ایشیمیز دوز گئتمه‌یه‌نده «لعنت سنه کور شیطان» ایفاده‌سینی تئز-تئز ایشلدیریک. گؤره‌سن، شیطانا نه اوچون کور دئییریک؟ بو ایفاده نئجه یارانیب؟

Kult.az «بئله یارانیب»روبریکاسیندا "کور شیطان" ایفاده‌سینین یارانما تاریخچه‌سینی تقدیم ائدیر:

دینی روایتلره گؤره، شیطان اینسان یارانمازدان اؤنجه اللها صداقتله قوللوق و عبادت ائدیرمیش. الله اونو آتش‌دن، جینلری توستودن، اینسانی ایسه تورپاقدان خلق ائدیر. اینسان یارادیلدیقدان سونرا تانری شیطانا امر ائدیر کی، یئنی یاراتدیغی آلی وارلیغا سج‌ده ائتسین. بوتون یارانمیشلار سج‌ده ائتسه ده، ایبلیس (شیطانلارین لیدئری) اوددان یارانان مخلوقون تورپاقدان یارانمیشا سجده ائتمیجیینی دئییر.

شیطان الله-تعالینین اونا بخش ائتدیی یاخشیلیق و نعمتلره، هدیه و التفات‌لارا محل قویمادان تکببور گؤستردیینه، «آد‌مه سجده ائت» امرینه عصیان ائتدیینه گؤره، کور و نانکور حساب ائدیلیب. او لعنتلنیر، رحمت‌دن اوزاقلاشدیریلیر. اللها قارشی چیخانا قدر ائتدیی عبادتلرین خطرینه الله اونا محلت وئریر. شیطان ایسه قیامت گونونه قدر اللهین چوخ سئودیی اینسانلاری یولدان چیخاریب اؤز آرخاسینجا آپاراجاغینا سؤز وئریر.

بو ایفادنین یارانماسینی باشقا بیر افسانه ایله ده علاقه‌لندیریرلر.

اسلام عالمینده مشهور اولان بیر روایته گؤره، ابراهیم پیغمبر اوغلو اسماعیلی الله اوچون قربان کسمه‌یه آپارارکه‌ن شیطان ایسماعیلین گؤزونه گؤرونور. یول بویو اسماعیلین آتاسی طرفیندن قربان ائدیلجیینی بیلدیرن شیطان اونو عصیانا سسلییر. ایسماییل اونو قووماق اوچون یئردن بیر داش گؤتوروب شیطانا آتیر و شیطانین سول گؤزو کور اولور. بوندان سونرا اسلام عالمینده شیطان کور اولاراق بیلینمه‌یه باشلاییب.

آنجاق «کور شیطان» ایفاده‌سینین ایشلدیلمه‌سینی محمد پیغمبر اویغون گؤرمه‌ییب. اونون فیکرینجه، غضبله‌نمک، اونا پیس سؤزلر سؤیله‌مک، لعنتله‌مک شیطانین گوجونو ، قوتینی آرتیریر. اینانجا گؤره، شیطانین گوجونو آلان یگانه سلاح «بیسمیللاه» کلمه‌سی‌دیر.

خریستیان عالمینده ده شیطان «کور» اولاراق آنیلیر. قدیم دینی کیتاب اولان «ائوانگلییا» دا پاولین مکتوبلاریندا شیطان-دمون حاقین‌دا کور ایفاده‌سی ایشلدیلیب.