بو گون آذربایجانین خالق آرتیستی محمدرضصا شیخ‌زامانووون آنیم گونودور.

Kult.az خاطیرلادیر کی، او، ۱۹۱۵-جی ایلده گنجه‌ده دوغولوب.

آذربایجان‌دا سووئت حاکمیتی قورولان‌دا یئنی حکومت دیگر وارلی آداملار کیمی اونلارین دا مال-دولتینی اللریندن آلیب. آناسی بیر بؤیوک اوتاق قارشیلیغیندا یاشادیقلاری مولکون یئرینده فابریک آچیلماسینا اجازه وئریب. هله کیچیک یاشلاریندان تئاترا اولان هوه‌سی اونو جعفر جبارلی آدینا گنجه دولت درام تئاترینا گتیریب.

تئاترین رژیسورو حبیب اسماعیلووون تشببوسو ایله تئاترا دعوت ائدیله‌ن محمدرضا شیخ‌زامانوو ایلک دفعه حمیدین "هیند قیزی" تماشاسین‌دا براهما آدلی اوبرازی جانلاندیریر.

تئاتردا چالیشدیغی دورده "واقیف" (ائلدار)، "فرهاد و شیرین" (فرهاد)، "یاشار" (امام‌یار)، "ایکی قارداش" (یوری) و دیگر تماشالاردا یادداقالان اوبرازلار یارادیر. ۱۹۵۴-جو ایلده آذربایجان دولت آکادمیک درام تئاتریندا ایشه باشلاییر. و ائله او واختدان اعتباراً ده صنعت یولونداکی "یاشیل ایشیغی" داها دا گور یانماغا باشلاییر. یاراتدیغی مختلیف سپکیلی اوبرازلارلا داها چوخ تانینیر و سئویلیر. تئاتردا "گؤز حکیمی"نده شاهبازوو، "قیش ناغیلی"ندا پولیکسن، "فرهاد و شیرین"ده خسرو، "واقیف"ده قاجار، "اوتئلو"دا اوتئللو، "آیدین"دا آیدین، "قاچاق نبی"ده قاچاق نبی، "واقیف"ده ائلدار کیمی بیر-بیریندن فرقلنه‌ن، پسیخولوژی، دراماتیک اوبرازلاری اؤزونمخصوص شکیل‌ده یارادیر.

بؤیوک اکرانا ایلک دفعه "بختیار" فیلمینده رجبوو رولو ایله ۱۹۵۵-جی ایلده چیخیر. مختلیف ایللرده "قیزمار گونش آلتین‌دا"دا علی کیشی، "لیلی و مجنون"دا درویش، "بیر قالانین سیرری"نده حکیم الدوستو، "اونو باغیشلاماق اولارمی"دا پولکوونیک قربانوو، "قاطر مممد"ده گنجه قوبرناتورو، "نسیمی"ده شیخ اعظم کیمی اوبرازلار یارادیر.

۱۹۶۳-جو ایلده بؤیوک صنعتکاریمیز موسیقیلی کمدییا فیلمینده - "احمد هارادادیر"دا شیرین کیشی رولوندا چیخیش ائدیر.

او، گنجه‌نین حرمت‌لی عائله‌لریندن بیرینین قیزی اولان نیگار خانیما عاشیق اولور. گنج آکتیورون حسلری قارشیلیقسیز قالمیر. اما بؤیوک مانعه‌لرله قارشیلاشیرلار. نیگار خانیمین آتاسی بی نسلیندن اولدوغو اوچون بو ازدواجا هئچ جور راضی اولمور. قیزینی گنج آکتیورا اره وئرمکدن ایمتینا ائدیر. نهایت، محمدرضا نگار خانیما الچی گؤندرمک فیکریندن داشینیر ۱۹۳۸-جی ایلده اونو قاچیریر.

بو ازدواج‌دان اونلارین اوچ قیز اولادی دونیایا گلیر.

اونون قارداشی علسگری ایتالییایا، باجیسی حمیده‌نی تورکییه‌یه، اؤزونو ایسه پانتورکیست کیمی قازاخیستانین سمیپالاتینسک بؤلگه‌سینه مهاجیرته گؤندریرلر.

تهلوکه‌سیزلیک خیدمتینین امکداشلاری نگار خانیما اریندن بوشانماغی مصلحت گؤرورلر. نگار خانیم ایسه "اریم هاردا، من ده اوردا" - دئییر؛ حیات یولداشی ایله بیرگه عذاب-اذیتلی، محرومیتلرله دولو سورگون حیاتی یاشاماغا راضیلاشیر.

۱۴ ایل سورگون حیاتی یاشایان محمدرضانین آمنیستییا کاغیذینی اوندان گیزلدیرلر. او، عائله‌سی ایله برابر قاچاراق گنجه‌یه گلیر. ائو یوخ، ایش تاپا بیلمیر... بیر گون صمد وورغونلا گؤروشور. البته، صمد وورغون، تماشالاریندا محمدرضانین ماراق‌لی اوبرازلار یاراتدیغینی اونوتمامیشدی و او آکتیورا کمک ائدیر. صمد وورغونون سایه‌سینده اونون ایکینجی سورگون حیاتینا سون قویولور. ۱۹۵۴-جو ایلده مدنیت ناظیرلیینین امری ایله آکادمیک درام تئاتریندا آکتیور ایشتاتینا قبول ائدیلیر. اونون آرتیق قیرخ یاشی واردی.

سورگونده اولدوغو ایللرده اکیز اوغلان و بیر قیز اولادلاری دونیایا گلیر، اما کؤرپه‌لر تلف اولور.

۱۹۵۹-جو ایلده توفیق باغیروو ممحمدرضانین آدینی قارا سیاهیدان چیخاردیر و او، امکدار آرتیست آدینا لاییق گؤرولور. ۱۹۷۴-جو ایلده خالق آرتیستی آدینی آلیر.

اختیار رولونا گؤره ایسه اونا اؤلوموندن سونرا دولت مکافاتی وئریلیب.

صنعتکار ۱۹۸۴-جو ایل یانوارین ۲۵-ده وفات ائدیب.