شوبهه‌سیز گونئی آمریکا‌نین ان تانینمیش یازارلاریندان بیری «گابریل گارسیا مارکز» دیر.

گابریل گارسیا مارکز ۱۹۲۷ کلمبیادا دونیایا گلمیشدیر. بوتون لاتین آمریکا جغرافیاسیندا «گابو» آدی‌یلا تانینیر. مارکئز رومان، حیکایه، پیئس و سئناریو یازارلیغی ائتمیشدیر.

کلمبیا اولوسال یونیوئرسیتی سینده باشلادیغی حقوق و قزئته‌چی لیک تحصیلاتی یازارلیغا داها آرتیق واخت آییرماق اوچون، بوراخمیشدی.

مارکئز ۱۹۵۲ ایلینده ایلک رومانی «یاپراق فیرتیناسی‌»نی یازمیشدی. یازارین ۱۹۶۱ ایلینده «سرهنگه مکتوب یازان یوخ» آدلی رومانی ، ۱۹۶۲ «خانیم آنانین جنازه تؤره‌نی» رومانی‌یلا داوام ائتمیشدیر. مارکز «یوز ایل لیک تنهالیق» کیتابینی ۱۹۶۷ ایلینده مکزیک‌ده یازمیشدی. یازارین اوشاقلیق ایل لرینی ادبی بیر دیلده گئری¬ده بوراخماق آماجی¬یلا یازدیغی کیتاب، دونیادا بؤیوک ایلگی‌یله قارشیلاشمیشدی و کلاسیک‌لشمیش بیر اثر اولموشدور. کلمبیالی یازار، «یوز ایل لیک تنهالیق» کیتابی‌نین بیر بؤلومومدن ائتگی‌لنه‌رک یازمیش اولدوغو باشقا اؤیکولرینی ۱۹۷۲ ده «اییی اورک¬لی ائرن‌دیرا» کیتابینی تدوین ائتمیش‌دیر.

مارکئز ۱۹۸۵ ایلینده تاریخی رومانی ‌«وبا ایل¬لرینده عشق» کیتابینی یازمیشدیر. او ادبیات دونیاسینداکی، باشاری لارینی سینما آلانیندا دا گؤرسه‌تمیشدیر. بیر چوخ فیلمین سناریو‌سونو یازان باشاریلی یازار، عئینی زاماندا اویونچولوغویلا دا تقدیر قازانمیشدیر . یازار ۲۰۱۴ ایلینده ۸۷ یاشیندا مکزیک‌ده دونیاسینی دییشمیش‌دیر.

اؤلوموندن سونرا کلمبیانین جمهور باشقانی، گابریل گارسیا مارکئز اوچون «بو گونه قدر یاشامیش ان بؤیوک کلمبیالی» سؤزونو دیله گتیرمیشدیر.

یاپراق فیرتیناسی ۱۹۹۵

سرهنگه مکتوب یازان کیمسه یوخ ۱۹۶۱

خانیم آغانین جنازه تؤره‌نی ۱۹۶۲

شعیر ساعتی ۱۹۶۲

یوز ایل لیک تنهالیق ۱۹۶۷

ماوی کؤپه‌یین گؤزلری ۱۹۷۳

پاتریکیانین سون‌باهاری ۱۹۷۵

اییی قلب لی ائرئن دیرا ۱۹۷۸

وبا گون لرینده عشق ۱۹۸۵

لابیرئنتین‌ده کی ژئنرال ۱۹۸۹

منیم حوزونلو اوروسپولاریم ۲۰۰۲...

وبا گونلرینده عشق/ گابریل گارسیا مارکز

بو رومان ۱۹۸۵ ایلینده یاییملاندی. کیتاب اؤز نوعوندا ایلگینج طرزه صاحب ‌دیر. مثلاً حیکایه نین بیر بؤلومونده رومانین اصلی شخصیت لریندن بیری فئلورئنتینو- نون ماجرا لارینی و سئوگیسی‌یله نئجه قارشیلاشدیغینی دئییر. سونرا باشقا بیر شخصیت فئرمینا، اوربینو و باشقالارینین بیر- بیری‌ایله اؤزل بیچیمده ایلگی¬لرینی نقل ائدیر. بئله لیکله هم اوخویوجو ایل لرین کئچمه‌یینی و رومانداکی کاراکتئرلرین حیاتینی آیدینجا حیس ائدیر و هم آن به آن حیکایه‌نین گیزلی بوجاق لارینی راحاتجا آنلاییر.

