کولت. آذ شعیرلر سیلسیله‌سین‌دن نؤوبتی شعیری تقدیم ائدیر:

چیچکلر دوغولور بو یاز گئجه‌سی،
بو یاز گئجه‌سین‌ده سئومه‌یه نه وار؟!

درسه‌م گوللرینی بو گلن یازین،
ساللانیب یئللنسه‌م بوداقلارین‌دان،
ائشیتسه‌م آدیمی سئوه‌ن بیر قیزین
هله اؤپولممیش دوداقلارین‌دان، –
بو یاز گئجه‌سین‌ده اؤلمه‌یه نه وار؟!..

...چیچکلر دوغولور بو یاز گئجه‌سی
اوزاق خسته‌خانا اوتاقلارین‌دا.
باشینی دیبچکدن اوزادیب باخیر
یاتان خسته‌لرین هر بیری‌سینه.

هله قورخاق اتری، اوتان‌جاق اتری
قاریشیر اوتاغین یاد ایگی‌سینه،
درمان ایگی‌سینه، یود ایگی‌سینه...

چیچکلر دوغولور بو یاز گئجه‌سی،
چیچکلر آچیلیر گولله سسینه.
گولّه آچیلیر؛
آغ-آغ کؤینکلرین یاخالیغین‌دا،
ساغ-ساغ اورکلرین یاخینلیغین‌دا
گوللر آچیلیر،
گولّه‌لر آچیلیر، گوللر آچیلیر،
چیچکلر آچیلیر بو یاز گئجه‌سی...

چیچکلر دوغولور بو یاز گئجه‌سی
پاریس‌ده،
تبریزده،
حیطیمیزده.
بو یاز گئجه‌سین‌ده چیچکله‌یه‌جک
بلکه دردیمیز ده، حسرتیمیز ده.

چیخاجاق یوللارا چیچک‌لی قیزلار،
نه باخماغا گوج وار، نه گؤز یومماغا.
نه چیچک وئرمه‌یه بیر کیمسه‌میز وار،
نه بیر کیمسه‌میز وار چیچک اومماغا...

...درسه‌م گوللرینی بو گلن یازین،
ساللانیب یئللنسه‌م بوداقلارین‌دان،
ائشیتسه‌م آدیمی سئون بیر قیزین
هله اؤپولممیش دوداقلارین‌دان، –
بو یاز گئجه‌سین‌ده اؤلمه‌یه نه وار؟!.