کولت. آذ شعریلر سیلسیله‌سین‌دن نؤوبتی شعرینی تقدیم ائدیر:

من کوسوب گئدیرم...
قوی هامی قال‌سین،

من کوسوب گئدیرم بو یئر اوزون‌دن.
اوغولام – قوی دردیم آناما قال‌سین،
آتایام – قوی بالام کوسسون اؤزون‌دن.

دونیا اوجوز سای‌دی، یا باها بیل‌دی؟!
نه ساتان تاپیل‌دی، نه آلان منی.
نه الله دونیایا باغلایا بیل‌دی،
نه آتام، نه آنام، نه بالام منی.

ایلاهی، سن‌دن ده سین‌دی اورییم،
منی کوس‌دوره‌نین یئکه‌سی سن‌سه‌ن.
دونیانین ان اوزاق… اله گلمه‌یه‌ن،
بوغازدان کئچمه‌یه‌ن تیکه‌سی سن‌سه‌ن.

من سنین یانینا اوچا بیلردیم.
اوچمورام، بئله‌جه کوسوب گئدیرم.
من سنین سیررینی آچا بیلردیم،
آچمیرام، بئله‌جه سوسوب گئدیرم.

یاندیریب گئدیرم بو واراغی دا،
بو شعیرین کولونو کیم اوخویاجاق؟

سؤندوروب گئدیرم بو چیراغی دا،
منی قاران‌لیق‌دا ایتیرمه آنجاق.

ایلاهی، کوس‌سه‌م ده سنینه‌م یئنه،
گؤزون آخیراجان اوستوم‌ده اولسون.
بو سون‌سوز دونیانین سون نقطه‌سینه،
گئدیب چیخاناجان اوستوم‌ده اولسون...

اوردا، بو دونیانین لاپ قیراغین‌دا،
بیر نهنگ بوشلوغون لاپ قاباغین‌دا.
اوتوروب دینجی‌می آلارام بیر آز،
بوشلوغا سالارام آیاقلاری‌می.
اوشاقتک یئللره‌م آیاقلاری‌می،
اوشاقتک سئوین‌جک اولارام بیر آز.

بیر اؤلوم ایشیغی گزر اوستوم‌ده،
بوشلوق‌دان سس گلر: «یوبانما تئز گل!...
سنه چوخ‌دان‌دیر کی، بو یئر اوزون‌ده
هر شئی ماراقسیزدی اؤلوم‌دن اؤزگه».

ایلاهی، گلیرم، ائشیت سسی‌می،
کیم‌سه‌یه اومید یوخ، سن اوووت منی...
بو نهنگ بوشلوغا آتدیم اؤزومو،
سنه آرخایینام، اؤزون توت منی!