کولت. آذ ملا پناه واقیفین "دورنالار" آدلی شعیرینی تقدیم ائدیر:

بیر زامان هاوادا قاناد ساخلایین،
سؤزوم واردیر منیم سیزه، دورنالار!
قطارلاشیب نه دیاردان گلیرسیز؟
بیر خبر وئرینیز بیزه، دورنالار!
سیزه موشتاق دورور بغداد ائللری،
گؤزله‌یه-گؤزله‌یه قالیب یوللاری،
آستا قاناد چالین، قفیل تئللری
حیف‌دیر، سالارسیز دوزه، دورنالار!
خیلی واخت‌دیر یارین فراغین‌دایام،.
پروانه تک حوسنون چیراغین‌دایام،
بیر آلا گؤزلونون سوراغین‌دایام،
گؤرونورمو، گؤرون، گؤزه، دورنالار!
من سئومیشه‌م آلا گؤزون سورمه‌سین،
بدنظر کسیبه‌ن، زیان وئرمه‌سین،
ساقین گزین، لاچین گؤزو گؤرمه‌سین،
قورخورام صفنیزی پوزا، دورنالار!
نازنین-نازنین ائدرسیز آواز،
روحلار تازه‌لنیر، اولور سرفراز،
واقیفین ده کؤنلو چوخ ائدر پرواز
هردن سیزین ایله گزه، دورنالار!