بو گون ریاضیاتچی، کمپوتر عالمی، الکتریک مهندسی، صونعی ذکا تدقیقاتچی‌سی و کالیفورنییاداکی برکلی اونیورسیتتینده کمپوتر اوزره امکدار پروفسورودو لطفعلی رحیم اوغلو علی‌عسگرزاده-نین دوغوم گونودور.

Kult.az خبر وئریر کی، لطفعلی علی‌عگرزاده ۴ فورال ۱۹۲۱-جی ایلده باکی‌دا دوغولوب.

آتاسی رحیم علی‌عگرزاده آذربایجان اصیللی‌دیر و اردبیلده دوغولوب. آناسی فانیا کورنمان یهودی اصیللی روسدور.

۱۹۳۳-جو ایلده باغیروو گؤستریش وئرمیشدی کی، سووئت اتفاقینا منصوب اولمایان هر کس ۲۴ ساعت عرضینده یا اؤلکه‌نی ترک ائتمه‌لی، یا دا سووئت وطنداشلیغینی قبول ائتملیدیرلر.

خبری ائشیدن لطفی زاده‌نین آتاسی رحیم دایی عائله‌سینی گؤتوروب ایرانا گئدیر.

دنیا شهرتلی عالم اوچونجو صنفه‌دک تحصیلینی باکی‌دا آلیب، داها سونرا او، عائله‌سی ایله بیرگه تهرانا کؤچوب. ائله او عرفه‌لر فوتویا ماراق سالیر. سونرالار فوتوپرترتلر اوزره اختصاصلاشیر. مصاحبه‌لرینین بیرینده بو حاقدا دئییر: «پاپاراتسیلر کیمی اجازه‌سیز بیر چوخ مشهور انسانلاری چکمیشم».

مشهورلارین آراسیندا آمریکا-نین سابق پرزیدنتلری نیکسون و ترومن ده اولوب.

۱۹۴۲-جی ایلده تهران اونیورسیتتیندن ماذون اولوب. بوندان بیر ایل سونرا آمریکا-یا کؤچوب. ۱۹۴۴-جو ایلده ماساچوستس تخنولوگییا اینستیتوتونا داخل اولوب و آدینی لطفی عسگر زاده اولاراق دییشیب. ۱۹۴۶-جی ایلده کالومبیا اونیورسیتتینه دکترلوق درجه‌سی اوزره طلبه کیمی تحصیل آلینیر. ۱۹۵۹-جو ایله قدر آمریکا-دا میت و کولومبییا اونی­ورسی­تتلرینده ماگیستر، دکترلوق علمی در­جلری آلمیش، پرو­فسور کیمی فعالیت گؤسترمیشدیر. ۱۹۵۹-جو ایلدن اؤمرونون سونونادک کالیفورنیا-داکی برکلی اونیورسیتتینده درس دئییب.

لطفی زاده «تصوراتلار نظریه‌سی»، «سیستملر نظریه‌سی»، «سؤزله ایشله‌ین کمپوتر نظریه‌سی»، «اوپتیمال سوزگجلر نظریه‌سی»، «سوفت کمپیوتینگ» کیمی نظریه‌لرین مؤلفیدیر.

باکینی چوخ سئویردی. خصوصاً ده آذربایجان یئمکلرینی. ان چوخ لوله کبابلا کلم دولماسینی... ۱۹۶۵-جی ایلده باکییا گلنده اوشاقلیغینین بو ایکی لذتیندن دادماق ایلک ایشی اولوب.
لطفی زاده پولا اؤنم وئرن بیری دئییلدی. ایستاتیستیکایا گؤره، اونون نظریه‌سیندن یارارلانان شرکتلردن پای صاحبلیینی ایستسه، دنیانین ان وارلی آدامی اولاردی. اما ایستمیردی. ائله اونا گؤره ده بالاجا بیر ائوده کاسیبیانا یاشاماغی سئچدی.

لطفی زاده یهودی اصیللی فی خانیملا ایله ائولنیب. اونلارین ۲ اؤولادی وار. ایستللا زاده و نورمان زاده. ایستللا ۵۹ یاشیندا (۲۰۰۶) وفات ائدیب. خانیمی وفات ائد‌ندن بیر ایلدن سونرا او دا وفات ائتدی. ۹۶ یاشیندا... اؤلممیشدن اول ایسه دوغما باکی‌سیندا دفن اولونماسینی وصیت ائتدی. لطفی زاده ۶ سنتیابر ۲۰۱۷-جی ایلده آمریکا-نین کالیفورنییا اشتاتیندا ۹۶ یاشیندا دنیاسینی دییشمیشدیر.

چوخلاری اونون بو قرارینا تعجوبلنمیشدیلر. دوشونموشدولر کی، او، ائله یولداشینین یانیندا دفن اولونماق ایستیر. لاکن سن دئمه، لطفینین خانیمی اؤلنده وصیت ائتمیشدی کی، اونو یاندیریب، کولونو اوکیانا سپسینلر...

لطفی زاده اینانجلی بیری دئییلدی. آتیست ایدی. آنجاق وصیتی اوزرینه باکی‌دا دفن اولوناندا دینی قایدالارلا باسدیریلدی.

میراثینی داوامچی‌سی، تانینمیش عالم رافق علیئوه باغیشلاییب. پروفسور رافق علیئو ایسه بو مادی ثروتی «زاده ارثی و صونعی اینتلکت» آسوسیاسییاسینا هدیه ائدیب.