریمیزین جیققیری دا چیخمیردی. من "کلاشینکوف" ـون ماشاسینی چیققیلداداندا، "پرویز" هؤیولجه سنگره تپیلیب، چانتالاریمیزین اوستونه یوگوردو. ـ «کیشی اولون! هر بیریز گؤتوروب سوز، تئز اولون وئرین...»

"ارسلان" دئدی: «نَدی پرویز؟! یئنه بوینو یوغونلوق ائله ییرسن!»
پرویز الینی الینه سورتدو. ـ «پلاکیمی وئرمه سَز، صوبحه جک هامیزی جی قویاجاغام.»
ارسلان دئدی: ـ «گؤرورسن کی بیزیم بهشت آچارلاریمیز بوینوموزدا، سَنینکینی نئیله ییریک؟»
"نصیر" منه گؤز ووروب، ـ «رحمتلییین اوغلو! تاپماسان ائوین ییخیلدی» دئیه رک، باشینی توولادی.
پرویز اودقونوب، قیییق گؤزلرینی بوزدو. ـ «سیزی حضرت عابباس دئیین کیمده دی؟»
الیمی چَنه مه قویدوم. ـ «چؤرک قیرینتی لارین ایچینی گزیب سن؟!»

پرویز اوزون قول لارینی چیرمالادی. ـ «"جمیله" جانی تاپماسام، سیز سَهلدی، اوردوگاهی بوردان کؤچدوره رم.»
پیققیلداییب، باشیمیزی آشاغی سالدیق. اسلحه لریمیزی الیمیزه گؤتوروب، گلن گئدن لری چکدیک. پرویز چؤله چیخدی.
ارسلان دئدی: ـ «داها شوخلوق بَسدی. هر بیریزده دی، وئرسین.»
نصیر منه باخدی. دئدیم: ـ «قوی بیر آز گَزسین، سونرا!»

پرویزین ایییرمی یاشی وار ایدی؛ اوجا بویلو، ائنلی کورَکلی. بوینو وار ایدی، بالتا کَسمز. اونا گؤره ده اونا دئیَردیلر "بوینو یوغون پرویز!". قارنی دویماق ـ دولماق بیلمزدی. هامیدان قاباق سوفرا باشیندا اَیله-شردی، هامیدان سونرا گئری چکیلَردی. سوفرا باشیندان دورجاق دا، اؤز چادیریمیزلا او بیری چادیرلارین چؤرک قیرینتی لارینی ییغیشدیریب تَلیسه تَپردی. بیر سئری دئمیشدی اوشاقلیقدان چؤرک-خیرداچی کیمی کوچه لری گزمیشَم. اینانمادیق. اوچوموزون ده اوزونه باخیب، دئدی: ـ «جمیله جانی!». جمیله یه آند ایچَنده، بیلیردیک داها دوز دئییر. بوتون اوردوگاهدا، لاپ باشا کیمی هامی اونون آروادی¬نین آدینی بیلیردی. هر دن اَیله شیب، بیزدن ائوینه (یعنی جمیله یه) کاغیذ یازماغیمیزی ایستردی. بیز کاغیذ ـ قلم الیمیزده اونون اورَک سؤزلرینی گؤزله¬یَردیک. او آنجاق هئچ زاد دئمزدی. سنگرین بیر بوجاغینا دونوخوب، الینی الینه سورتَردی.

هاوا ایشیقلاناندا، اوردوگاهین محوطه سینه گئتدیک. اوردا دئدیلر مراسیمه گؤره یئر جورلامالی ییق. بیز بیر شئی تاپانا، پرویز اوچ اوچ مهمات جعبه لرینی دالینا آلیب، گتیریب قالادی بیر بیری نین اوستونه. او گون "آهنگران" گلیب اوخودو. او اوخویا - اوخویا، هره میزه ده میوه سویویلا پارا فطیر وئردیلر. پرویز اؤز پایینی یئیه ندن سونرا، شوخلوغا سالیب بیزیمکی لری ده الیمیزدن قاپدی. اونا دئدیک: ـ «ائله بیل یادیندان چیخیب اِاِاِ نه ایتیریب سن؟!»

پرویزین یادینا گلنه، گورولتو سسی قولاق لاریمیزا دولدو. دالیسییجاق، دؤرد عراقلی هواپیما گؤیده گورولده مه یه باشلادی. هر کس بیر یئره قاچدی. من، ارسلان و نصیر ده بیر بیریمیزین دالییجا خاکریزین دالینا تپیلدیک. آهنگران ین سسی های کویه قاریشمیشدی. پدافندلر دالبادال هواپیمالارا گوللـه آتیردیلار. خاکریزدن بویلانیب محوطه یه باخدیغیمیزدا، آهنگران ـی یئشیک لرین اوستونده اوخودوغو حالدا گؤردوک. اوندان باشقا، هره بیر یئره سیغینمیشدی. نصیر دئدی: ـ «بس یازیق نییه قاچمیر؟!»

ارسلان دئدی: ـ «گلیب بیزه اورَک ـ دیرک وئرسین آخی! اؤزو قاچسا، اوندا وای بیزلره.»

بیردن پرویزی گؤردوک. محوطه نین او باشیندان بو باشینا، بیزه طرف قاچیردی. بیز باشیمیزی اوغورلاییب، یئنه گیزلَندیک. آهنگران، "ای کاروان" نین وسطینده، بیردن قیشقیراقلا دئدی: ـ «عزیز! پناه بگیر!»
عزیز، همن پرویز ایدی. تؤوشویه - تؤوشویه خاکریزی دیرماشیب، اؤزونو آتدی بیزیم آرامیزا. توز - تورپاق اوزونون ترینه قاریشمیشدی. نصیر ائهمالجا پلاکینی چیخاردیب، توتدو دالینا. منه دئدی: ـ «باس جیبووه ...»
ارسلان دئدی: ـ «قیچووا نه اولوب؟!»

اوز ـ گؤزونون ترینی سیلن پرویز، بیر آیاغینا باخدی، بیر ده بیزه. بیردن سسینی آتدی باشینا: ـ «ائله بیل یارالانمیشام!»
نصیر اونو یئره اوزادیب، یاراسینا باخماغا باشلادی. من الیمده کی پلاکی پرویزین گؤزونون قاباغینا توتدوم. پرویز اینیلده - اینیلده یه گولدو. ـ «جبهه ده اوغورلوق ائله ییرسن، هه؟!»

نصیر اونون شالواری نین پاچاسینی جیراندا، پرویز یئنه قیشقیردی: ـ «یوخِ... شوخلوق ائله دیم!»
دیزی اوسته اَیله شیب پلاکی اونون بوینونا سالدیم. نصیر دئدی: ـ «چوخ دا آغیر یارا دئییل، فقط بیر آز اینجیده جک!»
پرویز دئدی: ـ «حتمن جمیله ناماز اوستونده ایمیش!»

اوچوموز ده گولدوک. آهنگران هله اوخویوردو: ـ «با نوای کاروان! ...»