"قاچینیلماز ایدی" رومان بو جومله ایله باشلانیر.

حیکایه کارائیب ساحیل لرینده بیر شهرده اؤز وئرن و اولدوقجا گؤزل بیر سئوگی ماجراسی‌دیر. اللی ایلدن اوزون سورن بیر سئوگی حیکایه‌سی‌.

«خئرمییا دوسئنت آمور» بو شهرده عکاس ایدی. او قیچیندان یارالانمیش و قولتوق آغاجی¬یلا یئرییه بیلن، شطرنج اویونوندا اوستا یاشلی بیر کیشی ایدی. او اؤزونو اؤلدورو و حیکایه دوکتور «خووئنال اوربینو» شهرین آدلیم دوکتورو و خئرمییا نین یولداشی، اؤلويه فوت گواهی‌سی وئرمک اوچون ائوینه گئتمکدن، باشلانیر.

اوردا بیر مکتوب تاپیر. او مکتوبدا خئرمییا نین گیزلی بیر سئوگیلی سی اولدوغونو آنلاییر. دوکتور بو ایشه چوخ تعجب ائدیر و تله سیک بو قونونو حیات¬یولداشی «فئرمینا داسا» ایلا دانیشیر. دوکتور اؤزونو تشییع مراسمی اوچون حاضیرلایارکن اتفاق اثرینده نردوواندان دوشوب اؤلور.

فئرمینا داسا اوزامانا قدر ظاهراً خوشبخت بیر حیات یاشامیشدی. آما دوکتورون اؤلدویو گون، تسلیت اوچون گلن «فئلورئنتینو آریسانی» گؤرور و اسگیده اؤز وئرن اولای¬لار یئنیدن جانلانیر.

سانکی بیر صاندیغین قاپیسی آچیلیر و او صاندیغین ایچیندن باشقا صاندیق و اونون ایچیندن باشقا صاندیق و بئله لیکله رومانین باشا- باشی چئشیدلی حیات حیکایه لری ایله دولور.

فئرمینا داسانین آناسی اؤلدوکدن سونرا آتاسی و ائوله‌نمه‌ین عمه¬سی‌ایله یاشاییردی. فئرمینا بیر صومعه ده درس اوخویوردو. بیر گون تلگرافخانادا چالیشان گنج فئلورئنتینو آریسا بیر تلگراف گتیرر. او فئرمینانی گؤروب اونا وورولور.

فئلورئنتینوآریسا نین آتاسی او شهرین گمی شیرکتینین بؤیوک اورتاق لاریندان ایدی آما بو اوشاق ائولی‌لیک دیشیندا اولدوغو اوچون آتاسی تکجه خرجینی وئریب، اؤله‌نه دک، اونونلا هئچ گؤروشومه میشدی.

یئتیم اولان فئلورئنتینو آریسا، خرزی دوکانی اولان آناسی ایلا بیرلیکده یاشاییردی.

بو گنج لر بیر- بیری ایله مکتوب لاشیب، هردن فئرمیناداسانین عمه‌سی‌نین یاردیمی‌ایلا گؤروشوردولر.

بیر گون قیز مکتوب یازارکن صومعه‌ده یاخالانیب، اوخولدان آتیلیر. آتاسی چوخ غضب لنیب، عمه‌سینی ائودن ائشییه اؤتوروب، فئرمینانی سئوگیلی‌سیندن اوزاقلاتماق اوچون باشقا شهره دایی سینین یانینا یوللاییر.

