یوخاری

لعنت اولسون بو یاشاییشا!

آنا صحیفه ادبیات
12 Punto 14 Punto 16 Punto 18 Punto

چئویرن: سوسن نواده‌رضی
کئچیردییمیز بو چتین و اینانیلماز گون‌لرین بنزه‌رین هئچ خاطیرلامیرام. حتتا ساواش زامانی، عراق حکومتی تبریزی و بیزیم ائویمیزین دؤرد بیر یانینی دفعه‌لرجه راکئت‌له ووردوغوندا، و هامینی دؤور- بر کندلرینی آواراسی ائتدیینده ده بئله چتین گون‌لر ا ولمامیشدیر.
بیر یاندان تهلوکه‌لی کورونا خسته‌لییی، قورخونج وضعیت‌ده یولوخوب قیرغین ائتمک‌ده‌دیر، و «جماعات رعایت ائله‌یین، ماسک تاخین، اللریزی یویون!» کیمی بیر نئچه شعاردان باشقا هئچ بیر چاره یوخ‌دور.خسته‌خانالا بدحال خسته‌لردن قیمیلدیر، بوش خسته یاتاغی اوچون آد یازدیریب، نوبه گودورلر. نه داوا- درمان وار، نه واکسن وار، نه ده داوام گتیرسن بیر چاره تاپیلار دئیه بیر اومود قالیب.

ایش- پئشه‌لرین چوخو رونق‌دن دوشوب، کیچیک تولیدچی‌لر و کارگاه‌لار افلاس ائدیبلر. یوخسول‌لوق و فلاکت قارا قانادلارینی توپلومون بؤیوک چوخونلوغو اوزه‌رینه آچیب‌دیر. جماعات قوهوم- اقربا، یار- یولداش‌دان اوزاق ائولرینده قرنطینه‌ده اولدوقلا‌ری حال‌دا، هر ساعات، قاباقکیندان داها چوخ ایل‌لرجه چالیشیب، ال‌لشیب، ایشله‌دیک‌لری سایه‌سینده اله گتیردیک‌لری سرمایالارینی، ائولرینی، وار- یوح‌لارینی ایتیرمکده‌دیرلر.

چک‌لر قایتماق‌دا، سرمایالار یوخ اولماق‌دادیر. تیجارت و تولید افلاس حالیندادیر. بیلم‌یوردلاری و مدرسه‌لر باغلی و اینسان‌لار اؤلمک حالیندا‌دیرلار و یاشاییش‌لار داغیلماقدادیر!

یاشام دوزه‌نی‌نین چوخ چتین و گرگین گون‌لرینه یاخین‌لاشیریق. قدیم یاشاییش، ایندی‌لیک حاکیم اولان بیر چوخ ده‌یرلرین، او جومله‌دن ساغلیق، پول، قدرت و... باهاسینا دَری ده‌ییشدیرمکده‌دیر. کئچیش حالینداییق. بلکه ایل‌لرجه سوره‌جک اولان بو کئچیش دؤنمی، نه یازیق کی، اینسان‌لارین بیر چوخ اورک باغلانتی‌لارینی یوخ ائدیب، ال‌لریندن چیخارداجاق کی، یئنی بیر سیستئم و بو سیستئمه اویوملو اولان اینسان‌لار یاراتسین...

تبریز شهرینده، دئمک اولار اوضاعین کونترولو الدن چیخیب. ارز و قیزیل‌ قیمتی‌نین اینانیلماز یوکسه‌لیشی، و میللی پولون گونو گوندن ده‌یرسیزلشمه‌سی‌نین آردیجا بوتون جینس‌لر، مایحتاج و خدمات قیمتی قورخونج وضعیت‌ده باهالاشیب و باهالیغی ماهارلاییب کونترول ائتمه‌یه هئچ بیر پلان‌ین اولماماسی، سبب اولوب جماعاتین اورتا طبقه‌سی تپه‌سی اوزه‌رینده یوخسول‌لوق و فلاکت قویوسونا دوشوب، توپلومون آشاغی طبقه‌لرینه قوشولسونلار. داخیلی موشکولاتین درمان ائتمه‌سی اوچون بوتون سیاست‌لر و تدبیرلر سونوج‌سوز قالیب، بو دوروم‌دان چیخاغا بوتون خاریجی دیپلوماسی‌لر ایسه قیفیل‌لانیب.

