آخار. آذ تورکییه‌لی مشهور ژورنالیست و حربی موخبیر عرفان ساپمازلا مصاحیبه‌نی تقدیم ائدیر:

– آذربایجان‌دا «آوراسییا» آدلی قزئتینیز فعالیت گؤستریردی. اونون نشری نیه دایاندی؟

– تخمیناً ۱۲ ایل آذربایجان‌دا قالدیق. بیزیم جان آذربایجانیمیز! ان یاخشی ایللریمیزی اورادا کئچیردیک. «آوراسییا» قزئتین‌ده ایشله‌یه‌ن آذربایجان‌لی دوستلاریمیز سایه‌سین‌ده قزئتیمیز آدینی اؤلکه تاریخینه یازدیردی. آنجاق تأسف کی، داها سونرا نشری دایاندیراراق، تورکییه‌یه دؤنمک مجبوریتین‌ده قالدیق. چونکی مادی وضعیتیمیز قزئت چیخارماغیمیزا ایمکان وئرمیردی. اوزوله‌رک آذربایجانی ترک ائتدیک.

– «آوراسییا» قزئتین‌ده بیرلیک‌ده چالیشدیغینیز اینسانلارلا علاقه ساخلاییرسینیزمی؟

– حاضردا یالنیز سوسیال مئدیا واسطه‌سیله اونسیتدییک. تأسف کی، سوسیال مئدیایا گیرمه‌یه و دوستلارلا گؤروشمه‌یه، دانیشماغا چوخ واختیم یوخ‌دور. چوخ سایدا مئساژ گلیر، اما واخت محدودیتینه گؤره اونلاری اوخویا بیلمیرم. بلکه، بیر چوخ دوستوم جواب وئرمدییم اوچون من‌دن اینجیییب. آنجاق حقیقتا ده یوزلرله مئساژا بیر-بیر جواب وئرمه‌یه واختیم یوخ‌دور. فورصت‌دن ایستیفاده ائد‌رک، سیزین واسطه‌نیزله «آوراسییا» و «هر گون» قزئتلرین‌ده چالیشان دوستلاریمیزا، قارداشلاریمیزا ان خوش آرزو و سلاملاریمی چاتدیریرام.

– سونونجو دفعه نه واخت آذربایجان‌دا اولموسونوز؟

– ۲۰۱۱-جی ایلده آذربایجانی ترک ائتدیم و قاییتماغا واختیم اولمادی. آنجاق اومید ائدیره‌م کی، بو ایلین سونون‌دا آذربایجانا گلمک پلانیم باش توتاجاق. چونکی دوغرودان دا آذربایجان اوچون چوخ داریخمیشام. آذربایجان‌دا باش وئره‌ن حادثه‌لری یاخین‌دان ایزلییرم. چوخ شئیین دییشدیینی اؤیرندیم. قیسمت اولارسا، گلیب اؤز گؤزلریمله گؤرمک و کؤهنه خاطره‌لریمی یاد ائتمک ایستییرم.

– ساها اینفورماسییا آگئنتلیینی هان‌سی مقصدله یاراتمیسینیز؟ تورکییه‌ده مئدیا آگئنت‌لیکلرینین بول‌لوغونو نظره آلساق، بو آگئنت‌لیگی اؤنه چیخارماغا مووففق اولا بیلجکسینیزمی؟

– مقصدیمیز ژورنالیستیکایا یئنی نفس گتیرمک‌دیر. آدین‌دان دا گؤروندویو کیمی، اصل ژورنالیستلری میدانا (تورکجه: ساها) چیخاریب، ایشلرین‌دن یارارلانماق ایستییریک. بیلدیینیز کیمی، دونیانین تک-توک ساواش مخبیرلرین‌دن بیرییه‌م و اؤز تجروبه‌می بو آگئنت‌لیک واسطه‌سیله اینسانلارا اؤتورمک آرزوسوندایام.

– نیه گؤره حربی موخبیرلیگی سئچدینیز؟

– ۱۹۸۳-جو ایلده آدانادا ژورنالیستیکایا باشلامیشام. ایستانبولون مشهور و تجروبه‌لی ژورنالیستلری آراسین‌دا اولماق، اوغور قازانماق آسان دئییلدی. بونا گؤره ده حربی موخبیرلیگی سئچدیم. ۱۹۸۷-جی ایلده افغانیستانا گئتدیم. ایللرله سووئت اتفاقی ایله افغان مجاهیدلری آراسین‌داکی محاربه‌لری یاخین‌دان ایزلدیم. سونرا آذربایجانا گلدیم. حاضردا ایشغال آلتین‌دا اولان آذربایجان اراضیلرین‌ده‌کی دؤیوشلری ایزلدیم. ایشغال اولونموش اراضیلرینیزده آیاق باسمادیغیم یئر قالماییب.

– محاربه‌لرین آغری-آجیلارینی گؤرموش بیری کیمی، سیزجه، بو ساواشلاری دوردورماغین بیر یولو وارمی؟

– تأسف کی، بو محاربه‌لری دایاندیرماغین یولو یوخ‌دور. چونکی آمریکا باش‌دا اولماقلا، روسییا، اینگیلتره، آلمانییا و فرانسا کیمی دونیا نهنگلرین‌ده‌کی محاربه تاجیرلری میلیارد دلارلیق سلاحلاری ساتاراق، ثروتلرینه ثروت قاتیرلار. بوتون ساواشلار بو جور تحریک اولونور و نتیجه‌ده داها چوخ سلاح ساتیلیر. دونیادا هر زامان محاربه اولاجاق. بونا گؤره محاربه موخبیری اولاراق، دونیانین ایلک محاربه کانالینین اساسینی قویدوم و www.wartv.net وب صحیفه‌سینی آچدیم. اونو ۲۴ ساعت ائفیرده اولان بیر تلویزییایا چئویرمیی پلانلاشدیریرام.

