کولت. آذ محمدحسین شهریار این اؤز سسیله "یالان دونیا" آدلی شعیرینی تقدیم ائدیر:

سنین بهره‌ن یئیه‌ن کیم‌دیر؟
کیمینکی‌سه‌ن؟ یئیه‌ن کیم‌دیر؟
سنه دوغرو دئیه‌ن کیم‌دیر؟
"یالان دونیا، یالان دونیا!"
سنی فرضانه‌لر آتدی،
قاپیب دیوانه‌لر توت‌دو،
کیمی آلدی، کیمی ساتدی،
ساتان دونیا، آلان دونیا،
آتی ازل داغا سالدیق،
یورولدوقجا دالی قالدیق.
آتی ساتدیق، اولاق آلدیق،
یهر اولدو پالان، دونیا.
چاتیب سن‌دن کئچه‌ن کئچدی،
اجل جامین ایچن کئچ‌دی،
اولان-اولدو، کئچه‌ن-کئچدی،
نه ایستیردین آلان دونیا.
بوغولایدین دوغان یئرده،
دوغوب، خالقی بوغان یئرده،
اوغول نعشین اوغان یئرده
آنا زولفون یولان دونیا.
قازانیب، هی تالانیبسان،
قالانیب هی جالانیبسان،
ازلدن چالخالانیبسان،
یئنه ده چالخالان، دونیا!
ننه قارنی ایلک بئشیین،
قبریستان‌لیق سون دئشیین.
نه ایچرین، نه ائشیین،
قاران‌لیق بیر دالاندی دونیا.
سنی بایقوشلار آلقیشلار،
دلی ویرانه‌نی خوشلار.
دولان عقله سنی بوشلار،
ایچی بوشلا دولان دونیا.
سنه قارونلار آللاندی،
قیزیل‌دان تل‌لی قاللاندی،
باتیب ظلمته قویلاندی،
اؤلوب تل‌لی قالان دونیا.
اوجاق ایک‌ن سؤنیمیش‌سه‌ن،
چاناق ایک‌ن چؤنیمیش‌سه‌ن،
نه پیس قان ننیمیش‌سه‌ن
ناغیل! یالان-پالان دونیا.
بیری آینا، بیری پاس‌دیر،
بیری آیدین، بیری کاس‌دیر،
گئجه توی‌دور، سحر یاس‌دیر،
گول ایچین‌ده سولان دونیا.
ایگیدلرین باشین یئیه‌ن،
قوجالار بوزباشین یئیه‌ن،
قبیرلرین داشین یئیه‌ن،
اؤزو یئنه قالان دونیا!
نه قاندین، کیم گول اکندیر؟
کیم قیلینج تک قان تؤکندیر؟
تیمور هله کورکندیر،
چینگیز جانین آلان دونیا.
یامان قورغو، ییغیلایدین!
توفانلاردا بوغولایدین!
نولئیدی بیر داغیلایدین،
بیزی درده سالان دونیا