کولت. آذ فرمان فرضینین شعیرینی تقدیم ائدیر:

نه سئوگیلیم دینه، نده من
دئییرم سئوگیلیم بیر گله بیزه،
سؤزوموز اولسادا بیر- بیریمیزه،
صوبحدن آخشاماجاق باخاق گؤز گؤزه،
نه سئوگیلیم دینه، نده من دینم.
غملری گؤزلرده بیر سوراقلایاق،
اؤتن فورصتلره سینه داغلایاق،
سسسیز فیکره دالاق سسسیز آغلایاق،
نه سئوگیلیم دینه، نده من دینم.
دئییرم دویغونو گؤزلره یایاق،
آلین قیریشیندان دردلری سایاق،
اوره کدن کئچه نی گؤزدن اوخویاق،
نه سئوگیلیم دینه، نده من دینم.
دئییرم جالانا گؤزومده کی قم،
او اولا خان اصلی من اولام کرم،
یاناق، توستوموزه تؤکوله عالم،
نه سئوگیلیم دینه، نده من دینم.
دئییرم کؤنلوموز اولا تپ-تزه،
ایکی بنؤشه تک بیتک اوز-اوزه،
من بوینومو اَیم، او دوداق بوزه،
نه سئوگیلیم دینه، نده من دینم.
سؤزون قودرتی یوخ دردلری آلا،
درد آغیر گلنده گؤز کیمی دولا،
آیری لذتی وار سؤز اولا اولا،
نه سئوگیلیم دینه، نده من دینم.
یورغونام کؤنلومون آغ گؤورچینی،
اوجا زیروه لرده گزدیریر منی،
دیلک لر ساز اولا اورَک موغننی،
نه سئوگیلیم دینه، نده من دینم.