کؤچورن: شبنم توحیدی
بو دونیادان دا واختیندا، کیمسهیه اذیت وئرمهدن، دوغمالارینین آراسیندان راحاتلیقلا کؤچوب، اوچوب گئتدی. اوچ اؤولادینا - ایکی قیزینا و بیر اوغلونا اونا یالنیز عالی تحصیل وئردی.
قیزلارین هر بیریسینین اؤز ائو-ائشییی، اؤز حیاتلاری واردی. او ایسه... هله ده آوروپا-دان مولک آلماقدادی. موختلیف اؤلکهلرده بو قدر وار-دؤولتی نییه آلیب ییغمیشدی؟! بونلاری کیم ایداره ائدهجکدی؟ فرسیز اوغلومو؟
آوروپایا سپهلنمیش مولکلری ایداره ائلمک نه بیر-ایکی عؤمره سیغان ایش دئییل، نه ده بیر-ایکی آدامین گؤرهجهیی ایش دئییل. لازیم ایدیمی بو؟ نییه عؤمرونو اینسان کیمی راحات یاشامیر؟ دونیایا ائو آلماقدان اؤترو گئجه-گوندوز، اونون-بونون «قولاغینی» کسمک اوچون می گلیب؟ بیر ألی دؤولتین جیبینده، بیر ألی ده جماعاتین جیبینده. بیری اوغورلوق، او بیری روشوت... آناسی هردن دئییردی کی، بالا، چوخ وار-دؤولت ده دوشمن کیمیدی. اؤزونه دوشمن یوخ، احتیاجینی اؤدهمک اوچون لازیم اولانی قازان. آما او ائشیتمهدی. ائله بیل بو دونیادا مال-مولک آلیب اونا قاراوول (نگهبان) چکمک اوچون یاشاییردی.
سنین بهرهن یئین کیمدی؟
کیمینکیسن، یئین کیمدی؟
سنه دوغرو دئین کیمدی؟
یالان دونیا، یالان دونیا!..
- روحون شاد اولسون اوستاد، حیاتی، دونیانی واختیندا درک ائلهمیسن! قلبی دولو، گؤزوتوخ، ائوی بوش اولان اوستاد. سنین مالین-مولکون دئییل، اثرلرین دونیایا سپهلنیب. هر گلن نسیلله یاشایاجاقسان... بیزیم فرقیمیزه باخ! - مالیک سانکی ایندی آییلمیش، غفلت یوخوسوندان اویانمیشدی. اؤز-اؤزونه آلوولانیر، اؤزونو پارچالاماغا بئله حاضیر ایدی. دوغرودان دا، آخی او انگلیسده نه گزیردی؟ نییه اوردا آلدیغی مولکون پولونا باکیدا، یا ائله رایونلارین بیرینده بر موسسه آچیب ایشسیزلرین اختیارینا وئرمهییب؟ بو ائولری نئیلهیهجکدی؟ اوردا یاشاماغا عؤمرو چاتاجاقدیمی؟ یا ائله میلاندا آلدیغی مولکو نئیلهییردی؟ ایندی یگانه اوغلو حبسده، تهلوکهدهدی. او دا اوردا ویروسا یولوخا بیلردی! یا قیزی؟ ایندی موسکو-دا شیرکتده تک نهلر چکیر! آللاهیم، کئچ منیم بو گوناهلاریمدان! جاهیللیییمدن! آجگؤزلولویومدن! هله رایوندا آلدیغی نئچه هئکتارلیق تورپاق ساحهسی وار! أکنی یوخ، بیچهنی یوخ. آروادی دفعهلرله دئمیشدی کی، بو تورپاغا نه احتیاجلاری وار؟ اگر اوشاقلار آوروپادا اوخویوب، اوردا قالیب ایشلهییرسه، اوردا یئرلشیب، اوردا یاشایاجاقسا بو تورپاغی کیم أکیب، بئجردهجک؟ چپرلهییب قویموسان قالیب اوردا... وئر اونو اوردا یاشایان کندلییه... اؤروش یئری ائلهسینلر... هرهسی بیر اینک ساخلاییب بالاسینی سود-له بؤیوده بیلسینلر. نه اولسون دیللهنن، سنه سؤز دئین یوخودور! بس سنین ویجدانین، عدالتین، حقیقتین هاردا قالدی؟
آناسی تورپاق مسئلهسینده داها ماراقلی چیخیش ائلهمیشدی:
- آی بالا، سن ایندیدن اوزونو گؤرمهدییین نوه-نتیجهن، کؤتوجهن اوچون مال-مولک توپلاما. بیلمک اولماز ییغدیقلارین اونلارا قیسمت اولاجاق، یا یوخ. یا دا بئله دئیهک، اونلار سنین بو فداکارلیغینا، چالیشیب-چابالاماغینا لاییق اولاجاقلار، یا یوخ؟ اونوتما کی، یارادان هر کسین قیسمتینی اؤزو معین ائلهییر، اؤزو وئریر. سن هئچ ناراحات اولما. بونلار اوچون ده بو گون سنینله قوشا آددیملایان اینسانلارین قیسمتینه، سون تیکهسینه گؤز تیکمه، أل اوزاتما! بئله گئتسه سن جرجهنک اولا بیلرسن!
