بو گون گؤرکملی آذربایجان شاعری علی‌آغا واحدین آنادان اولماسیندان ۱۳۰ ایل اؤتور.

Kult.az شاعر حاقین‌دا ماراقلی فاکتلاری تقدیم ائدیر.

حسین جاودله بیر مجلسده ایمیشلر. علی‌آغا واحدین باده قالدیرماق ایسته‌ینده جاوید آرتیق توبه ائتدیینی و ایچمدیینی دئییر. واحد اؤزونو سیندیرمادان بداحتاً بو میصراعلاری سؤیلییر:

جاوید ائله‌ییب شرابی توبه،

یارب، بیزه چاتماسین بو نوبه!

میر جعفر باقروو علی‌آغا واحدی یانینا چاغیریب ایچمه‌سینه گؤره خیلی دانلاییر. آخیردا دئییر: ایندی ده سن اؤل، ایچمه‌یه‌جه‌یه‌م. واحد باشینی قالدیریب دئییر، سید، سن اؤل، ایچه‌جه‌یه‌م!
یاز-یای موسوملرینده واحدین الینده همیشه قیزیلگول اولارمیش.

شاعر سیگارتی چوخ چکرمیش. گونده ۴-۵ قوتو سیگارت چکر، حتی بعضال چاتمازمیش. اوندان سوروشاندا کی، نیه بو قدر چکیرسن؟ دئیردی، آدامین ساغلام اؤلمه‌یه حیفی گلیر.

بیر گون خسته‌خانادا اونا قوللوق ائد‌ن طب باجی‌سینا ساتاشماق اوچون «آدامین بئله آروادی اولا» دئییر، همین قادین دا زارافاتلا قاییدیر کی، «آلسان، نیه اولمور». بو زارافات اونلارین ائولنمسیله نتیجه‌لنیر.

علی‌آغا واحد ادبیاتا قدم قویاندا بیرینجی دنیا محاربه‌سی ده یئنیجه باشلامیشدی. «اقبال» قزئتینده ساتیریک شعرلر یازیردی. قزئتین رداکتورو ایسه محمد امین رسولزاده ایدی.

شاعرین هیتلری، فاشیزمی لعنتله‌یه‌ن شعرلری خالقین دیلینده دولاشیردی. بونا گؤره واحده «امکدار اینجه‌صنعت خادمی» فخری آدی وئریلمیشدی.

بئله بیر احوالات دا دانیشیرلار: واحدین آدی رپرسییا اولوناجاق یازیچیلارین سیاهیسیندا باقروون ایستولونا گلیر. باقروو اونون اوستوندن قلم چکیب دئییر:

- ایچن آدامدان وطن خاینی اولماز!

شاعر رسمی ائولی اولماییب. آروادی ایله دینی کبینلی اولوبلار. علی‌آغا واحد رسمی نکاح ائتدیرمک ایسته‌ییب، آروادی راضی اولماییب.

علی‌آغا واحد حیات یولداشین‌دان ۳۰ یاش بؤیوک ایدی. یولداشی اونو سئومیردی. شاعرین استعدادینا، شهرتینه وورولموشدو. حتی آروادی دئییردی: "سن منه یاراشمیرسان. من گؤزه‌له‌م، سن چیرکینسن".

شاعرین ایتلره خصوصی سئوگیسی واردی. گونلرین بیرین‌ده چوخ سئودیی بیر ایتی اؤلور. خبری ائشی‌دن دوستلاری اونو دولاماق ایستییر. گئجه‌یاری گلیب باشساغلیغی وئریرلر. واحد حالینی پوزمادان اونیکال جواب وئریر: آرواد، یئمک-ایچمک حاضرلا، ایتین قوهوم-اقرباسی گلیب.

باغدا وضعیتی پیسلشیب، طب باجی‌سی اینه‌نی گئج ووردوغو اوچون اؤلوب. طب باجی‌سی مسئله‌سی سونرادان یاییلیب. معلوم اولماییب کی، طب باجی‌سی اینه‌نی قصداً گئج ووروب، یوخسا بو، ساده‌جه سهلنکارلیقدان اولوب.

شاعرین اؤلومو خالقی دریندن کدرلندیریر. اونو سئوه‌نلر، یازیچیلار، شاعرلر جنازه‌سینی یازیچیلار بیرلییندن فخری خیابانا قدر اللرینین اوستونده آپاریرلار. بو، او دورلرین ان محتشم دفن مراسمی اولوب.