بو گون آذربایجان یازیچی‌سی، ناثر، کینودراماتورق، سناریست، خالق یازیچی‌سی انور مممدخانلینین دوغوم گونودور.

Kult.az خاطیرلادیر کی، او، ۱۹۱۳-جو ایل فئورالین ۲۸-ده گؤیچای شهرینده دوغولوب.

شاعر رسول رضانین هم عمی‌سی اوغلو، هم ده خالاسی اوغلودور. گؤیچای‌دا ابتدای مکتبی بیتیردیکدن سونرا باکی‌دا ن. نریمانوو آدینا صنایع تکنیکومون‌دا تحصیل آلیب. سونرا باکی‌دا زاووددا ایشله‌ییب. عینی زامان‌دا آذربایجان نفت اینستیتوتون‌دا ایکی ایل غیابی تحصیل آلیب.

ادبی فعالیته ۱۹۳۰-جو ایللردن باشلاییب. اثرلری کئچمیش اس.اس.ار.ای و خاریجی اؤلکه خالقلارینین دیللرینه ترجمه اولونوب. اونون محاربه ایللرین‌ده قلمه آلدیغی حکایه‌لرده زامانین، گونون تاخیرسالینماز طلبلری، آداملاریمیزین مقدس وظیفه‌سی جان‌لی بویالارلا اؤز عکسینی تاپیردی. "غرب جبهه‌سیندن مکتوب"، "آنالار یوللارا چیخدیلار"، "یئنی ایلین حکمو"، "سلاحلی داغلار"، "قانلی مهر"، "هارالیسان، عسگر قارداش؟"، "آنانین اؤلومو"، "اولدوز" ،"اود ایچینده" پیسلری و "شیروان گؤزلی" لیریک کمدییاسی تماشایا قویولوب.

ادیبین ان یاخشی اثرلریندن بیری ده «بوز هیکل» حکایه‌سیدیر. یازیچی اثرده بوتون وارلیغی ایله کؤرپه‌سینه باغلی اولان آنانین قلبینین حرارتینی تصویر ائدیر.

«بوز هیکل» اثرینده بؤیوک، سرحدسیز آنا محبتینین شاهدی اولوروق. اثرده یازیچی ۱۹۴۱-۱۹۴۵-جی ایللر محاربه‌سینین ایلک ایلین‌ده جبهه خطینه یاخین یئرده باش وئرن بیر حادثه‌نی قلمه آلیر.

شاختالی، قارلی بیر قیش گئجه‌سی‌دیر. توپ گورولتولاری اطرافا واهیمه ساچیر. بئله واهیمه‌لی قیش گئجه‌سینده گنج آنا دوشمن الیندن باش گؤتوروب قاچیر. او، سینه‌سینه سیخدیغی کؤرپه‌سینی هاوا ایشیقلانانادک چایین او تایینا - آزاد تورپاغا کئچیرمه‌لیدیر. آنا نفسینی درمه‌دن ایرلیلییر. آنجاق نه قدر یول گئدیرسه، قارلی چؤللرین سونو گؤرونمور کی، گؤرونمور. آنا طاقتدن دوشور. شاختا اونا ساعاتباساعات، آنباآن داها گوجلو تأثیر ائدیر. بو گئنیش سویوق چؤللرده اونون کمکینه چاتاسی بیر قوه یوخدور، یگانه ایستینادگاه یئری قارشی‌سینا چیخان قوشا آغجاقایین آغاجیدیر. «کؤرپه دوناجاق...» دئیه دوشونور. لاکین آنا اوریینده‌کی قورخویا تسلیم اولمور، عکسینه اونا عصیان ائدیر. آنا جیرپاراسینی بدهیبت شاختادان قوروماق اوچون یون ژاکتینی، باشینداکی قالین شالینی، اینینده باشقا نه پالتار وارسا، هامی‌سینی چیخاریب بالاسینا بوکور. «- قورخما، بالاجام، سون نفسیمین ایستیسی ده سنیندیر...»سحر تئزدن کشفیاتدان قاییدان اوچ عسگر قوشا آغجاقایین آغاجینین یانیندا دهشتلی منظره ایله راستلاشیر. شاختادان دونوب بوز هیکله دؤنه‌ن آنا و اینینین پالتارینا بوکوب سینه‌سینه سیخدیغی ساغ قالان کؤرپه‌سی...

«بوز هیکل» اثرینی اوخویوب قورتاردیقدان سونرا اوزون مدت اونون تأثیریندن آیریلا بیلمه‌یه‌ن اوخوجو آنا سئوگی‌سینین بؤیوکلویو قارشی‌سیندا ساده‌جه باش اییر.

انور ممدخان‌لی «شرقین شکسپیری» حسین جاویدین قیزی توران خانمی سئویب. لاکین حسین جاویدین "خالق دوشمنی" اعلان ائدیلمه‌سینه گؤره بو ائولیلیک باش توتماییب. و بیر-بیرینی سئون جوتلوک هئچ زامان ائوله‌نمه‌ییب.

انور مممدخان‌لی ۱۹۹۰-جی ایل دکابرین ۱۹-دا باکی‌دا وفات ائدیب. ۲-جی فخری خیاباندا دفن اولونوب.