بو گون اس.اس.ار.ای خالق آرتیستی، دولت مکافاتی لاورئاتی لیلا وکیلووانین آنادان اولماسینین ۹۷-جی ایلدؤنومو تمام اولور.

Kult.az خبر وئریر کی، لیلا وکیلووا ۱۹۲۷-جی ایل یانوارین ۲۹-دا باکی‌دا دونیایا گؤز آچیب.

خوروگرافییا مکتبینده بؤیوک صنعتکار قمر آلماسزاده‌دن صنعتین اینجه‌لیکلرینی اؤیرنیب، ۱۹۴۳-جو ایلده‌ن آذربایجان دولت آکادمیک اوپرا و بالت تئاترینین بالت تروپپاسینا سولیست قبول ائدیلیب. اختصاصینی تکمیللشدیرمک مقصدیله ۱۹۴۵-۱۹۴۶-جی ایللرده مسکوا خوروگرافییا مکتبینده خصوصی کورس کئچیب، باکییا قاییتدیقدان سونرا اوپرا و بالت تئاترینین آپاریجی بالت آکتریساسی کیمی چالیشیب.

لیلا وکیلووا مختلیف ایللرده آدامین «ژیزل»، قلیرین «قیرمیزی لاله»، چایکووسکینین «سونالار گؤلو»، «یاتمیش گؤزل، آسافیئوین «باغچاسارای فوواره‌سی»، بدلبیلینین «قیز قالاسی»، قارایئوین «یئددی گؤزل»، «ایلدیریملی یوللارلا» و دیگر بالتلرده یاددا قالان اوبرازلار یارادیب.

لیلا وکیلووانین ایفاسی اموسیوناللیغی، ظریف‌لییی، جوشقونلوغو، چئویک‌لییی ایله سئچیلیردی. پسیخولوژی مزمونا مالیک حرکتلری سانکی دیل آچیب دانیشیردی.

لیلا وکیلووانین یاراتدیغی اوبرازلار مکمل بدیعی-خورئوگرافیک صورتلر کیمی بالت صنعتیمیزین اینجیلریندندیر.

گؤرکملی بالرینا کئچمیش اس.اس.ار.ای-نین رسپوبلیکالاریندا، ائلجه ده دونیانین بیر چوخ اؤلکه‌لرینده ایفاچی و بالتمیستر کیمی گاسترول سفرلرده اولوب. ۱۹۵۹-جو ایلده مسکوادا کئچیریلن آذربایجان اینجه‌صنعتی اونگونلویونده بالرینا «قیز قالاسی»، «یئددی گؤزل» و «گولشن» اثرلرینده باش روللاردا چیخیش ائدیب. وکیلووانین مسکوا چیخیشلاری آذربایجانلی بالرینانین «اولدوز ساعتی» آدلاندیریلیب.

بالت اوستاسی ۱۹۵۳-جو ایلده‌ن عمرونون سونونادک باکی خورئوگرافییا مکتبین‌ده کلاسیک رقصلر فندینی تدریس ائدیب و ۱۹۹۲-جی ایلده‌ن بو تحصیل اوجاغینین بدیعی رهبری اولوب. او، همچینین ۱۹۷۶-۱۹۸۲-جی ایللرده آذربایجان دولت رقص آنسامبلینا رهبرلیک ائدیب.

گؤرکملی بالت اوستاسی لیلا وکیلووا ۱۹۹۹-جو ایل فورالین ۲۰-ده باکی‌دا وفات ائدیب، فخری خیاباندا دفن اولونوب.