آنا صحیفه ادبیات |
کولت. آذ ملا ولی ویدادینین "آغلارسان" آدلی شعیرینی تقدیم ائدیر:
دلی کؤنول، گل ایلهنمه غوربتده،
بیر گون اولور وطن دئییب آغلارسان.
یادلار ایله عؤمور چورور حسرتده،
بیر گون اولور وطن دئییب آغلارسان.
یاخشی گونده یارو یولداش چوخ اولور،
یامان گونده هئچ بولونماز، یوخ اولور.
یاد ائللرین تنه سؤزو اوخ اولور،
بیر گون اولور وطن دئییب آغلارسان.
من گؤرموشهم بو غوربتین دادینی،
یانیب-یانیب چوخ چکمیشهم اودونو.
غملنیرسن هر گؤرهنده شادینی،
بیر گون اولور وطن دئییب آغلارسان.
اوخودوقجا غمگین شعری-غزلی،
کهنه یارالارین بیر-بیر تزهلی،
یادا دوشر کچن گونون ازلی،
بیر گون اولور وطن دئییب آغلارسان.
یادا دوشر باغچالارین، باغلارین،
آلا قارلی، بوز دومانلی داغلارین،
قوجالیرسان کئچر جاوان چاغلارین،
بیر گون اولور وطن دئییب آغلارسان.
کئچهن گونو بیر-بیر خیال ائیلرسهن،
دولار غم کؤنلونه ملال ائیلرسهن.
گلندن-گئدندن سوال ائیلرسهن،
بیر گون اولور وطن دییب آغلارسان.
هر مزارا دوشر اولسا گوزارین،
یادا دوشر آتا-آنا مزارین.
ویدادی خسته تک آرتار آزارین،
بیر گون اولور وطن دئییب آغلارسان.
تاریخ
2020.07.14 / 17:15
|
مولف
Axar.az
|