سئویله‌رک دینله‌نیله‌ن، سرحد تانیمادان تورک دونیاسیندا یاییلان «آلدیرما گؤنول، آلدیرما» تورکوسونون ماراقلی یارانما تاریخچه‌سی وار.

Kult.az سؤزلری صباح‌الدین علی‌یه مخصوص اولان ماهنینین یارانما تاریخچه‌سینی تقدیم ائدیر:

تورکییه‌لی یازیچی و شاعر صباح‌الدین علی (آذربایجان‌لی اوخوجولار اونو «خز پالتولو مادونا»، «کویوجاکلی یوسوف»، «ایچیمیزده‌کی شیطان» کیمی اثرلری ایله تانیییرلار) ۱۹۴۷-جی ایلده کمونیست دوشونجه‌لرینه، سیاسی باخیشلارینا گؤره قارا دنیزین ساحلینده یئرلشن سینوپ قالاسیندا حبس‌ده یاتیردی. شاعر حبسخانا دیوارلارینی یویان دنیزین دالغالارینین سسینی ائشیدیر، قوخوسونو آلیر، اما گؤره بیلمیردی. اونا گؤره ده قالدیغی هجره‌نین کیچیک نفسلییندن گؤی اوزونو سیر ائده-ائده اوخویوردو:

گؤرمسن بیله دنیزی

یوکارییا چئویر گؤزو

دنیز گیبی‌دیر گؤک یوزو

آلدیرما گؤنول آلدیرما.

باشین اؤنه اییلمه‌سین،

آلدیرما گؤنول آلدیرما.

آغلادیغین دویولماسین،

آلدیرما گؤنول آلدیرما.

دیشاریدا دلی دالقالار،

گئلیپ دووارلاری یالار،

سنی بو سسلر اویالار،

آلدیرما گؤنول آلدیرما.

صباح‌الدین علی ایکی دفعه حبس‌ده اولوب. «آلدیرما گؤنول» دئسه ده، روحو آزادلیغا جان آتان شاعر حبس‌دن قاچیر، کیرکلارائلی دیاریندان بولغاریستانا کئچمک ایستیرکه‌ن سرحدده گوله‌لنیر و ۴۱ یاشیندا حیاتا ویداع ائدیر.

شاعر اؤزو حبس‌ده اولسا دا، شعیری اونون ساغلیغیندا آزادلیغا چیخا بیلدی. کمونیست گنجلر بو شعیری مختلیف ملودییالارلا آزادلیق مانیفستی کیمی اوخویوردولار.

شاعرین اؤلومو ایله «آلدیرما گؤنول» بیر باشقا معنا داشیماغا باشلادی.۱۹۵۰-جی ایللرین سونوندا گنج تورکوچو ائدیپ آکبایرام بو سؤزلره موسیقی بستلییر، «آلدیرما گؤنول» دیلدن-دیله دوشور. ناکام عمور سورن شاعرین نیسگیللی شعیری سیاستین قربانی اولان بیر ضیالینین آدینی خالقین کؤنلونه حک ائدیر.

اؤزو ماوی گؤیلره، دنیزلره، ساده‌جه اینسان کیمی آزاد یاشاماغا دویمادان اؤلسه ده، حسرت قوخویان ماهنی‌سی ۷۰ ایلده‌ن چوخدور سئویلیر، ائلدن-ائله قاناد چیرپیر.