آنا صحیفه ادبیات |
کولت. آذ آقشین یئنیسئیین " شکیل" آدلی شعیرینی تقدیم ائدیر:
ائوده تکهم،
شکیلینه باخیرام
زنگ ائلییر آروادیمین خالاسی…
یاغیش یاغیر چکدیردیین شکیلده
بیر ایت ده وار،
آرسیز حیت تولاسی
یاغیش یاغیر چکدیردیین شکیلده
حتی بیر آز کولک اسیر، سازاقلی
سول یانیندا حزنلو بیر اوزاق وار
شکیللرده یاخشی دوشور اوزاقلیق
بیر کیشی ده کئچیر آرخا طرفدن
هئچ باخمیرسان،
گؤزون ائله مندهدیر
حیاتا باخ، نئجه گؤزل یالاندی
گئجه کئچیر،
عؤمور قالیر،
گون گئدیر
او کیشیدن منیم گؤزوم سو ایچمیر
او کیشینی تانیمیریق سن، یا من.
او کیشینی ائودهن قووا بیلمیرم
نئچه ایلدیر، بیزده قالیر شکیلنن
گئجه هردن هورور حیط تولاسی
- آی ایت! آی ایت!
چیمخیریرام شکیله
بو شکیلده اؤزوندن ده گؤزلسهن
نئجه ائدیم بو شکیله چکیلهم؟
بیر اوشاق دا برک-برک توتوب الیندن
ساغین اوشاق،
سول طرفین اوزاقلیق
من بیلیرم،
شکیللره چکیلیب
قوجالیقدان دالدالانیر اوشاقلیق
بیلیرم کی، یورولموسان شکیلده
نئجه آلیم الیندهکی سبتی
نئجه اؤپوم یانینداکی اوشاغی
نئجه قوووم
او کیشینی، او ایتی
نئجه قوووم،
کیشی بلکه اریندیر
اوشاق سیزین،
ایت ده ائوین تولاسی
ائوده تکهم،
شکیلینه باخیرام
زنگ ائلییر آروادیمین خالاسی.
تاریخ
2020.07.10 / 17:15
|
مولف
Axar.az
|