کولت. آذ خلیل رضا اولوتورکون "یوردوم، سنین ساغلیغینا..." آدلی شعیرینی تقدیم ائدیر:

بیر مجلیس‌ده اونودولدوم،
می ایچدیلر هر گلنین ساغلیغینا،
هر گئدنین ساغلیغینا.
یاخاسینا قوندوغوموز ماوی گؤلون ساغلیغینا،
می گتیره‌ن شوخ گؤزلین ساغلیغینا.
گول‌دانداکی قیزیل گولون ساغلیغینا،
خوش قدملی آیین، ایلین ساغلیغینا
اونودولدوم.نه توتولدوم، نه پرت اولدوم،
پیچیلدادیم اؤز-اؤزومه - خلیل، سنین ساغلیغینا!
دؤرد عمانی قوجاقلایان اوریینین ساغلیغینا!
قوشقار، ساوالان دایاغی کوریینین ساغلیغینا!
غیبته ائتسین قوی دان یئری ساچلارینین
تکم-سئیرک آغلیغینا،
ای دوست، سنین ساغلیغینا!
اوتوز ایللیک دؤیوشونده بیر عصرلیک یول کئچدین سن،
باسیلمادین، سارسیلمادین.
هئچ بیر زامان قولتوقلارا قیسیلمادین.
شاخ یئریدین اؤز یولونلا، دوز یولونلا!
من هئیرانام سنین قایا دؤزومونه، داغلیغینا.
دوداغیما سیخا-سیخا پیاله‌نی،
ایچیره‌م بو شلاله‌نی، کؤنلوم، سنین ساغلیغینا!
دوست، یا دوشمن گؤروشونه بیرجه آن دا گئجیکمه‌یه‌ن،
هئچ بیر زامان خستلنمز،
روحو ائنمز، عهده صادق، بئینی یانار، قلبی قاینار
بیر اوغول وار - خلیل، سنین ساغلیغینا!
سن ائله بیر قارتال‌سان کی، قالخماغین وار، ائنمیین یوخ.
سن ائله بیر اوجاقسان کی، یانماغین وار، سؤنمیین یوخ.
سن ائله بیر یول‌چوسان کی ، مسلکیندن دؤنمیین یوخ،
تعریف، چلنگ پایلاناندا سوسماغین وار، دینمیین یوخ.
آیاغین یئر کوره‌سین‌ده، الین چاتیر آیا، مارسا،
جهان‌دا بئش اوغول وارسا، سنسن بیری، خلیل رضا!
شعریمیزین خوش تالعیی، آغ باختیسان،
دؤیوشکنمی دئییم سنه، سن دؤیوشلر پایتختی‌سان!
هئچ بیلمیرم افو ائلرمی دوستلار منی؟
من اؤتدوم بو ترانه‌نی، بورویرکه‌ن ووقار منی.
ائلیم-گونوم، سسیم-اونوم،
بو قند-شکر پیاله‌نی ووردوم سنین ساغلیغینا،
اؤز ساغلیغیم بهانه‌دیر، یوردوم، سنین ساغلیغینا!...