آنا صحیفه ادبیات |
محمد تئز قاریشقانین توکون اودا توتوب، گؤردولر بودوها قاریشقالار یئتیشدیلر، بیر دقیقه¬ده بو بیر دام دارییلا-دویونو آریتلاییب قورتاردیلار . سحر پادشاهین قارداشی آدام گؤندردی کی:
-گئدین گؤرون اونلار هئچ بیر- ایکی مئژمئیی آریتلایا بیلیب لر؟!
گلدیلر گؤردولر بونلار ناراحات اوتوروبلار، دئییرلر سحره کیمی الی بوش قالمیشیق! دئدیلر، یاخجی بو سیناقدان چیخدیز.
سونکو گونو بیر دام پیلوو پیشیردیلر، بئش-آلتی تییان ، دئدیلر بو تییان¬لاری گئجه¬ سحره¬جک یئییه بیلسز قیز سیزیندیر. گئجه سحرهجک قارین احمد، کولک احمد، پالازقولاق احمد پیلوودان نه یئدیلر، ائله یئدیلر کی پیلوودان هئچ زاد قالمادی. سحر آدام گؤندردیلر کی، گئدین گؤرون هئچ بیر قازان یئیه بیلیب لر؟! گلیب گؤردولر بونلار دئییر آجیمیزدان قیریلیریق.
هر نه چین پادشاهینین قارداشی دئدی، بو سیناق¬لاردان چیخدیلار. بیر گون¬ ده دئدیلر بیر دام اود قالایین بونلاری آتین اودون ایچینه. اوددان دیری چیخسالار قیز بونلاریندیر. بیر دام اود قالاییب، بونلارین دؤردونو ده آتدیلار بو اودون ایچینه. گئجه سحره¬جک قارین احمد قارینییلا، پالازقولاق احمد پالازین توولاماغییلا کولک احمد کولک ائتمک¬ ایله اودو کئچیتدیلر. سحر دئدی¬لر گئدین گؤرون هئچ چیزیرانتی¬لاری قالیر؟! گلدی¬لر گؤردولر بونلار دئییرلر سحره¬جک سویوقدان دونموشوق بوردا.
قیزین عمیسی، پادشاها دئدی:
-بو اوچ سیناق¬دان چیخدیلار ایندی بیر قالدی اؤکوزون دؤیوشمه¬سی، اوندان دا چیخسالار داها سؤزوموز قالمیر، قیزی وئرمه¬لی¬ییک. پادشاه محمد گیله دئدی:
-بیر اؤکوز گتیرسز منیم اؤکوزومو ییخسا قیزیم سیزیندیر.
صاباح مئیدانی شاهین اؤکوزویله محمدین اؤکوزونون دؤیوشمه¬سینه گؤره سهمانلادیلار. شاه اؤکوزو ده لاپ ائله شاه اؤکوزو، یئرده-گؤی¬ده دورمور، نئچه ایل دیر یئدیردیب بسله¬ییب¬لر بو گونه گؤره. محمد گیل ال-آمان دا قالمیشدیلار کی هاردان اؤکوز تاپاق!؟ بیردن محمدین یادینا یولدا گول وئردییی اؤکوز دوشدو. تئز توکون توتدو اودا. اؤکوز تئز اؤزون یئتیریب، گیریب مئیدانا شاهین اؤکوزویله دؤیوشوب بیر دقیقه¬ده قارنین جیردی. بئله اولاندا دئدیلر داها سؤزوموز قالمادی قیزی گتیردیلر بیه¬نمه-یه. قیز دئدی:
-منی کیمه آپاریرسیز؟
محمد دئدی:
-سنی آپاریریق اؤلکهمیزین پادشاهینا.
قیز دئدی:
-من پادشاها گئتمیرم. سنه گله¬جه¬یم.
محمد دئدی:
-پادشاه هر ایکیمیزی ده اؤلدوتدورر. هه سنه گله¬جه¬یم!
بونلار بئشی ده دوشدولر یولا. قیز دئدی:
-محمد منیم سنه کؤنلوم وار. اونلارا بیر ایش گؤره¬جه¬یم هئچ اؤزلری ده بیلمه¬یه¬لر بو ایش نئجه اولدو. آرخایین اول اونلارین هامیسینی اؤلدوتدوره¬جه¬یم.