بو سوره‌ده اونلار مکتوب‌لا بیر- بیریندن خبرله‌شیردیلر آما نئچه ایل کئچدی و فئرمیناداسا اؤز شهرینه گئری دوندو و فئلورئنتو آریسانی گؤرونجه، اونون اوچون هئچ احساسی‌نین اولمادیغی‌نی و آرتیق سئومه‌دیینی آنلادی. او زامان¬لار وبا خسته‌لییی یایغین ایدی.

گنج دوکتور خووئنال بو خسته‌لییین کؤکونو کسمک آرزیسیندایدی. دوکتورون آتاسی دا شهرین اسکی وارلی عاییله‌لریندن ایدی و وبا توتونجایا کیمی طبابت ائدیردی.

دوکتور خسته‌له‌ین فئرمینانی گؤروب اونا عاشیق اولور، آما فئرمینا اونونلا ائوله‌نمه‌یه راضیلاشماییر. سونوندا دایی قیزی‌سینین، دوکتوردن خوشلاندیغینی آنلاییب، اونلاری قیسقاندیغی اوچون، دوکتورله ائوله‌نمه‌یه قرار وئریر. دوکتورون عاییله‌سی‌یله کولتور و دوشونجه فرقلی‌لییی اوچون سورونلار یاشاییردی آما هرکس اونلاری چوخ خوشبخت بیلیردیلر.

فئلورئنتینو آریسا، بو ائولی‌لیک اوچون چوخ اوزولوب، اونوتماق اوچون اؤزونو باشقا قادین¬لارین قوجاغیندا تسکین وئریردی.

او هئچ زامان سئوگیسیندن واز کئچمه¬دی. عمی‌سی اؤلدوکدن سونرا فئلورینتا آریسا شیرکتین تکجه وارث اولدو. اونون قادین لارلا قیسا و کئچیجی ایلیشگی¬لری اولوردو آما هئچ زامان ائولی اولماغی فئرمینادان باشقاسی‌ایلا دوشونمه‌ییردی.

دوکتورون اؤلدویو گونو هر زامان خیال لاریندا بسله‌ییردی، اونون اؤلومونو و فئرمینایا چاتماغی آرزیلاییردی.
او گون تسلیت اوچون دوکتورون ائوینه گئتدیکده، ایل لر بویو اونو اونودامادیغینی و سئوگیسینی فئرمینایا اعتراف ائتمیشدی آما یاشلانمیش فئرمینا، اونو غضب له ائششیه اؤتوردو.

فئلورئنتینوآریسا اومودونو ایتیرمه ییب، اونون اوره‌یینی یوموشاتماغا چالیشدی. ائله کی آز زمان سونرا فئرمینا دا اونونلا گؤروشمه‌یه راضی اولوب، یاخین دوست اولماغی قبول ائتدی.

فئرمیناداسا نین اوغلو آناسینین فئلورئنتینوآریسایلا مصاحبت ائتدییینه راضی ایدی آما باشقا شهردن آناسینین گؤروشونه گلن قیزی غضب لنیب، اونو بو گؤروش لردن منع ائتدی. فئرمیناداسا کیمسه نین سؤزونو اؤنمسه‌مه‌ییب، فئلورئنتینو آریسا یلا بیرلیکده گمی‌یله یولچولوغا چیخدیلار.

گمیده داها یاخینلاشیب سئوگیلری‌نین پارلاق گونلرینی کئچیرتدیلر.

گمی بیر شهرین ساحیلینده مسافر میندیریرکن، فئرمینا آسا نئچه تانیش گؤرور و راحاتسیز اولماسین دئیه فئلورئنتینو آریسا کاپیتاندان کیمسه‌نین گمی یه مینمه‌مه‌سینی ایسته‌ییر. کاپیتان گمی یه ساری بایراق آسلاماقلا وبا اولدوغونو بیلدیریر و بئله لیکله یولچولوق¬لارینا تک باش لارینا داوام ائدیرلر...
اونلار شهره چاتینجا آیریلماق¬لاریندان قورخورلار. کاپیتان ساحیله چاتدیقدا.

حاضیرلایان: ویدا حشمتی