کولت. آذ اوشاق ادبیاتی سیلسیله‌سین‌دن سحر خیاوینین "ناغیل" شعیرینی تقدیم ائدیر:

بیر گون گؤم-گؤی مئشه‌ده
ایکی مارال ساواشدی
او بونا یامان دئدی
بو دا،اونا ساتاشدی
قووزاندی برک توز-دومان
بیری ده یوخ آییران
بوینوزلاری قاریشدی
بیربیرینه ساریشدی
آغاج دالیندان باخان
زیرنگ،ایگیت بیر آسلان
گؤرونتونو گؤروردو
نقشه‌لرین هؤروردو
لاپدا ایتیلتدی دیشین
سازالتدی شیکار پئشین
یورودو ماراللارا
ناجاق کیمی، داللارا
آیریلیب بیری قاشدی
بیری قانا بولاشدی
چکدی ایتی دیشینه
باخ دونیانین ایشینه
بئله ساواشسا دوستلار
دوشمانلار قورقو قورار
یالقیز تورا سالارلار
یئییب ده کام آلارلار
گوُزل اوغول-قیزلاریم
سَما دا اولدوزلاریم
مندن سیزه نصیحت:
"وئرمه‌ دوشمانا فورصت"
دال:شاخه
ناجاق: تبر