- آی آنا، او نه دئمکدی ائله؟ - نه قدر ده گولموشدو.
- بیر آز فیکیرلش، تاپارسان! - آناسی چوخ ناراحاتلیقلا دانیشیردی.
- بیر آیاغین کندده صحرالانمیش تورپاغین اوستونده، بیر آیاغین پا آوروپادا. آرادا قالان بدنین وضعیتی سنجه نئجه اولا بیلر؟ نه قدر دؤزه بیلر؟ بونون آدی نهدیر؟
اوستاد شهریار هر میصراعنی تکرار-تکرار اوخوماقدا ایدی:
سنی فرزانهلر آتدی،
قاپیب دیوانهلر توتدو...
کیملر آلدی، کیملر ساتدی،
ساتان دونیا، آلان دونیا...
یالان دونیا...
- گونآیدین، افندیم! - طب ایشچیسینین بوغوق سسینه خیالی محاکیمهلریندن آیریلدی. یالنیز گؤزلرینی چئویره بیلدی.
سالاملاشماق ایستهدی. دردینی سوروشماق ایستهدی... اونون اوزونه باخان قیز نه گؤردوسه گولله کیمی اوتاقدان چیخدی:
- دوکتور! دوکتور! - سس سالوندا عکس-صدا وئریردی. آز سونرا بیر اوردو حکیم اونو یئنه احاطهیه آلمیشدی:
- دئمک کی، ویروس اؤزونو تانیتماقدا، گؤسترمکدهدیر!
- یانی؟؟
- گؤرمهییرسیز، آدام قارالیب، چورومکدهدیر!
- دئمک، بؤیلهمی؟
- ائوئت، افندیم!
- دوکتور، بو کی اؤلمهمیش، دیری، نئجه چورویور؟!
- بیلمیرم کی!
- آنکارا-دان دوکتور «آکباش»ی دعوت ائتسکمی، افندیم؟
آمریکادان یئنی گلمیش... بیلیر بو خستهلییی.
- اولور، اولور. اوندا تئز اولون! - حکیملر سورعتله گلدیکلری کیمی، سورعتله ده گئتدیلر. کیشی بو دفعه عمللی-باشلی «اؤلدو» و سونرا خیریلدایا-خیریلدایا یئنیدن «دیریلدی».
- یوخ، قوربتده جان وئرمرم اؤلومه! بوردان چیخماق گرکدی! یوخسا اونو دیری-دیری باسدیراجاقدیلار! ایندی کیمه دئسین دردینی، نئجه آنلاتسین وضعیتینی؟ اونو بوردان کیم چیخاردا بیلر؟
خئیلی فیکیرلشدی. اونون یئرینه، وظیفهسینه گؤز دیکن معاوینینهمی زنگ ائلهسین؟ یا ألآتدان اونون علیهینه مطبوعاتا ماتئریال سیزدیران، اونا کلک گلن شریکینهمی؟ یا ایشچیلرینی اونا قارشی قویان آپارات رهبرینه؟ بلکه اونا یاخین اولان ناظیرلییه خبر وئرسین؟ یوخ، آلتمیش بئش یاشین اوستوندهدیر. خسته اولدوغونو بیلسهلر درحال وظیفهدن چیخاراجاقلار. گویا کیمیسه تاپسا دانیشا بیلهجکمی؟ یا عادی بیر مئساژ یازماق گوجوندهدیمی او؟ آمان آللاهیم، اینسان نئجه ده ضعیف مخلوق ایمیش!! بیر ویروسون الینده قالان دونیا!! سن نئجه ده قورخاق و عاجیزسن!!
