بو گون گؤرکم‌لی موغه‌ننی، خالق آرتیستی شوکت علکبرووانین آنیم گونودور.

Kult.az خبر وئریر کی، ۱۹۲۲-جی ایل اوکتیابرین ۲۰-ده باکی‌دا دونیایا گلن اونودولماز صنعتکار آصف زینال‌لی آدینا موسیقی مکتبینده حسینقولو سارابسکینین صینفینی بیتیردیکدن سونرا صحنه یارادیجیلیغینا باشلاییب.

۱۹۳۸-۱۹۴۵-جی ایللرده آذربایجان دولت ماهنی و رقص آنسامبلیندا سولیست کیمی چالیشان صنعتکار، سونرالار م. ماقومایئو آدینا آذربایجان دولت فیلارمونییاسینین سولیستی اولوب. شوکت علکبرووانین ایفاچیلیغی اوچون یوکسک وکال مدنیتی، اموسیوناللیق و لیریزم، مغام یارادیجیلیغی اوچون ایسه مهارتلی ایمپروویزاسییا باجاریغی سجیوی ایدی.

اوزییر حاجی بی‌لی، سعید روستموو، بلبل کیمی صنعتکارلارین دقتینی چکه‌رک اونلارین خئییر-دعاسینا آلان علکبرووا عمرونون سونونادک ایفاسی ایله اؤزونو ثبوت ائتمکله یاناشی، صنعته اصل صنعتکار کیمی خدمت گؤستریب. اونون «قاراباغ شیکسته‌سی»نی ملاحت‌لی سسی ایله مکمل سوییه‌ده ایفا ائتمه‌سی پئشه‌کار موسیقی صنعتینه گلیشینین اساسینی قویدو. دونیانین بیر چوخ شهرلرینده اوغورلا چیخیش ائد‌ن شوکت علکبرووانین رپرتوارینا «سگاه»، «قطار»، «شهناز» کیمی مغاملار، آذربایجان بسته‌کارلارینین و اورتا شرق خالقلارینین ماهنیلاری داخیل ایدی.

«دره‌لر»، «آغ چیچییم»، «بیر کؤنول سیندیرمیشام»، «گئدک اوزو کوله‌یه»، «آغلایا-آغلایا»، «هاراداسان»، «محبت»، «تئز گل»، «سوسن سونبول»، «دلی جیران»، «آی قاداسی»، «یار گلدی»، «کوردون گؤزه‌لی»، «جیران» و دیگر اونلارلا ماهنی بؤیوک صنعتکارین ایفاسیندا مهورلنیب. شوکت خانیمین رپرتواریندا اولان ماهنیلاردا سؤز، موسیقی و ایفا بیر-بیرینی تماملایاراق، وحدت تشکیل ائدیب. ائله بونا گؤره ده، موغه‌ننینین ایفا ائتدیی ماهنیلار ایلک ایفادان دینلییجیلرین اورکلرینه یول تاپاراق یادداشلاردا درین ایز بوراخیب. اونون کنسرتلرینده اشتراک ائد‌ن اینسانلار اعتراف ائدیرلر کی، شوکت علکبرووانین ماهنیلاری دیللر ازبری اولدوغوندان تماشاچیلارین دوداقلارینین ترپه‌نمه‌سینی مشاهیده ائتمه‌مک ممکن‌سوز ایدی.

چوخ آغیر عائله حیاتی کئچیرن شوکت علکبرووا ایکی دفعه عائله حیاتی قورموشدور. بیرینجی حیات یولداشینی چوخ تئز ایتیرن صنعتکارین ایلک ائولیلییندن ناتللا آدلی قیزی دونیایا گلیب.

ایکینجی دفعه رژیسور لطیف سفروولا ائولیلیک حیاتی قوران علکبرووانین بشیر آدلی اوغلو دونیایا گلیر. لاکین بیر نئچه ایل سونرا لطیف سفروو اینتیهار ائدیر.

شوکت علکبرووا ۷۰ یاشیندا ۱۹۹۳-جو ایلده دونیاسینی دییشیب. اونون مزاری باکیدا فخری خیاباندا یئرلشیر.