سؤزون دوزو، ائله محمدین ده بو قیزا کؤنلو واریدی آمما آشکارا چیخاردانمیردی، آخی بو قیز نئچه گوندن سونرا شاه خانیمی اولاجاق ایدی. بیر نئچه گوندن سونرا اؤلکهلرینه یئتیشدیلر. محمد بو قیزی گتیریب پادشاها وئردی¬. پادشاه اورکدن سئوینیب آرخایین اولوب دئدی:
-هه ساغ اول محمد! حئیوان دریسیندن چیروقانیم، فیل سومویوندن ساختومانیم، شئیدا بولبول¬دن اوخویانیم، بو دا کی چین پادشاهینین قیزی دی اولور آروادیم. خوش گلدین، سن گئده بیلرسن!
محمد گئتدی ائوینه. بو قیز ائله اوتوروب-اوتورمامیش ناخوشلادی هامی¬سی ال-آیاغا دوشدولر کی آی بالا به سنه نه گلدی؟
قیز سوزقون-سوزقون دئدی: اؤلورم.
پادشاه یوللادی حکیم دالیسینجا، داوا-درمان دالیسینجا، آش پیشیرن کیم، هوررا پیشیرن کیم، بو قیزین بوغازینا داوا-درمان تؤکن کیم! قیز توختامادی کی توختامادی. سوروشدولار به سن نمنه یئسن توختارسان؟ قیز پریشان حالدا دئدی:
-وکیلین باغیرساغیندا فیل سوتو وار اونو یئسم توختارام.
پادشاه دئدی، وکیل چاره یوخدو سنین باشینی کسمه¬لی¬ییک. وکیلین باشین کسیب باغیرساغی گتیردی¬لر بو قیز یئییب توختادی. اوچ گوندن سونرا بوقیز گئنه ناخوشلادی. گئنه هر اویون چیخارتدی¬لار بو قیز توختامادی. سوروشدولار کی نه یئسن توختارسان؟ قیز آلیز-آلیز دئدی:
-وزیرین قیزیل باغیرساغین یئسه¬م توختارام.
هرنه، پادشاه دئدی وزیر چاره یوخ، اؤلمه¬لی¬سن! وزیرین ده باشین کسیب قیزیل باغیرساغین گتیردیلر قیزا. قیز یئییب توختادی.
ایکی-اوچ گون¬دن سونرا پادشاه بو قیزا دئدی کی:
- داها کئفین سازالیب، تویوموزو توتا بیلریک.
قیز دئدی:
- منیم آللاهیم¬داندیر آمما منه بیر نئچه گون واخت وئر.
پادشاه سئوینجک دئدی:
-یاخجی منیم گؤزوم اوسته.
قیز پادشاها یئمک پیشیریب ایچینه داوا قاتدی، پادشاه یئمه¬یی یئمک همن گؤزلری قارالیب، بوتون آرزی¬لاری-هوس¬لری بورنوندان گلیب، اؤلدو.
قیز تئز بیر آدام گؤندردی محمدین دالیسینجا کی، هم سن هم باجین هم او اوچ قارداش¬لار گلین قصره. اونلار گلندن سونرا پادشاهین بؤرکون محمدین باشینا، وزیرین بؤرکون اؤز باشینا، وکیلین ده بؤرکون محمدین باجیسینین باشینا قویدو. بیرنئچه گون توی توتوب، شنلیک ائدیب، کئفه باخدیلار. قارین احمد، پالازقولاق احمد، کولک احمد ده مقام تاپیب، محمد پادشاهین ایش بیلیجی¬لری اولدولار.
آرزیلاریزا بیر اؤزوز یئتیشه¬ بیلرسیز آیری¬سی یوخ...
شاد اولوب، شاد یاشایین.
گؤی¬دن اوچ آلما دوشدو:
-بیری ناغیل دئیه¬نین
-بیری ناغیل یازانین
-بیری ده ناغیلی اوخویانین.
ناغیلی تعریفلهین: صفیه(فاطمه) نظری
تاریخ
2020.07.02 / 14:43
|
مولف
سهیلا نظری
|