آنا صحیفه ادبیات |
کولت. آذ آذربایجانلی یازیچی خیرالدین قوجانین "آبیرلی ماشین " آدلی حکایهسینی تقدیم ائدیر:
بیر دفعه ائوده منه دئدیلر کی، "آرتیق یاشلی آدامسان، همیشه اوجوز ماشین سورموسهن، گئت، اؤزونه آبیرلی ماشین آل". چوخ فیکیرلشدیم کی، "آبیرلی ماشین" دئیهنده نه جور ماشین نظرده توتولور؟ اوندان-بوندان سوروشدوم، دئدیلر "آ کیشی، زامان دییشیب ائی، ایندی گؤیرتی ساتانین دا "جیپ"ی وار! گئت، او بؤیوک ماشینلار وار ائی، اونلاردان بیرینی آل، دئسینلر "کیشینین ماشینی وار!". من ده گؤردوم ائودکیلرله چؤلدهکیلرین فیکیرلری عینیدیر، گئتدیم کرئدیته، بیر آز بورج-خرج ائلهییب یئکه بیر ماشین آلدیم. قورخا-قورخا سورمهیه باشلادیم. نیه قورخوردوم؟ اورییمده فیکیرلشیردیم کی، "الله ائلمهسین، بیردن ماشینین آلتیندا آدام-زاد قالار، گؤرمرهم!". چونکی ماشین بیر آز هوندور اولدوغوندان منه ائله گلیردی کی، خالقا یوخاریدان آشاغی باخیرام! بو دا منیم کاراکتئریمه، یاشاییش طرزیمه اویغون گلمهیهن بیر شئیدیر... بیر ده ماشینی دؤندرهنده یامان چتینلیک چکیردیم، قاباغینی، آرخاسینی چتین گؤروردوم.
بیر دفعه کولکلی گونده ماشینیمین یانیندا بیر تاکسی دایاندی، ایچریسیندن سرنیشین دوشنده قاپیسی ماشینیمین قاباق "فاراسی"نین شوشهسینه دییب سیندیردی. سئرویسه گئدیب ۴۰۰ ماناتا تزه شوشه آلمالی اولدوم. او احوالاتدان سونرا لاپ چوخ قورخماغا باشلادیم. فیکیرلشدیم کی، قزایا دوشسهم، نه اولاجاق؟ او اولاجاقدی کی، تعمیره اون-اون بئش مین مانات خرجلهمهلی اولاجاقدیم! بئنزینی ده چوخ ایشلدیردی، پول چاتدیرماق مومکون دئییلدی. منی تانییانلار دا تئز-تئز دئییردیلر کی، "نئینیرسن بئله باهالی ماشینی؟ سات، گئتسین! بیر-ایکی ایل کئچسه، دیردن دوشهجک، آلان دا اولمایاجاق...". بیر سؤزله، ماشین گئتدیکجه گؤزومدن دوشوردو. نهایت، "آبیرلی ماشین"دان جانیمی قورتارماق قرارینا گلدیم و یاری قیمتینه ساتدیم. اما کرئدیتینی اؤدمکده چوخ چتینلیک چکدیم. هله بورجلاریمی دئمیرم.
دوغروسو، "داغ ماشینینی" آلاندا آد-سان اوچون آلمامیشدیم، آلمیشدیم کی، قزا-قدر اولاندا اؤلمییم. نه ایسه... گئتدیم بالاجا، گؤزل، راحت بیر ماشین آلدیم. اصل "شهر ماشینی"دیر، هئچ منی اینجیتمیر، راحتدیر. سرعتی ده یوکسکدیر، بنزینی ده آز ایشلهدیر. بوتون بونلاری بیر دوستوما دانیشدیم. بو تزه، بالاجا ماشینین ساتدیغیم باهالی، "آبیرلی ماشین"دان مین قات یاخشی اولدوغونو سؤیلدیم. او، بیغالتی گولومسهییب نه دئسه یاخشیدیر؟
- حاقلیسان! بو ماشین یاخشیدیر. قزا اولاندا چوخ چتینلییه دوشمورسن...
- نئجه یعنی؟
- "جیپ"ده قزایا دوشسهن، قولون-قیچین سیناجاق، سوموکلرین قیریلاجاق، آیلارلا خستهخانادا یاتمالی اولاجاقسان! بوتون پولون-پاران دا حکیملره گئدهجک. اوزون صحبتدیر! الله گؤسترمهسین!
من ده اونون دئدیکلرینه دقتله قولاق آسیرام. آخیردا گؤرون، نه دئدی؟
- اما بو ماشین قزایا دوشسه، بیردفعهلیک اولاجاقسان! داها آیلارلا خستهخانالاردا یاتماغا احتیاج اولمایاجاق! خرج-خسارته ده دوشمهیهجکسهن! "جیپ"له بالاجا ماشینین فرقی اوندادیر!..
اونون دئدیکلری منی یامان ناراحات ائدیر. ایستییرم گئدیم، تزهدن او یئکه ماشیندان آلیم. نه اولاجاق، اولاجاق!..
تاریخ
2020.07.09 / 19:09
|
مولف
Axar.az
|