کولت. آذ سحر خیاوینین " باغیشلا قیزیم" آدلی شعیرینی تقدیم ائدیر:

ایسته‌دیم قیزیما تبریک‌لر یازام
کسیلن بوغازلار گؤزومه گلدی
سؤزجوکلر آغلادی، واراق آغلادی
قلمیم قاباریب اؤزومه گلدی
نئجه من تبریک‌لر دئییم قیزیما؟
سوورولور کولکده یانان لَلَک‌لر
هله ده ایسلانمیش قانادلاریلا
کؤنلونجه اوچانمیر یاش کپه‌نک‌لر
دده‌یه ناموسدور، قارداشا غئیرت
اؤزونه کیمسه‌دیر؟ آیدینلادین بیر
کؤله‌لیک زامانی قورتاریب نئجه؟!
بو یئرده هله ده قادیندیر اسیر
باشیمدا گیجلیر بیر دلی هاوا
شهر کوچه-کوچه چینزیر قوخویور
چیرپینیر اود ایچره اونلار باغلی قوش
بایات قانونلارا آغیت اوخویور
باغیشلا نازلیجام تبریک دئمه‌دیم
آخی گئجه‌میزین تبریکی یوخدو
بیزی اؤلدوررکن تبریک دئینین
تبریکی کؤنلومه زَهَرلی اوخدو
قوی دئسینلر آنان سویوق بیریدیر
قوی دئسینلر قیزین سئومه‌ییر آنان
صاباح ییرتیلاندا گئجه اؤرپگی
گونش آشکار اولار سؤکولنده دان
داریخما گؤزلیم بیر گون گله‌جک
کؤلگه‌دن چیخاجاق گونه باخانلار
یاپدیغی باتلاقدا باتیب قالاجاق
بیزیم قلبیمیزه سونگو تاخانلار
گود اوگون بوینونا چلنگ هؤره‌جم
دویونجا گؤزلیم سنله گوله‌جم
او گون قیزلار گونون عزیز قیزیما
لاپ بئله اورکدن تبریک دئیه‌جم