گؤزلهمکدن باشقا چارهسی یوخ ایدی. دریندن نفس آلیب گؤزلرینی یومدو. دئیرلر، شاهلار، پاشالار قورخو آلتیندا ساخلایان، اونلارا قان اوددوران، یئددی مین یئددی یوز یئتمیش یئددی دلیسی ایله مئیدان سولایان کوراوغلو ایکی دفعه عاجیز دوروما دوشوب، دونیانین ألینی اوزوب، اؤلمک ایستهییب. بیر دفعه کئچل حمزه اونو آلدادیب، قولو-قانادی اولان قیرآت-ینی الیندن آلاندا، اؤزونو ده دییرمانین کونجونده تک قویاندا. هئچ هارا، هئچ نهیه ألی یئتمهین کوراوغلو «چونکی اولدون دییرمانچی، چاغیر گلسین دن، کوراوغلو!» - دئیرک یالنیز اوخوماقلا اؤز-اؤزونه تسکینلیک وئریب. بیر دفعه ده اودلو سیلاحی ایلک دفعه گؤرنده. قارشی-قارشییا قیلینجلا مردجهسینه دؤیوشن ایگید کولون دالیندان ایستهنیلن نامردین بیر گولله ایله اونو اؤلدورهجهیینی آغلینا سیغیشدیرا بیلمهینده... دئییلنه گؤره، کوراوغلو الینده سیلاحی اولان آدامین اوستونه قیشقیریرمیش کی، او سیلاحنان منی وور! کیشی ده یالواریرمش کی، سن نه دانیشیرسان، او سنی اؤلدوره بیلر!
- اولا بیلمز. او بیر قیریق دمیر پارچاسی کوراوغلونو اؤلدوره بیلمز! سن بیر هله وور گؤروم!
آخیردا علاجسیز قالان کیشی، - باخ، بو اینهیی وورورام، اؤلسه جریمهسی سنلیکدیر، دئییر. کوراوغلو صبرسیزلیکله راضیلاشیر. کیشی اینهیه بیر گولله وورور. اینهیین یئره ییخیلیب چاالادیغینی گؤرن کوراوغلو دونیانین چوخ دهییشدییینی، داها اونون کیمی قولوگوجلو قهرمانلارا احتیاجین قالمادیغینی آنلاییر.
... اوزاقدان ابراهیم تاتلیسسین گور، اؤزونهمخصوص زیل آوازی سوزولوب گلیردی. سانکی اونون اوچون اوخویوردو:
...گئجهنی یاشاریم، دوغماز گونشیم،
زامانسیز کوللندی یانار آتشیم...
...بیلینمز یوللارا گیرمیش کیمییم،
ایشیقلار آلتیندا سؤنموش کیمییم...
...بیر مجهولا دؤندو منیم حیاتیم
هاردا بیتهجک منیم حیاتیم؟..
قاریشیق سسلره گؤزونو آچدی. حکیم یئنه اونو دؤورهیه آلمیشدی. ایلاهی، ایری گؤزلوکلرین آلتیندان اونا ائله باخیردیلار، ائله بیل زوپارکا (باغوحش) ایندییه کیمی گؤرونمهمیش جانلی گتیرمیشدیلر! دئمک، اونون آخیری چاتیب! کیمسه اونو تانیمیر، کیم اولدوغونو بیلمیر. یقین کی، اوستونده میلچک کیمی، دووشان، یاراسا (خفاش)٬ سیچان کیمی تجروبه آپاراجاقلار، سونرا دا بیر درینین دیبینه باسدیراجاقلار... نه واختسا آروادی کمادان آییلسا، اوغلو حبسخانادان چیخسا، باکییا گله بیلسه، قیزی دا شرکتی ترک ائلهییب نورمال حیاتا قاییدا بیلسه... اونو آختاریشا وئرهجکلر... والسلام!..
- افندیم، تجروبهلی حکیم خستهنین اوزونه، رنگینه باخان کیمی هاراسینین خسته اولدوغونو بیلمهلیدیر!
- دوکتور، بیز اونون اوزونهمی، رنگینهمی باخدیق؟ بوراسی بیر قرنطینه!!
- اولسون قرنطینه. گؤرورسوز کی، بو آدام ترپنه بیلمیر، دانیشا بیلمیر، فیکیرلشمهدیز بونون باشقا بیر خستهلییی اولا بیلر؟ خستهلیک تکجه ویروسدانمی عیبارتدیر؟
- افندیم، قصورا باخمایین، دوشونهمهدیک... دوشونمهیه بئله زامانیمیز اولمادی...
- دئیین کی، قورخدوق! هئچ اونون یانینا دا گئتمهدیک! نه اولوب؟ بو طاعون-دومو، وبا-دیمی؟ اورتا عصرلردیمی؟ بو قدر طبین، طب آلتلرینین اولدوغو، اینکیشاف ائتدییی زاماندا یاشاییریق! آخی دئییب کی، بو عادی گریپین یئنی نؤوعو! دئمک، اولکی معالجهنین ایکیقاتینی آپاراجاغیق، یاناشی خستهلیکلرینی ده معالجهسینی تشکیل ائتمک شرطی ایله. ایندی ایسه درحال عملیاتا حاضیرلایین. بو، قلب کریزی (حمله قلبی) کئچیریب. غفیل اؤلوملرین دوخسان بئش فایزینی تشکیل ائدن اورک دامارلارینی قان لاختاسی ایله توتولماسی. شانسلی آداممیش کی، ساغ قالیب.
داوامی وار...
