۲۴ یانوار تبریزلی شاعر، ساتیرا اوستاسی و ژورنالیست مجید صباق ایرانینین (یالقیز) آنیم گونودور.

Kult.az خبر وئریر کی، یالقیز ۱۹۳۷-جی ایلده تبریزین چایکنار محله‌سین‌ده دوغولوب.

او، ایلک و اورتا تحصیلینی باشا ووردوقدان سونرا ادبیات و مئدیا فعالیتی ایله مشغول اولوب.

دورو مطبوعات‌دا مختلیف اجتماعی و مدنی مزمونلو یازیلارلا چیخیش ائد‌ن یالقیز اوزون ایللر تبریزده بوراخیلان "عصر آزادی" قزئتینین آذربایجان دیلی بؤلمه‌سینده فعالیت گؤستریب.

اولجه، "مجید صباق ایرانی" امضاسی ایله یازان شاعر و ژورنالیست اوغلونون واختسیز اؤلوموندن سونرا "یالقیز" تخللصونو سئچیر و بو امضا ایله چیخیش ائدیر.

او، اوزون سوره‌ن قاراجیر خسته‌لیگی سببین‌دن ۲۰۱۱-جی ایلین ۲۴ یانوارین‌دا تبریزده دونیاسینی دییشیب.

یالقیزین آذربایجان دیلینده یازدیغی "جیغان-ویغان"، "چال حاچال" و "چیغیر-باغیر" شعیر کیتابلاری نشر ائدیلیب.

منده توستوله‌ییب، آلیشیب یاندیم

آلوووم سؤنسه ده، کؤزوم قالاجاق...

قارا یئل اسه ده، سؤندورسه منی

کولوم داغیلسا دا، توزوم قالاجاق

پرده-پردکولوم بیر کتاب اولسا

عالمه یاییلیب سؤزوم قالاجاق.

یانمادیم اؤزومه، یاندیم ائل اوچون

یانان اورکلرده یازیم قالاجاق.

دونیادا آختاردیم گؤزللر ایزین،

گؤزللر ایزینده گؤزوم قالاجاق.

بیر یئنی یول سالدیم "یالقیز" عادیله

اؤلسم ده بو یولدا ایزیم قالاجاق...

*

اؤلوباز بیر دلی خلقیک، بیزه بو ارثدی باشدان

کئچریک بیر اؤلودن خاطره مین بیر دیری باشدان

اؤلو حاقیندا قوشوب یازدیغیمیز نؤحه، مراثی

دیریلر بیر یانا قان-یاش چیخارار قاپقارا داشدان

اؤلونون آردیجا احسان وئرریک یاغ، دویو تای-تای

دیری اؤلمکده آجیندان پایی یوخ بیر کاسا آشدان..!