خاکریزین دالی

«یا ابالفضل... » دئیه‌رکن، هر دن قالخیب گولـله آتیب یئنه ائنیریک خاکریزین دالینا. منطقه تپه تپه اولدوغوندان، هئچ بَللنمیر گوللـه‌نی هایاندان وورورلار. کور خومپارالار گورولومپ سسی ایله او یان - بو یانا دوشورلر. هؤیول پوتون‌لارینی چیخاردیب جورابینی سوزور آشاغی. ـ «آغا فرمانده! گورورسن؟»

تورپاق قونموش اوزومه الیمی چکیب دئییرم: ـ«نه‌یی علی، واخت تاپیبسان؟»

گؤزونو زیلله‌ییر گؤزومه. ـ «بارماق‌لاریمی!»

باخیرام. هر ایکی آیاغی‌نین جولو بارماق‌لاری بؤیرونده خیردا قیرمیزی بارماق بیتمیشدی. ـ «نه اولسون! آلتی بارماغین وار دای.»

بو سؤزو دئجه‌یین، شالواری‌نین آیاغینی بیر آز قالخیزیر یوخاری. توپوغونون دالینداکی یئکه خالی گؤرسَدیب دئییر: ـ «باشیما بیر ایش گلسه، تانیمالی یئریم قالماسا، بو نیشان‌لاریمنان منی سئچَرسن!»

توفنگی الیمده یئر به یئر ائله‌ییرم. ـ «اینشالـلا هئچ زاد اولماز، اومود آلللاها... "و جعلنا" آیه‌سینی اوخو، سنی گؤرمه‌سین‌لر.»

پوتون‌لارینی گئیه – گئیه دئییر: ـ «آغا فرمانده! ایش‌دی دای، کور خومپارا نه بیلیر من کیمَم، سن کیمسن...»، دولومسور. بورنونو چکیب الینی قویور چیینیمه، ـ «گولَشمه‌یه داریخمیشام! نه اولاردی آدام اؤز فرماندهی‌نن گولَشیب اونون آرخاسینی یئره وورایدی...»

الینی سیخیب دئییرم: ـ «رحمتلیین اوغلو! عراقلی‌لارین گؤزونون قاباغیندا گولَشمک اولار، آخی؟...»
سؤز آغزیمدان چیخار - چیخماز، دئییر: ـ «اونلارین بیری گؤزومه ساتاشسا، ابالفضله آند اولسون باشیما آلیب بئله چیرپارام یئره، هئچ دوراجاغی اولماسین».

بونو دئییب "آر.پی.جی"سینی گؤتوروب آتیلیر خاکریزین دالینا. اوجا سسله دئییرم: ـ «دوعا اوخو، اوره‌یین سایخینلاشسین. دوعا یادیندان چیخماسین ها!»

توستویله توز - تورپاغین ایچینده ایتیر. هئچ بیلمیرم سسیمی ائشیتدی یا یوخ. بومباردومان سسی‌نین آراسیندا هردن بیر اوخوماغی‌نین سسی گلیر: «او ائیواندان بو ائیوانا، نه باخیرسان یانا یانا!...»
گولَشچی‌دیر. اوجا بویلو، بوغدایی، ائنلی کؤرَک. هر کسله ده بوردا گولَشسه، اونون آرخاسینی یئره دایاماسا بوراخماز. بو گئجه اونونلا حلاللاشاجاغام... ائله بیل دونن ایدی. "دز" سددینده بسیجی‌لره اوزمک اؤیره‌دیردیم. لاپ اول ائله اونو اوردا گؤردوم. هامی جیلیققا گئییب آتیلیردی سویا. او آنجاق جیلیققاسیز سودا الآیاق چالیردی. مورلانیب دئدیم: ـ «اوغول! سس‌سیز سالام‌سیز چیخ چؤله... ایندی بوغولارسان قالارسان الیمیزده!»

اوچ دؤرد یول اؤزونو ائشیتمه‌مَزلییه ووروب هر دن بیر سویا باتیب چیخدی. گؤزلری اوندا اولسون دئیه او بیری جیلیققا گیَئن‌لره اشاره ائله‌دیم. اوشاق‌لارین بیری دئدی: ـ «جیناب! بیرینی قویمور هنده‌ورینه. دئییر اؤزوم بیلیرم نه قاییریرام...»

یایین یاندیریجی واختی ایدی. من بَتر سوسوزلامیشدیم. دیل‌داماغیم تَپیییب یاپیشمیشدی بیر بیرینه. گئدیب چادیرلاری آختاردیغیمدا، بیرینده ایچی سویلا دولو بیر چایینیک تاپدیم. باشینی اووجوما اَییب آغزیما دایادیم. اوره‌ییم بیر آز سَرین‌له‌یندن سونرا، اؤز اؤزومه دئدیم بونو آپاریم سودان چیخان اوشاق‌‌لار دا ایچسین. سو قیراغینا یئتیشمه‌میش، اوشاق‌لارین ائله باشیما ییغیشماق‌لارینی گؤردوم. چایینیک گؤز قیرپیمیندا یونگولـلَشمیشدی. بو هایدا، جیلیققاسیز اوزوجو باغیرا باغیرا، باش گؤزوندن سو سوزرکن گلدی منه ساری. اورداکی‌لار قول‌لاریندان یاپیشیب قویمادیلار منه هندور گله. آنجاق او قیشقیردی: ـ «فرماندهسن گئت ایشووه، منیم چایینیکیم‌نن سنین نه ایشین؟»

مات قالمیش ایکن دئدیم: ـ «قارداش! نه چایینیکی؟ سوسوز ایدیک ایچدیک دای!»

تر جانیما اَیله‌شمیشدی. اوشاق‌لار اونو قومارالاییب دئدیلر: ـ «فرمانده‌دی، سنه یاراشماز کی...»
علی‌نی گؤرورم والایلایا - والایلایا، خاکریزین دالیندان چیخیر. بوغدایی صیفتی‌نین رنگی قاچمیش، قولاق‌لاریندان دا قان سوزور. اونا ساری قاچیرام. قولوندان یاپیشیب یئرده اَیلهشدیریرم. الیمله قان ترینی سیلیب آلنیندان اؤپورم. ـ «یاشا اوغول! نه قاییریب‌سان اؤزوینن؟!»
گولورم. ـ «سونرا صدامنان حئسابلاشارسان!»

بؤیور سنگردن ایمدادچی اوشاق‌لاری اؤزلرینی یئتیریرلر. تئز دئییرم: ـ «علی! او چایینیکا گؤره منی حلال ائله‌ییرسن؟ کیم بیلیر، بلکه داها گؤروشه‌نمه‌دیک!»

آغریدان آلنینا قیریش دوشوب. منه باخا – آغزی‌نین سویونو اودقونور. دئییر: ـ «آغا فرمانده! دئدییین او دوعانی اؤزون ده اوخو! "و جعلنا" دا یادیندان چیخماسین...»

برانکارد اوستونده اونو دالا گؤتورورلر. آر.پی.جی‌سی ایله ایکی خرج الیمه آلیب خاکریزدن سویوشورم او تایا. توستو - دومانلا توز - تورپاق هر یئری آلیب باشینا. قاباغیمی چتین‌لیک‌له گؤرورم. اورکدن دئییرم: ـ «یا ابالفضل! سندن مدد...»