– سیزی محاربه موخبیری کیمی تانیییریق، اما شخصی حیاتینیزلا باغلی هئچ نه بیلمیریک. بیزه اؤزونوز حاق‌دا دانیشا بیلرسینیزمی؟

– ان چتین شئی اینسانین اؤزو حاق‌دا دانیشماسی‌دیر. چونکی اینسان همیشه اؤزونو آختاریر. من اؤزومو آختاریرام، بؤیوک بیر آختاریش ایچین‌ده‌یه‌م. بونا «صوفی یولو» دئییریک. اینسان اؤزونو کناردا دئییل، یالنیز اؤز ایچین‌ده، اؤز قلبین‌ده تاپا بیلر. من ده اونو اورییمین درینلیین‌ده آختاریرام، صوفی عالیملر اونو «قارا دلیک» آدلاندیریر. بو «قارا دلیک»دن کئچه بیلسه‌م، ایستدییم هدفه چاتاجاغام. دئمک ایستییرم کی، بؤیوک معنوی سیرلره ییه‌لنه بیله‌جه‌م. محاربه موخبیری اولاراق، دونیا آرتیق منیم اوچون اهمیت کسب ائتمیر. بونا گؤره ده قورخمادان محاربه‌یه گئدیرم. من جبهه‌لرده بومبالار آلتین‌دا، مرمی یاغیشینین اورتاسین‌دا ایشله‌مه‌لییه‌م و اؤلوم قورخوسونو دف ائتمه‌لییه‌م. چونکی هاردا اولورسانسا-اول، اؤلوم گلیب سنی تاپاجاق. بونون اوچون محاربه‌نین ایچین‌ده اولماق لازیم دئییل. بونا گؤره ده صوفی عالیملر «اؤلمه‌دن اؤنجه اؤلون» دئییرلر. یعنی اؤلمه‌دن اؤنجه اؤلمیی باجارماق لازیم‌دیر. بو، البته کی، فیزیکی اؤلوم دئییل، معنوی اؤلومو دادماقدیر.

– خوجالی سویقیریمینی دونیایا تقدیم ائد‌ن ایلک ژورنالیستلردنسینیز.

– من آذربایجان‌لی دوستوم آغاسی هونلا آغدام‌دا اولدوغوم زامان خوجالی‌دا بیر قیرغین اولدوغونو اؤیرندیک و اورایا گئده‌رک، یاشانانلارین فوتوشکیللرینی، ویدئولارینی چکیب، دونیایا چاتدیردیق. آنجاق تأسف کی، هله ده خوجالی سویقیریمینی دونیایا لازیمی قدر چاتدیرا بیلممیشیک.

– تورکییه‌ده‌کی مئدیا اورگانلاری، وطنداش جمعیتلری قاراباغلا باغلی چوخ آز معلوماتا صاحیبدیرلر. حتی قاراباغی ارمنی تورپاغی حساب ائد‌نلر ده وار. قارداش اؤلکه‌ده آذربایجانلا باغلی بو معلوماتسیزلیغین سببلری ندیر؟

– بو معنادا هم آذربایجان، هم ده تورکییه مئدیاسی اولاراق تأسف کی، اوزریمیزه دوشه‌نلری تام اولاراق یئرینه یئتیره بیلمدیک. «سی ان ان تورک»اون کووردیناتورو اولدوغوم ۱،۵ ایللیک مدت‌ده تورکییه تلویزییالارین‌دا آذربایجان و قاراباغ خبرلرینی یاییملاییردیم. شعبه مدیرلرینه تاپشیرمیشدیم کی، آذربایجانلا باغلی هر هانسی بیر خبر گلرسه، موطلق منه معلومات وئریب، تئلئویزییادا ایشیقلاندیرسینلار. آنجاق تورکییه مئدیاسی اولاراق، بو مؤوضوعدا تام اوغور قازاندیغیمیزی دئیه بیلمریک.

– محاربه موخبیری اولاراق، سیزین فیکرینیز بیزیم اوچون ماراق‌لی‌دیر. سیزجه، آذربایجان قاراباغ ساواشین‌دا غالیب گله بیله‌جک‌می؟

– محاربه موخبیری کیمی یوبیلئیی‌می قید ائتمک ایستدییم یئر، شوبهه‌سیز کی، قاراباغ‌دیر. قهرمان آذربایجان و تورکییه سلاح‌لی قوه‌لرینین عسگرلری ایله پولاد دبیلقه‌می گئیینه‌رک، قاراباغین قایتاریلماسینی جانلی یاییملا دونیایا چاتدیرماق ایستییرم. و بونون اولاجاغینا اینانیرام. یئتر کی، بونا تکجه من یوخ، هامیمیز ایناناق. آذربایجان اوردوسونون عسگرلرینین بؤیوک تعلیملر کئچه‌رک، پئشکارلاشدیقلاری ایله باغلی معلوماتلار الده ائدیره‌م. بیر گون تلویزییادا آذربایجان اوردوسو حاقین‌دا بؤیوک بیر پروقرام و یا سندلی فیلم چکمک ایستردیم. سیزین واسطه‌نیزله آذربایجان اوردوسونون قهرمان عسگرلرینه سلام و حؤرمتی‌می یوللاییرام.