کولت. آذ بختیار واهابزادنین "یامان داریخمیشام" شعرینی تقدیم ائدیر:

یامان داریخمیشام سنینچین، یامان!
من اسیر دوشموشه‌م اؤز ایستییمه.
نیفرتی گیزلتمک آسان‌دان آسان،
سئوگینی گیزلتمک محالمیش، دئمه!

هارایلار یوکسلیر کؤنول‌دن یئنه،
بو نئجه هارای‌دی، بو نئجه هایدی؟
عؤهده‌م‌دن گلردیم… گؤزوم اوزونه،
قولاغیم سسینه داریخماسایدی…

ائله بیل هر یئردن اوزولوب الیم…
من آزیب قالمیشام غم دره‌سین‌ده.
دیریلیب یاشانیر سن‌لی گونلریم
سن‌سیز گونلریمین خاطره‌سین‌ده.

یامان داریخمیشام… بو ندیر یئنه
آغلیم ساغا باخیر، اورییم سولا.
اورییم دؤنوبدور گؤی گؤیرچینه
قونوب سن گئده‌لی سن گلن یولا.

یامان داریخمیشام… هر آخشامچاغی
آرزومو گونشین تلینه ساردیم.
منیمله اولسایدی، من داریخماغی
زامانا ان اوزون اؤلچو ساناردیم.

یوخوما گلمیشدین… قیسیلدیق کونجه.
دانیشدیق… یئل اسدی… داغیلدی درد-عم.
کؤلگه‌یه دؤنموشدوم، سنی گؤرونجه
سنین ایشیغین‌دا یوخ اولدو کؤلگه‌م