بو گون روک، پوپ و معاصر تورک موسیقی صنعتینین گؤرکملی نماینده‌سی باریش مانچونون آنیم گونودور.

Kult.az خبر وئریر کی، او، ۱۹۴۳-جو ایل یانوارین ۲-ده اوسکودار ایالتینده کونیالی کارامانجو طایفاسینا مخصوص عائله‌ده آنادان اولوب.

باریشین اوچ یاشی اولاندا والیدینلری آیریلیر. باریش آتاسینین حمایه‌سینده قالسا دا، گؤزل تورکولر اوخویان موسیقی معلمه‌سی – آناسی ایله تئز-تئز گؤروشور. آنانین موسیقی صنعتینه سونسوز محبتی اوغلونون جانینا هوپور. بو ماراق اونو بلچیکا کرال آکادمییاسینا آپاریر. او، بورادا رسم، گرافیکا، معمارلیق صنعتینی اؤیرنیر.

باریش بلچیکادا آندری سوولاج آدلی بیر شاعرله تانیش اولور و اوندان فرانسیز دیلینی مکمل اؤیره‌نمه‌یه چالیشیر. آندری باریشین موسیقی‌سینه شعیرلر یازیر. باریش کیچیک کنسرتلر وئره‌رک فرانسیزجا اوخوماغا باشلاییر. بیر گون باریشی فرانسیز رادیوسو پوپ موسیقی مزمونلو بیر پروگرامینا دعوت ائدیر. او، اؤز ماهنیلارینی رادیو واسطه‌سیله یاییملاییر. لاکین فرانسانین مشهور بیر صنعتچیسی آکسنتله اوخودوغونا گؤره باریشین ماهنیلارینین سسلندیریلمه‌سینه قاداغا قویولور.

آوروپاداکی موسیقی کاریراسینین بیتدیینی دوشونن باریش، یئنی‌دن ایستانبولا دؤنور. اوزون ساچلی، قالین بیغلی، درویش چوخالی، چارخلی، قولباقلی درویش باریش مانچو تورک موسیقی‌سینی روک و جازلا قاریشدیراراق، تمامیله یئنی موسیقی آلتیندا، سئویم‌لی بیر سسله اوخویور. لاکین محافظه‌کار تورکییه جمعیتی اونون غیری-عادی ایمیجینی، اوزون ساچلارینی قبول ائلیه بیلمیر. حتی، بونا گؤره، باریشین حیاتی دفعه‌لرله تهلوکه آلتیندا قالیر.

باریشین حیاتین‌دا اوچ قادین اولوب. ایلک یاشادیغی خانیملا بلچیکادا تصادفن تانیش اولوب. بیر نئچه ایلدن سونرا باریش، تورکییه گؤزللیک یاریشماسینین کرالیچاسی سئچیلن عزرا بالکانلا ائولنیر. تخمیناً، بیر ایلده‌ن سونرا بو مناسیبته ده سون قویولور. اوچونجو دفعه لاله چاغلار ایله باش-باشا وئریب یاشایان باریش، عمرونون سونونا قدر اوندان آیریلمیر. بو ائولیلیکدن اونلارین باتیخان و دوغوخان آدلی ایکی اوغلو دونیایا گلیر. صنتچینین قیزی اولسا دا، تأسف کی، جمعی بیر نئچه آی یاشاییب. باریش اونون آدینی گولپمبه قویوبموش. درویشین "گولپمبه» ماهنی‌سینداکی یانغی دا بوندان ایمیش!

باریش مانچونو دونیانین هر یئرینده سئویرلر. اونون اوخودوغو نغمه‌لرده شرقله غرب بیرلشیر، قایناییب-قاریشیب. باریش شاعر ایدی، بستکار ایدی، اوخویان درویش ایدی. باریش اوشاقلار و بؤیوکلر اوچون کولتور-ایله‌نجه پروگرامی اولان "۷-دن ۷۷-یه» آدلی سون درجه ماراقلی بیر وئریلیشین یارادیجیسی و آپاریجی‌سی ایدی. باریش "میللیت» قزئتینده "اوکو، باکالیم!» روبریکاسی آلتیندا گونده‌لیک حیاتدان یازیلار یازیردی. باریش هم ده بوگونکو ائو-موزئیینی زنگینلشدیره‌ن عنتیق اشیالار توپلاییردی.

باریش مانچو ۱۹۹۱-جی ایلده خالق صنعتچیسی آدینا لاییق گؤرولوب.

او، ۲۵ ایل بوندان اول فورالین ۱-ده اینفارکت (سکته قلبی) کئچیریب و دونیاسینی دییشیب. اؤلوموندن سونرا صنعتکارین ۱۸ ایل عائله‌سیله بیرگه مدا کوچه‌سینده یاشادیغی ائو موزیه چئوریلیب.