هانسی اومودلار، نه بیچیم یاشاییشا قاییتماق اوچون قرنطینه‌ده اوتورموشوق؟! نه جور بیر عاقبت‌دن قاچماغیمیزا ماسک تاخیریق؟ هانسی بدبخت‌لیک‌دن اؤزوموزو قوروماق اوچون ساعات‌باشی ال‌لریمیزی سو و صابین‌لا یویوروق؟!

بو گون ۱۵ تیر، اؤلکه‌ده اسفند ۹۸-دن بو گونه کیمی، کورونادان اؤلن‌لر ان یوکسک سایی دادیر. ور- وسایل آلماق اوچون کوچه باشیندا‌کی سوپئر مارکئته گئدیردیم. اؤز افکاریم ایچینده بوغولموشدوم، هئچ بیلمیردیم هارا و نئجه گئدیرم. بیر سسله‌دی بیله‌می. یاشلی بیر خانیم ایدی، آلچاق بوی، اوزو دولو قیریش. حنا یاخمیش ساچ‌لاری آغارمیشدی، قارا چرشاب باشیندا، کؤهنه پالتار اینینده و نیمداش باشماق‌لاری وار ایدی آیاغیندا. منه یاخین‌لاشدیغیندا آجی چکمیش اوزونو گؤردوم نیطقیم کسیلدی. گؤزلری یاشاییشی‌نین آیناسی‌یدی؛ اولدوقجا یورغون، سچسوز، پؤرتوش و کؤپوشکه‌می.

قوجا آروادین آلنی و اوزنو تر داملالاری بوروموشدو. منه ائله گلدی کی، حالی یاخشی دییل. اوزونو منه توتوب، دئدی، ائوی، یاشامی، اوغلو هئچ بیر شئیی یوخدور. دئدی قند مرضی دده سینی یاندیریب، حب یئییب و حالی یاخشی دییل. مندن ایسته‌دی بیله‌سینه تویوق آلام....

تویوقچو توکانی یوز مئتیر آشاغیدایدی. اوندان ایسته‌دیم منیمله تویوقچویا گلسین. گله بیلمه‌دی! ضعفی وار ایدی، بیلمه‌دیم آج‌‌لیقدان دیر یوخسا خسته‌لیکدن. اورداجا دووار دیبینده اوتوردو کی، من گئدیب تیوق گتیرم بیله‌سینه.

بیر اؤزوموز آشاغا طبقه‌دن، داها دوغروسو بو توپلومون تپه‌قاراما اولموش، فلاکت قویوسونا دوشمکده اولان اورتا طبقه‌سیندن- ساییلیریق آما هله بیر تیکه پنیر- چؤره‌ییمیز وار یئمه‌یه. آنجاق ائله او بیر تیکه ده ناهار چاغی، قوجا آروادین سولغون اوزونو، آلنینداکی تر دانالاری و تیترک دیزلرینی خاطیرلایاراق بوغازیمدا دویون‌لنیب آشاغا گئتمه‌دی! اسماعیل‌ین دئدییی یادیما دوشدو:
لعنت اولسون بو یاشاییشا، دوغوردان دا «بو» یاشاییشا لعنت اولسون.

بیر ایپ گؤتور خودایا، سال بوینونا فقیرین
کاسیب حیاتی نئینیر، اؤلدور قوتار الهی!
«مؤعجوز شبستری»لعنت اولسون بو یاشاییشا!

تاریخ
2020.07.07 / 23:35
مولف
ح. ر. مظفری
شرح لر
دیگر خبرلر

آزادلیق، آتامین منه وئردیی دوز چؤرکدی... - قاسمی

پوشکینین دوئله چاغیردیغی مشهورلار: عمی‌سی، دوستو، همکاری، ناظر...

آدامی بیر باخیش دا چؤکدوره بیلر- شعیر

چئریلر بیری ایکی گؤرور؟ - تبریز لطیفه‌سی

سن گئتدین، ائله بیل دونیا بوشالدی-شعیر

«قرنفیل شهید قانی، آغلا قرنفیل آغلا «– مممد آسلان

نه گؤزل سوزولور قارا گؤزلرین... - شعر

چوخ ایسته‌میشدی قاشلارینی اوینادیب اونو اله سالا، سونرا دا -حکایه

روحوم او تایدادیر، قبریم بو تایدا- شعیر

اوشاق ادبیاتی: الیفبا کیتابینی آچدی بالاجا اسد - شعر

خبر خطّی
Axar.az'da reklam Bağla
Reklam
Bize yazin Bağla