بو گون آذربایجان مدنیتینین گؤرکملی نماینده‌سی، بؤیوک بسته‌کار، عالیم-پئداگوگ و اجتماعی خادم، اس.اس.ار.ای خالق آرتیستی، آکادمیک قارا قارایئوین آنادان اولماسینین ۱۰۶-جی ایلدؤنومو تمام اولور.

Kult.az خبر وئریر کی، او، ۱۹۱۸-جی ایل فورالین ۵-ده باکی شهرینده مشهور حکیم-پئدیاتر ابولفضل قارایئوین و سونا اسگندر قیزینین عائله‌سینده آنادان اولوب.

دونیا شهرت‌لی بسته‌کار قارا قارایئوین اثرلری اس.اس.ار.ای-نین اکثر شهرلرینده، همچینین، آمریکا، پولشا (لهستان)، مصر، ایسپانییا، ایتالییا، پاریس، یاپونییا و آلمانییادا کئچیریلن محتشم موسیقی تدبیرلرینده موفقیتله اوینانیلیب.

اونون نظامینین «یئددی گؤزل» پویماسین‌دان بهره‌لنه‌رک یازدیغی «یئددی گؤزل» و جنوبی آفریکا یازیچی‌سی پیتر آبراهامسینین رومانی اساسیندا یازدیغی «ایلدیریم‌لی یوللارلا» بالتلری دنیانین بیر سیرا اؤلکه‌لرینده اوغورلا گؤستریلیب. بسته‌کارین بیرینجی سیمفونییاسی آذربایجانین ایلک سیمفونییالاری آراسیندا اساس یئر توتور. «دون کیخوت»، «لیلی و مجنون» ، «ویتنام سویتاسی» اثرلری قارا قارایئو یارادیجیلیغینین دیرلی صحیفه‌لریدیر. او، چوخسایلی فیلملره، او جمله‌دن، «دنیزی فتح ائد‌نلر»، «قیزیل اشلون»، «خزر نفت‌چیلری حاقین‌دا پووست»، «اوزاق ساحللرده» و دیگر فیلملره موسیقی بسته‌له‌ییب.

قارا قارایئو اوپرا ژانریندا دا اؤزونو سیناییب. او، «وطن» اوپراسینین و فرانسیز یازیچیسی آنری باربوسون اثری اساسیندا «ظریف‌لیک» مونووپراسینین مؤلفی‌دیر.

پلانلاشدیردیغی لاییحه‌لری چوخ ایدی. "حاملت"، "لیلی و مجنون"، "دون ژوان" بالتلری، "گؤزل یوسف" اوپراسی، "اوخویان داشلار" سیمفونیک سویتاسی، سیمفوجاز اوچون کنسرت، "اوشاقسیز شهر" اوراتورییاسی...

بسته‌کار "غربله شرق لاپ اولدن ایچیمده‌دیر"، - دئیردی.

اوغلو فرج قارایئو دئییر کی، بسته‌کار دوغوم گونو کئچیرمیی سئومزدی:

«اؤز عائله‌میز اولاردی. آنام، باجیم زولیخا و من... اونون خاطره‌سینی یاشادان ان گؤزل هدیه ایسه - اونون هر زامان سس‌لنه‌ن موسیقی‌سیدیر".

۱۹۸۲-جی ایل مایین ۱۳-ده ۶۴ یاشیندا مسکوادا گؤزلرینی ابدی یومان صنعتکار دوغما وطنینده - باکی‌دا فخری خیاباندا دفن اولونوب.